ខេត្តព្រះសីហនុ៖ ស្នងការរងនគរបាលខេត្តព្រះសីហនុ ទទួលបន្ទុកផែនចរាចរណ៍ផ្លូវគោក គឺ លោកឧត្តមសេនីយ៍ត្រី អ៊ី សុខា បានឲ្យដឹងនៅថ្ងៃទី១២ ខែកញ្ញា ឆ្នាំ២០១៩នេះថា នគរបាលចរាចរណ៍បានចាត់វិធានការក្តៅ ចុះអនុវត្តន៍ច្បាប់ចរាចរណ៍ផ្លូវគោក ឲ្យមានប្រសិទ្ធភាព ចំពោះយានយន្តទាំងឡាយណា ដែលមិនមានលក្ខណៈបច្ចេកទេស និងមិនអនុវត្តន៍ច្បាប់ឲ្យបានត្រឹមត្រូវទេ។
លោក អ៊ី សុខា បន្តថា ចាប់ពីថ្ងៃទី១១ មកដល់ថ្ងៃទី១២ ខែកញ្ញានេះ សមត្ថកិច្ចបានឃាត់រថយន្តដឹកដីគ្មានផ្លាកលេខជាង១០គ្រឿង នាំយកទៅពិន័យ និងតម្រូវឲ្យម្ចាស់ធ្វើកិច្ចសន្យា ព្រមទាំងធ្វើផ្លាកលេខរថយន្តឲ្យបានត្រឹមត្រូវ។
លោក អ៊ី សុខា បន្តថា នគរបាលចរាចរណ៍ ក្រៅពីបានឃាត់ចាប់រថយន្តដឹកដី ក៏មានរថយន្តប្រភេទផ្សេងៗមួយចំនួនទៀត ដែលអត់មានពាក់ផ្លាកលេខ ត្រូវបាននគរបាលឃាត់ចាប់ដូចគ្នា ដោយនាំមករក្សាទុកនៅការិយាល័យនគរបាលចរាចរណ៍ ដើម្បីចាត់ការតាមនីតិវិធីច្បាប់។
លោកថា វិធានការក្តៅខាងលើនេះ គឺអនុវត្តន៍តាមបទបញ្ជា របស់លោកឧត្តមសេនីយ៍ទោ ជួន ណារិន្ទ ស្នងការនគរបាលខេត្តព្រះសីហនុ ដើម្បីពង្រឹងការអនុវត្តច្បាប់ចរាចរណ៍ផ្លូវគោកឲ្យមានប្រសិទ្ធភាព។
លោក អ៊ី សុខា ឲ្យដឹងដូច្នេះ រួចបញ្ជាក់ថា ចំពោះរថយន្តដែលនគរបាលឃាត់ចាប់ គឺតម្រូវឲ្យម្ចាស់រថយន្តបង់ប្រាក់ពិន័យ ក្នុងនោះរថយន្តធំផាកពិន័យ ៨០ម៉ឺនរៀល។ រីឯរថយន្តតូចផាកពិន័យ ៤០ម៉ឺនរៀល ហើយតម្រូវឲ្យម្ចាស់ធ្វើកិច្ចសន្យា នៅចំពោះមុខសមត្ថកិច្ច មិនឲ្យមានករណីនេះជាលើកទី២ទៀតទេ។
លោក អ៊ី សុខា សង្កត់ធ្ងន់ថា សកម្មភាពចុះត្រួតពិនិត្យ និងពង្រឹងការអនុវត្តច្បាប់ក្តៅបែបនេះ នឹងត្រូវចុះអនុវត្តន៍ជារៀងរាល់ថ្ងៃ ដើម្បីឈានដល់បង្ក្រាបយានយន្ត ដែលធ្វើចរាចរណ៍ ដោយគ្មានផ្លាកលេខនៅតាមផងផ្លូវ ឲ្យមានប្រសិទ្ធភាព។
ដោយឡែក សម្រាប់អ្នកជិះម៉ូតូ លោក អ៊ី សុខា បញ្ជាក់ថា ដាច់ខាតត្រូវតែពាក់មួកការពារសុវត្ថិភាព ប៉ុន្តែបើមិនពាក់មួកសុវត្ថិភាពទេ នគរបាលចរាចរណ៍ នឹងចាប់ផាកពិន័យធ្ងន់ធ្ងរ ដោយគ្មានការលើកលែងឲ្យទៀតទេ។
ត្រង់ចំណុចនេះ លោក អ៊ី សុខា បញ្ជាក់ថា ជាវិធានការរឹតបន្តឹងការអនុវត្តច្បាប់ចរាចរណ៍ផ្លូវគោក ដែលចេញបញ្ជាដាច់ណាត់ដោយ លោក ជួន ណារិន្ទស្នងការនគរបាលខេត្តព្រះសីហនុ។ លោកស្នងការ បានដាក់បទបញ្ជាដល់កងនគរបាល ត្រូវចុះប្រតិបត្តិការត្រួតពិនិត្យ ការអនុវត្តច្បាប់ចរាចរណ៍ផ្លូវគោក នៅតាមដងផ្លូវឲ្យបានជាប្រចាំ និងដាក់ពិន័យឲ្យបានធ្ងន់ធ្ងរ។
ផ្តើមពីបញ្ហានេះ លោក អ៊ី សុខា ស្នងការរងនគរបាលខេត្តព្រះសីហនុ បានក្រើនរំលឹកដល់អ្នកបើកបរយានយន្តគ្រប់ប្រភេទ ឬអ្នកប្រើប្រាសផ្លូវ ត្រូវចូលរួមគោរពច្បាប់ចរាចរណ៍ ឲ្យបានទាំងអស់គ្នា និងជាប្រចាំ ទោះបីចម្ងាយផ្លូវជិត ឬឆ្ងាយបែបណាក្តី៕ ដោយ៖ ដែន សីមា
