ភ្នំពេញ ៖ មន្ទីរប្រឆាំងបទល្មើសគ្រឿងញៀន បានឆ្មក់បង្ក្រាប និងឃាត់ខ្លួនមេខ្លោងជួញដូរគ្រឿងញៀនម្នាក់ ដោយដកហូតបានគ្រឿងញៀនចំនួន ៣៨៥៣ក្រ,៨៩ (ជិត៤គីឡូក្រាម)។ ប្រតិបត្តិការនេះធ្វើឡើង ដោយយោងអនុវត្តន៍តាមបទបញ្ជារបស់នាយឧត្តមសេនីយ៍ នេត សាវឿន អគ្គស្នងការនគរបាលជាតិ និងក្រោមការដឹកនាំដោយផ្ទាល់ពីសំណាក់លោកនាយឧត្ដមសេនីយ៍ ម៉ក់ ជីតូ អគ្គស្នងការរងនគរបាលជាតិ លោកឧត្ដមសេនីយ៍ឯក ឡឹក វណ្ណៈ នាយមន្ទីរប្រឆាំងបទល្មើសគ្រឿងញៀន។
ប្រតិបត្តិការបង្ក្រាបមេខ្លោងជួញដូរគ្រឿងញៀននេះ បានធ្វើឡើងនាថ្ងៃទី១០ ខែកញ្ញា ឆ្នាំ២០១៩ ដោយកម្លាំងជំនាញ (ក១១) របស់មន្ទីរប្រឆាំងគ្រឿងញៀន បានបង្រ្កាបករណីជួញដូរគ្រឿងញៀន ស្ថិតនៅចំណុចផ្លូវលំ ផ្ទះគ្មានលេខ បន្ទប់លេខ៩ នៅក្នុងភូមិស្លែងរលើង សង្កាត់អូរបែកក្អម ខណ្ឌសែនសុខ រាជធានីភ្នំពេញ។ មេខ្លោងគ្រឿងញៀនមានឈ្មោះ យ៉េន ជឿន ភេទប្រុស អាយុ២៩ឆ្នាំ មុខរបរ រត់ម៉ូតូកង់បី ផាស់អាប់ (PASSAPP)។ វត្ថុតាងដកហូតបានរួមមាន ថ្នាំញៀន ប្រភេទមេតំហ្វេតាមីន (ICE) ទម្ងន់ ៣២៥៤,៣១ក្រាម ថ្នាំញៀនកេតាមីន ទម្ងន់៣៤៦ក្រាម៣៥ និង ថ្នាំញៀនអ៊ិចស្តាស៊ី (MDMA) ទម្ងន់ ២៥៣,២៣ក្រាម សរុបទាំងអស់មានទម្ងន់ ៣៨៥៣ក្រ,៨៩៕ដោយ៖បញ្ញាស័ក្តិ
