ភ្នំពេញ ៖ លោកម៉ម សូណង់ដូ បាននិយាយថា គណបក្សនយោបាយ ដែលជាសមាជិកឧត្តមក្រុមប្រឹក្សាពិគ្រោះយោបល់ មិនទាន់ធ្វើរបាយការណ៍បញ្ហាពលរដ្ឋ ដាក់ជូនរដ្ឋាភិបាលពិនិត្យបានល្អនៅឡើយទេ។ ដូច្នេះការធ្វើជានាយករដ្ឋមន្ត្រីវិញ ពួកគេក៏គ្មានសមត្ថភាពឡើយ។ ពាក់ព័ន្ធករណីនេះត្រូវបានលោកពេជ្រ ស្រស់ ឆ្លើយតបវិញថា អ្នកដែលធ្វើមិនកើត គឺតាដូនេះឯងពីព្រោះគាត់ជិតដល់ថ្ងៃស្លាប់ហើយ។
លោកពេជ្រ ស្រស់ សមាជិកឧត្តមក្រុមប្រឹក្សាពិគ្រោះនិងផ្តល់យោបល់ មកពីគណបក្សយុវជនកម្ពុជា បានសរសេរសារ លើហ្វេសប៊ុកផ្លូវការនៅថ្ងៃទី១២ខែកញ្ញាឆ្នាំ២០១៩នេះថា “អ្នកដែលធ្វើមិនកើត គឺតាដូនេះឯង
ពីព្រោះគាត់ជិតដល់ថ្ងៃស្លាប់ហើយ ពោលគឺថាចាស់ជរាទៅវង្វេងហើយ”។
លោក បានបញ្ជាក់បន្ថែមថា “ឯកឧត្តម ម៉ម សូណង់ដូ បានផ្តល់បទសម្ភាសន៍ដល់សារព័ត៌មានថ្មីថ្មី ហាក់បី ដូចឆ្លើយជំនួសមាជិកដទៃពេកហើយ បើសិនជាឯកឧត្តមគ្មានសមត្ថភាពធ្វើនាយករដ្ឋមន្ត្រី សូមឯកឧត្តមទទួលស្គាល់ត្រឹមខ្លួនឯងបានហើយ កុំឆ្លើយដាក់គេឯងអ៊ីចឹងអី”។
ប្រធានគណបក្សសំបុកឃ្មុំរូបនេះ បានថ្លែងប្រាប់សារព័ត៌មានក្នុងស្រុកថា គណបក្សនយោបាយ ដែលជាសមាជិកឧត្តមក្រុមប្រឹក្សាពិគ្រោះយោបល់ មិនទាន់ធ្វើរបាយការណ៍បញ្ហាពលរដ្ឋ ដាក់ជូនរដ្ឋាភិបាលពិនិត្យបានល្អនៅឡើយទេ។ ដូច្នេះការធ្វើជានាយករដ្ឋមន្ត្រីវិញ លោក សូណង់ដូ ហ៊ាននិយាយថា ពួកគេក៏គ្មានសមត្ថភាពឡើយ ។ បើតាមលោក សូណង់ដូ ការធ្វើជានាយករដ្ឋមន្ត្រីទាល់តែមានបទពិសោធន៍ ប៉ុន្តែគណបក្សខ្លះ មិនទាន់ទាំងមានសមាជិកពោរពេញដោយសមត្ថភាពគ្រប់គ្រាន់ផង។ នៅពេលសួរថា គណបក្សទាំង១៥ ដែលចូលធ្វើជាសមាជិកឧត្តមក្រុមប្រឹក្សាពិគ្រោះយោបល់នេះ គឺសុទ្ធតែគ្មានសមត្ថភាពធ្វើនាយករដ្ឋមន្ត្រីទេ? លោក ម៉ម សូណង់ដូ ឆ្លើយតបភ្លាមថា គឺគ្មានតែម្ដង អត់មាន អ្នកមានសមត្ថភាព ហ្មង បើអ្នកណាថា មានសមត្ថភាព សូមអញ្ជើញមកនិយាយជាមួយពូ។ សម្ភាសន៍ធ្វើវេទិកាសួរដេញដោលគ្នាមួយឱ្យប្រជាពលរដ្ឋស្ដាប់។
គ្រាន់តែសព្វថ្ងៃនេះមេដឹកនាំគណបក្សខ្លះ សរសេរមិនទាន់ត្រង់ជ្រុងផង ។ ពូមិនបង្អាប់ទេ ព្រោះគេសុទ្ធតែមានមនសិកាជាតិ គេចង់ធ្វើជានាយករដ្ឋមន្ត្រី ចង់ធ្វើប្ដូរនេះ ប្ដូរនោះ គឺជារឿងរបស់គេ។ ប៉ុន្តែខ្ញុំមើលឃើញ ថា ពួកគេអាចធ្វើអ្វីបាន ប៉ុន្តែគ្រប់គ្រងប្រទេសជាតិ វាទៅអត់រួច។ លោកក៏គ្មានសមត្ថភាពអ្វីទៅដឹកនាំប្រទេសដែរ៕ដោយ៖បញ្ញាស័ក្តិ