ខេត្តព្រះសីហនុ៖ កាលព្រឹកថ្ងៃព្រហស្បត្តិ៍ ទី១២ ខែកញ្ញា ឆ្នាំ២០១៩ នាសាលប្រជុំសាលាខេត្តព្រះសីហនុ លោក គួច ចំរើន អភិបាល នៃគណ: អភិបាលខេត្តព្រះសីហនុ បើកកិច្ចប្រជុំពិភាក្សាបញ្ហាប្រឈមកង្វះទឹកស្អាតប្រើប្រាស់ ជូនប្រជាពលរដ្ឋ រស់ក្នុងក្រុងព្រះសីហនុ។
កិច្ចប្រជុំនេះ ក៏មានវត្តមាន លោកឧញា កុក អាន ប្រធានក្រុមហ៊ុនអានកូរ (វ៉ធើរសឹបផ្លាយ) ប្រចាំខេត្តព្រះសីហនុ និងមន្ត្រីជំនាញមន្ទីរពាក់ព័ន្ធ នៃរដ្ឋបាលសាលាខេត្តព្រះសីហនុជាច្រើននាក់ទៀតបានចូលរួម។
នាឱកាសនោះ លោកឧកញ៉ា កុក អាន ប្រធានក្រុមហ៊ុន អានកូ (វ៉ធើរសឹបផ្លាយ) បញ្ជាក់ថា ក្រុមហ៊ុនលោកកំពុងបង្កើនការតបណ្តាញទុយោមេ មានមុខកាត់ចាប់ពី ៤០០ រហូតដល់ ៦០០ ជាច្រើនខ្សែ និងបង្កើនការសាងសង់អាងផលិតទឹករហូតដល់ ១០០.០០០ម៉ែត្រគីប និងបន្តចែកចាយទឹកមករដ្ឋាករទឹកខេត្តព្រះសីហនុ ក្នុងមួយថ្ងៃ ១០.០០០ ក្នុងឆ្នាំ២០១៦ និង ៣៥.០០០ម៉ែត្រគីប ក្នុងឆ្នាំ២០១៩នេះ។
លោកឧកញ៉ាបន្តថា បច្ចុប្បន្នក្រុមហ៊ុន មានស្ថានីយ៍ផលិតទឹកស្អាតមួយ និងស្ថានីយ៍ស្តុក និងចែកចាយទឹកមួយនៅជិតរោងចក្រ អ័រស៊ីអាយ (RCI) ស្ថិតនៅសង្កាត់លេខ១ ក្រុងព្រះសីហនុ។ ជាងនេះ ទៀតក្រុមហ៊ុន ក៏មានគម្រោងសាងសង់ស្ថានីយ៍ទី៣ សម្រាប់ស្តុកទឹក នៅពេលខាងមុខទៀត ដើម្បីបង្កើនបរិមាណទឹកចែកចាយជូនប្រជាពលរដ្ឋ និងទីតាំងអាជីវកម្មនានា ក្នុងក្រុងព្រះសីហនុ និងបណ្តាស្រុកមួយចំនួន មានដូចជា៖ ស្រុកព្រៃនប់ និងស្រុកស្ទឹងហាវជាដើម ។
ងាកមក លោក ផន រតន: ប្រធានអង្គភាពរដ្ឋាករទឹក នៃមន្ទីរឧស្សាហកម្ម និងសិប្បកម្មខេត្តព្រះសីហនុ មានប្រសាសន៍ថា ក្នុងឆ្នាំ២០១៦ ក្រុមហ៊ុនផ្គត់ផ្គង់ទឹកស្អាតមកអង្គភាពរដ្ឋាករទឹកចំនួន ១៨.០០០ម៉ែត្រគីប, ២០១៧ ចំនួន ២៣.០០០ម៉ែត្រគីប និងបច្ចុប្បន្ន ៣០.០០០ម៉ែត្រគីបក្នុងមួយថ្ងៃ ក៏ប៉ុន្តែបរិមាណទឹក ដែលត្រូវប្រើប្រាស់ប្រចាំថ្ងៃមានរហូតដល់ ៥០.០០០ម៉ែត្រគីបក្នុងមួយថ្ងៃ។ ដូច្នេះក្នុងមួយម៉ោង រដ្ឋាករទឹកខេត្តព្រះសីហនុ ត្រូវការទឹកស្អាត ២.២០០ម៉ែត្រគីប ប៉ុន្តែក្រុមហ៊ុនបញ្ជូនទឹកមកឱ្យអង្គភាពរដ្ឋាករទឹកបានត្រឹមតែ ១.៤០០ម៉ែត្រគីប ក្នុងមួយម៉ោង តែប៉ុណ្ណោះ ដែលធ្វើឱ្យការផ្គត់ផ្គង់ទឹកស្អាត ជូនប្រជាពលរដ្ឋនៅតាមតំបន់មួយចំនួនមានការខ្វះខាតជាប្រចាំថ្ងៃ។
ត្រង់ចំណុចនេះ លោក គួច ចំរើន អភិបាលខេត្តព្រះសីហនុ មានប្រសាសន៍ថា រដ្ឋបាលខេត្ត បានរិះរកគ្រប់មធ្យាបាយ ដើម្បីដោះស្រាយកង្វល់ នៃការខ្វះទឹកស្អាតប្រើប្រាស់ប្រចាំថ្ងៃ ជូនប្រជាពលរដ្ឋរស់នៅ ក្នុងក្រុងព្រះសីហនុ ឲ្យបានគ្រប់ចំនួន ទោះបីជារដូវនេះ ជារដូវមានភ្លៀង ធ្លាក់មកក៏ដោយ ប៉ុន្តែតំបន់មួយចំនួន ក្នុងក្រុងព្រះសីហនុ នៅតែប្រឈម និងខ្វះខាតទឹកស្អាតប្រើប្រាស់ប្រចាំថ្ងៃ។ ហើយម្យ៉ាងដោយសារតែខេត្តព្រះសីហនុ ជាតំបន់ខ្ពង់រាប មានកន្លែងខ្ពស់ កន្លែងខ្លះមិនមានទឹកស្អាតប្រើប្រាស់គ្រប់គ្រាន់ប្រចាំថ្ងៃជូនប្រជាពលរដ្ឋទេ។
លោកអភិបាលខេត្តបន្តថា បញ្ហានេះ លោកបានជំរុញឱ្យក្រុមហ៊ុន អានកូ (វ៉ធើរសឹបផ្លាយ) បង្កើនសមត្ថភាពផលិតទឹកស្អាត ផ្តល់មកខាងអង្គភាពរដ្ឋាករទឹកខេត្តព្រះសីហនុឲ្យបានគ្រប់ចំនួន ប្រយោជន៍ដើម្បីអាចបន្តចែកចាយជូនប្រជាពលរដ្ឋ រស់នៅក្នុងក្រុងព្រះសីហនុ ប្រើប្រាស់ឱ្យបានគ្រប់គ្រាន់ ដើម្បីរួមគ្នាដោះស្រាយបញ្ហាប្រឈមនៅពេលបច្ចុប្បន្ន។
លោកថា ក្នុងរយ:ពេលពីរឆ្នាំចុងក្រោយនេះ ដោយសារតែកំណើនការអភិវឌ្ឍ ក្នុងក្រុងព្រះសីហនុ បានកើនឡើងយ៉ាងគំហុកនោះ គឺស្របគ្នានេះ កំណើននៃការប្រើប្រាស់ទឹកស្អាត ក៏មានការកើនឡើងផងដែរ ដែលទាមទាឱ្យក្រុមហ៊ុនបង្កើនការ ផលិត និងចែកចាយ ព្រមទាំងបន្ថែមអាងស្តុកទឹកឲ្យបានច្រើន ដើម្បីឆ្លើយតបទៅនឹងតម្រូវការប្រើប្រាស់ទឹកស្អាតនាពេលបច្ចុប្បន្ន និងទៅអនាគត។
ជាការឆ្លើយតប ខាងភាគីក្រុមហ៊ុន អានកូ (វ៉ធើរសឹបផ្លាយ) បានឯកភាពតាមការណែនាំ របស់អភិបាលខេត្តព្រះសីហនុ ដោតធានាបង្កើនការផលិតផ្គត់ផ្គង់ទឹកស្អាត ផ្តល់ជូនអង្គភាពរដ្ឋាករទឹក តាមតម្រូវការប្រើប្រាស់ របស់ប្រជាពលរដ្ឋរស់នៅក្នុងក្រុងព្រះសីហនុ ឲ្យបានគ្រប់តាមតម្រូវការប្រចាំថ្ងៃនាថ្ងៃខាងមុខ៕ ដោយ៖ ដែន សីមា
