ខេត្តព្រះសីហនុ៖ រដ្ឋបាលខេត្តព្រះសីហនុ ទទួលបានការផ្តល់ជូនអាហារូបករណ៍សិស្សប្រឡងជាប់បាក់ឌុប ចេញទៅរៀននៅប្រទេសចិន និងថៃចំនួន ១៥កន្លែង និងម៉ូតូ៥គ្រឿងថវិកា២០លានរៀល ពីសប្បុរសជន ឬវិស័យឯកជន។
ពិធីផ្តល់ជូននេះ ធ្វើឡើងកាលពីព្រឹកថ្ងៃពុធ ទី១១ ខែកញ្ញា ឆ្នាំ២០១៩នេះ នាសាលប្រជុំសាលាខេត្តព្រះសីហនុ ដឹកនាំដោយ លោក គួច ចំរើន អភិបាលនៃគណៈអភិបាលដឹកនាំមន្ត្រី និងតំណាងភាគីម្ចាស់ជំនួយ។
ចំពោះអាហារូបករណ៍សិក្សានៅប្រទេសចិន និងថៃ ចំនួន ១៥កន្លែង ដែលវិស័យឯកជនផ្តល់ ជូនរដ្ឋបាលខេត្តព្រះសីហនុ សម្រាប់សិស្សទើបប្រឡងជាប់សញ្ញាបត្រមធ្យមសិក្សាទុតិយភូមិ ឬជាប់សញ្ញាបត្របាក់ឌុបឆ្នាំ២០១៩នេះ គឺផ្តល់ជូនដោយ លោកបណ្ឌិត សុខ ប្រសិទ្ធិ ប្រធានក្រុមប្រឹក្សាភិបាលសម្ព័ន្ធយុវជនអាហារូបករណ៍(ស២)។
ត្រង់ចំណុចនេះ លោកបណ្ឌិត សុខ ប្រសិទ្ធិ មានប្រសាសន៍ថា អាហារូបករណ៍ទាំង២៥កន្លែងនេះ គឺសិក្សានៅប្រទេសថៃចំនួន ១០កន្លែង និងប្រទេសចិន ចំនួន ៥កន្លែង។
ចំណែកក្រុមហ៊ុនផលិតបេតុងចុងលី ក៏បានជួយឧបត្ថម្ភម៉ូតូចំនួន ៥គ្រឿង និងថវិកាចំនួន ២០លានរៀលជូន ដល់រដ្ឋបាលខេត្តព្រះសីហនុផងដែរ។
នាឱកាសនោះ លោក គួច ចំរើន អភិបាលនៃគណៈអភិបាលខេត្តព្រះសីហនុ បានថ្លែងអំគុណដល់សប្បុរសជន ក៏ដូចជាខាងវិស័យឯកជន ដែលបានចូលរួមជួយយកចិត្តទុកដាក់ លើការបណ្តុះបណ្តាលធនធានមនុស្ស និងការងារអភិវឌ្ឍន៍សង្គម ជាមួយរាជរដ្ឋាភិបាលកម្ពុជា ក៏ដូចជាជាមួយរដ្ឋបាលខេត្តព្រះសីហនុនៅពេលនេះ៕ ដោយ៖ ដែន សីមា