ភ្នំពេញ ៖ គណៈកម្មាធិការសិទ្ធិមនុស្សកម្ពុជាប្រកាសថាសេចក្ដីព្រាងច្បាប់ស្តីពីការបង្កើតស្ថាប័នសិទ្ធិមនុស្សជាតិដោយអះអាងថា ដើម្បីបម្រើប្រយោជន៍ពលរដ្ឋពិសេសជួយអន្តរគមន៍ចំពោះករណីរំលោភសិទ្ធិមនុស្សនានា។ នេះបើតាមសេចក្ដីប្រកាសព័ត៌មានគណៈកម្មាធិការសិទ្ធិមនុស្សកម្ពុជា ដែលចេញផ្សាយថ្ងៃទី១០កញ្ញា ឆ្នាំ២០១៩។
សេចក្តីប្រកាសព័ត៌មាន នេះបញ្ជាក់ថា ក្រោយពីសេចក្តីព្រាងច្បាប់នោះរួចរាល់ គ.ស.ម.ក នឹងទទួលការពិគ្រោះយោបល់ពីគ្រប់ភាគីពាក់ព័ន្ធដើម្បីប្រមូលធាតុចូល និងដើម្បីឱ្យការតាក់តែងច្បាប់កាន់តែល្អប្រសើរ ។
គួរជម្រាបថា ដំណើរការតាក់តែងច្បាប់ស្តីពី ការបង្កើតស្ថាប័នសិទ្ធិមនុស្សជាតិនៅកម្ពុជា ដែលជាភារកិច្ចរបស់ក្រុមអង្គការសង្គមស៊ីវិលនោះ អស់រយៈពេល ១៣ឆ្នាំមកនេះ ដំណើរការតាក់តែង និងពិភាក្សាលើសេចក្តីព្រាងច្បាប់ឱ្យស្របតាមគោលការណ៍ទីក្រុងប៉ារីស នៅមិនទាន់ឈានដល់ចំណុចឯកភាពគ្នាទាំងស្រុងនោះទេ ។
ដើម្បីស្របតាមឆន្ទៈរបស់រាជរដ្ឋាភិបាល សារសំខាន់នៃតួនាទីរបស់ស្ថាប័នសិទ្ធិមនុស្សជាតិ និងស្របតាមអនុសាសន៍នៃរបាយការណ៍ UPR រាជរដ្ឋាភិបាលក៏សម្រេចប្រគល់ភារកិច្ចឱ្យ គ.ស.ម.ក ពិនិត្យ និងសម្របសម្រួលដើម្បីពន្លឿននីតិវិធី ដើម្បីឈានទៅរកការអនុម័តច្បាប់នេះ ។
សេចក្ដីប្រកាសបញ្ជាក់ថា ការតាក់តែងសេចក្ដីព្រាងច្បាប់នេះ គឺធ្វើឡើងដើម្បីឆ្លើយតបនឹងអនុសាសន៍របាយការណ៍ត្រួតពិនិត្យជាសកលតាមពេលវេលាកំណត់របស់អង្គការសហប្រជាជាតិឱ្យស្របតាមគោលការណ៍ទីក្រុងបារីសដែលត្រូវបានអនុម័តដោយមហាសន្និបាតអង្គការសហប្រជាជាតិកាលពីថ្ងៃទី២០ខែធ្នូឆ្នាំ១៩៩៣។
មហាសន្និបាតអង្គការសហប្រជាជាតិកាលថ្ងៃទី ២០ ខែធ្នូឆ្នាំ ១៩៩៣ បានអនុម័តលើសេចក្តីសម្រេចចិត្តលេខ ៤៨/១៣៤ ស្តីពី“ ស្ថាប័នជាតិសម្រាប់ការជំរុញនិងការពារសិទ្ធិមនុស្ស” ធ្វើឡើងដោយបង្ហាញ គោលការណ៍ស្ដីពីឋានៈនៃស្ថាប័នជាតិដែលធ្វើការងារផ្នែកសិទ្ធិមនុស្ស។ ប្រទេសលើសកលលោកឱ្យឈ្មោះឯកសារនោះថាគោលការណ៍ក្រុងប៉ារីស។ សេចក្ដីសម្រេចនេះ បានលើកទឹកចិត្តឱ្យរដ្ឋទាំងអស់នៅលើពិភពលោកបង្កើតស្ថាប័នសិទ្ធិមនុស្សជាតិឯករាជ្យ ដើម្បីការពារសិទ្ធិមនុស្ស។
គោលការណ៍ទីក្រុងប៉ារីសបង្កើត ត្រូវបានទទួលស្គាល់ជាអន្តរជាតិដើម្បីវាយតម្លៃភាពជឿជាក់ឯករាជ្យភាពនិងប្រសិទ្ធភាពរបស់ស្ថាប័នសិទ្ធិមនុស្សជាតិ ។ គោលការណ៍ចែងថា ដើម្បីឱ្យមានប្រសិទ្ធិភាព ស្ថាប័នសិទ្ធិមនុស្សជាតិ គួរតែមានសមត្ថកិច្ច ក្នុងការដោះស្រាយបញ្ហាសិទ្ធិមនុស្សទាំងអស់ក្នុងប្រទេសរបស់ខ្លួន ។
គោលការណ៍នោះក៏បានចែងដែរថា ដំណើរការជ្រើសរើសនិងការតែងតាំង អ្នកដឹកនាំឬបុគ្គលិកស្ថាប័ននេះ ត្រូវធ្វើឡើងដោយមានភាពឯករាជ្យភាពមិនមានការជ្រៀតជ្រែកពីខាងក្រៅ។លើសពីនេះ ហិរញ្ញវត្ថុ ព្រមទាំងសមត្ថកិច្ចនិងវិសាលភាពបំពេញការងារ ក៏ទាមទារឱ្យមានការធានាពីរដ្ឋដែរ។
សេចក្ដីព្រាងច្បាប់បង្កើតស្ថាប័នសិទ្ធិមនុស្សជាតិដែលសង្គមស៊ីវិលដាក់ជូនរាជរដ្ឋាភិបាលពិនិត្យមានចែងលើផ្នែកសំខាន់ៗចំនួនបីផ្នែក រួមមានតួនាទីនិងភារកិច្ចរបស់ស្ថាប័ន អំណាចឯករាជ្យរបស់ស្ថាប័ន និង សមាសភាពនៃថ្នាក់ដឹកនាំស្ថាប័ន៕ ដោយ ៖ បញ្ញាស័ក្តិ