ប្រធានាធិបតីអាមេរិច លោកដូណាល់ ត្រាំ និងធ្វើការពន្យារពេលដំឡើងពន្ធលើផលិតផលនាំចូលពីចិន ដែលមានតម្លៃជាទឹកប្រាក់ ២៥០ពាន់លានដុល្លារ ដែលការពន្យារពេលនេះ គឺដើម្បីបង្ហាញកាយវិការនៃឆន្ទៈ មុនពេលកិច្ចចរចាពាណិជ្ជកម្មរវាងប្រទេសទាំងពីរ។
នៅក្នុងបណ្តាញសង្គម Twitter លោកបានថ្លែងថា ការដំឡើងពន្ធ ៥ភាគរយដែលនឹងគ្រោងធ្វើឡើងនៅថ្ងៃទី ១ខែតុលា នឹងត្រូវពន្យារពេលរយៈពេល ២សប្តាហ៍។
លោកថ្លែងថា ការពន្យារពេលនោះ គឺជាការស្នើសុំពីខាងភាគីចិន ហើយក៏វាជាការឆ្លើយតបសម្រាប់ចិន ដែលបានបោះបង់ចោលការយកពន្ធលើទំនិញអាមេរិចផងដែរ។
កាលពីខែមុន អាមេរិចបាននិយាយថា ខ្លួននឹងធ្វើការដំឡើងអត្រាពន្ធលើមុខទំនិញ នាំចូលពីចិនទាំងអស់ រួមមានការដំឡើងពន្ធ ២៥ ទៅ ៣០ភាគរយលើទំនិញចិនមានតម្លៃ ២៥០ពាន់លានដុល្លារ។
នៅថ្ងៃពុធម្សិលមិញនេះ លោកត្រាំ បានថ្លែងថា អនុនាយករដ្ឋមន្រ្តីចិន លោក Liu He បានស្នើឲ្យគាត់ពន្យារពេលដំឡើងពន្ធដែលគ្រោងធ្វើនៅថ្ងៃទី ១ខែតុលា។
កាលពីពេលថ្មីៗនេះ ចិនបានបញ្ចេញបញ្ជីឈ្មោះនៃទំនិញរបស់អាមេរិច ១៦មុខដែលនឹងរួចពន្ធ រួមមានថ្នាំប្រឆាំងមហារីក និងចំណីសត្វ។
ទំនិញសំខាន់ៗរបស់អាមេរិច ដែលនាំចូលទៅចិន ដូចជា សាច់ជ្រូក សណ្តែកសៀង និងរថយន្តជាដើម នៅតែស្ថិតក្នុងមុខទំនិញដែលចិនត្រូវយកពន្ធដដែល៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC