ភ្នំពេញ៖ ជនជាតិចិនជាង១០០នាក់ ដែលត្រូវបានសមត្ថកិច្ចចាប់ខ្លួនកាលពីរសៀលថ្ងៃចន្ទ ទី៩ ខែកញ្ញា ឆ្នាំ ២០១៩ ស្ថិតអាគារពាណិជ្ជកម្ម SUNTOWN នៅសង្កាត់អូរបែកក្អម ខណ្ឌសែនសុខ រាជធានីភ្នំពេញ ដោយសង្ស័យថាពាក់ព័ន្ធករណីជំរិតតាមប្រព័ន្ធអ៊ីនធឺណេត ។ ពាក់ព័ន្ធករណីនេះ ក្រសួងការងារ បានសេចក្តីប្រកាសព័ត៌មាន ស្តីពីការឈប់ទទួលស្គាល់វិទ្យាស្ថានអ៊ិកសែលប៉ូលីធាន។
ក្រសួងការងារ និងបណ្តុះបណ្តាលវិជ្ជាជីវៈ បានប្រកាសឈប់ទទួលស្គាល់វិទ្យាស្ថាននេះ ដែលមានទីតាំងស្ថិតនៅអគារ SUN TOWN ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
ក្នុងសេចក្តីប្រកាសព័ត៌មានចុះថ្ងៃទី១០ ខែកញ្ញា ក្រសួងការងារបានជូនដំណឹងទៅសាធារណជន សិក្ខាកាម សិស្សនិស្សិត ដោយបញ្ជាក់ថា ក្រសួងសម្រេចឈប់ទទួលស្គាល់វិទ្យាស្ថានអ៊ិកសែលប៉ូលីធាន (EXCELPOLITAN INSTITUTE)។
ក្រសួងការងារបានសម្រេចបែបនេះ ដោយលើកឡើងថា វិទ្យាស្ថានមួយនេះ មិនអនុវត្តន៍តាមស្មារតីប្រកាសដែលក្រសួង បានអនុញ្ញាតឲ្យធ្វើការបណ្តុះបណ្តាល។
ក្រសួងការងារ និងបណ្តុះបណ្តាលវិជ្ជាជីវៈ បញ្ជាក់បន្ថែមថា រហូតមកដល់វិទ្យាស្ថាននោះ មិនទានបានធ្វើការបណ្តុះបណ្តាលនៅឡើយទេ។
ការប្រកាសរបស់ក្រសួងការងារឈប់ទទួលស្គាល់វិទ្យាស្ថាន EXCELPOLITAN នេះ ធ្វើឡើងបន្ទាប់ពីសមត្ថកិច្ចនគរបាលនៃនាយកដ្ឋានអន្តោប្រវេសន៍ ចាប់ខ្លួនជនជាតិចិន ១០៥នាក់នៅក្នុងអគារពាណិជ្ជកម្ម SUN TOWN កាលពីថ្ងៃទី៩ ខែកញ្ញា ដោយសង្ស័យថា ជាប់ពាក់ព័ន្ធនឹងសកម្មភាពចាប់ជំរិតមនុស្សតាមប្រព័ន្ធអ៊ីនធឺណិត (VOIP)។
លោកវរសេនីយ៍ទោ ជា ចិត្រា នាយការិយាល័យស៊ើបអង្កេត និងអនុវត្តនីតិវិធី ផែនការងារអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ក្នុងប្រតិបត្តិការខាងលើដឹកនាំដោយ ឧត្តមសេនីយ៍ទោ វឌ្ឍនៈ មង្គល ប្រធាននាយកដ្ឋានស៊ើបអង្កេត និងអនុវត្តនីតិវិធី លោក សេង ហៀង ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ នឹងលោក ផាន់ លីវ៉ា ក្រឡាបញ្ជី ត្រួតពិនិត្យ និងឃាត់ខ្លួនជនជាតិចិន ស្ថិតអគារពាណិជ្ជកម្ម SUNTOWN សង្កាត់អូរបែកក្អម ខណ្ឌសែនសុខ។
លោកនាយការិយាល័យស៊ើបអង្កេត និងអនុវត្តនីតិវិធី បានបន្តថា ក្នុងប្រតិបត្តិការខាងលើ បានពិនិត្យរកឃើញជនជាតិចិនសរុបចំនួន១០៥នាក់ (ស្រី១០នាក់) ពីបទស្នាក់នៅខុសច្បាប់ និងសង្ស័យប្រព្រឹត្តល្បែងប្រព័ន្ធអ៊ីនធើណិត (VOIP)។
ដកហូតវត្ថុតាងៈទូរស័ព្ទដៃចំនួន១៩១គ្រឿង, កុំព្យូទ័រយួរដៃ (laptop) ចំនួន៤គ្រឿង, Ipaid ២គ្រឿង, កាមេរ៉ាចំនួន២គ្រឿង, លិខិតឆ្លងដែនចំនួន៤៧ក្បាល, រថយន្ត១គ្រឿងម៉ាក LEXUS ផ្លាកលេខភ្នំពេញ2-J9168, MONITER ចំនួន៩៥គ្រឿង និងCASE ចំនួន៨០គ្រឿង (ចាស់)។
បច្ចុប្បន្នជនសង្ស័យខាងលើ បានបញ្ជូនទៅនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តនៃច្បាប់៕ដោយ៖កូឡាប
