ខេត្តព្រះសីហនុ៖ ស្នងការនគរបាលខេត្តព្រះសីហនុ ព្រមានថា រាលរថយន្តគ្មានផ្លាកលេខ ជាពិសេសរថយន្តដឹកដី និងដឹកស៊ីម៉ងត៍ នឹងមិនអាចធ្វើចរាចរណ៍តាមផ្លូវសាធារណៈ ក្នុងក្រុងព្រះសីហនុបានទៀតទេ ចាប់ពីពេលនេះតទៅ។
បញ្ហានេះ លោក ជួន ណារិន្ទ ស្នងការនគរបាលខេត្តព្រះសីហនុ បញ្ជាក់នៅព្រឹកថ្ងៃទី១១ ខែកញ្ញានេះថា រូបលោកបានដាក់បទបញ្ជាទៅមន្ត្រីនគរបាលចរាចរណ៍ ឲ្យចុះស្ទាក់ចាប់រថយន្តអត់មានពាក់ផ្លាកលេខ ដែលកំពុងធ្វើចរាចរណ៍តាមផ្លូវសាធារណៈ ក្នុងខេត្តព្រះសីហនុ ដើម្បីផាកពិន័យ និងតម្រូវឲ្យម្ចាស់ធ្វើផ្លាកលេខឲ្យបានត្រឹមត្រូវ។
លោក ជួន ណារិន្ទ បានបញ្ជាដាច់ខាតទៅមន្ត្រីនគរបាលចរាចរណ៍ ដែលកំពុងបញ្ជាចរាចរណ៍គ្រប់គោលដៅ ត្រូវតែឃាត់ចាប់រថយន្តដឹកដី និងដឹកស៊ីម៉ងត៍ជាដើម ដែលមិនមានពាក់ផ្លាកលេខសម្គាល់ នៅលើយានយន្តទាំងនោះ យកទៅរក្សាទុកនៅការិយាល័យនគរបាលចរាចរណ៍ ដើម្បីចាត់ការតាមផ្លូវច្បាប់។
ប្រតិកម្មខ្លាំងៗ របស់ លោកស្នងការ ជួន ណារិន្ទ បែបនេះ បានកើតឡើងធ្វើឡើងបម្ទាប់ពីមានរថយន្តដឹកដី និងដឹកស៊ីម៉ងត៍មួយចំនួន បានព្យាយាមដោះផ្លាកលេខទុក មិនបំពាក់នៅលើរថយន្តឲ្យស្របតាមច្បាប់ទេ ដោយមានបំណងមិនល្អ ឬក៏ក្នុងបំណងបំបាត់ដាន ប្រសិនបើរថយន្តអត់ផ្លាកលេខទាំងនោះ បង្កបញ្ហាគ្រោះថ្នាក់ចរាចរអ្វីមួយ នៅតាមដងផ្លូវសាធារណៈដើម្បីងាយស្រួលក្នុងការបើករត់គេច។ ហើយរថយន្តខ្លះទៀត ជារថយន្តដែលមិនទាន់ទៅធ្វើផ្លាកលេខជាដើម។
លោក ជួន ណារិន្ទ ស្នងការនគរបាលខេត្តព្រះសីហនុ សង្កត់ធ្ងន់ថា ការអនុវត្តន៍ច្បាប់ចរាចរណ៍ គឺត្រូវរឹតបន្តឹងទាំងអស់គ្នា ដោតមិនគិតថាជាជនជាតិខ្មែរ ឬជនបរទេសនោះទេ។
យ៉ាងនេះក្តី គេសង្កេតឃើញថា នៅថ្ងៃទី១១ ខែកញ្ញានេះ នៅមានរថយន្តដេកស៊ី និងរថយន្តក្រឡុកស៊ីម៉ងត៍ជាច្រើនគ្រឿង ដែលអត់ពាក់ផ្លាកលេខ បានបន្តធ្វើចរាចរណ៍តាមផ្លូវសាធារណៈ ក្នុងក្រុងព្រះសីហនុ យ៉ាងអនាធិបតេយ្យដដែល៕ ដោយ៖ ដែន សីមា