ភ្នំពេញ៖ កាលពីយប់ថ្ងៃទី១១ ខែកញ្ញា ឆ្នាំ២០១៩ មានរឿងជម្លោះមួយនៅឯព្រលានយន្តហោះប្រទេសម៉ាឡេស៊ី ក្រោយមានបុរសម្នាក់មានគណនីហ្វេសប៊ុកឈ្មោះ Bun Hoeun Sanh បានថតវីដេអូបង្ហោះពីសកម្មភាពរបស់សិល្បករ សិល្បការិនី ដែលរាំច្រៀងលេង ពេលកំពុងរង់ចាំការហោះហើរបន្តទៅប្រទេសកូរ៉េ ដោយថែមទាំងមានការតិះដៀលថា ក្រុមសិល្បករ សិល្បការិនីទាំងនោះបង្កចលាចល រញ៉េរញ៉ៃ មិនខ្លាចមិនក្រែងចិត្តអ្នកដទៃ គ្មានសណ្តាប់ធ្នាប់ និងបានជេរដៀលថា “ពូជខ្មែរជាពូជមិនថ្លៃថ្នូរ” នៅក្នុងវីដេអូផងដែរ។ វីដេអូមួយឃ្លីបនេះ បានហោះពេញបណ្តាញសង្គមហ្វេសប៊ុក និងបណ្តាញសារព័ត៌មាន ហើយមហាជនមួយចំនួនធំ បានខំមិនរិះគន់ផងដែរ លើម្នាស់គណនីហ្វេសប៊ុកឈ្មោះ Bun Hoeun Sanh បានជេរដៀលថា ពូជខ្មែរជាពូជមិនថ្លៃថ្នូរ។
ពាក់ព័ន្ធនឹងករណីនេះ លោកឧកញ៉ា ហេង ឡុង នៅថ្ងៃទី១២ ខែកញ្ញានេះ បានសរសេរលើហ្វេសប៊ុកថា ពួកយើងជាជនរងគ្រោះ បានដាក់ពាក្យបណ្តឹងទៅក្រុមបង្កដែលបានលួចថតវីដេអូ ដោយគ្មានការអនុញ្ញាត និងជេរប្រមាជលើសិល្បករខ្មែរ នៅប៉ុស្តិ៍ប៉ូលិសនៅប្រទេសកូរ៉េរួចរាល់ហើយ។ ទន្ទឹមគ្នានេះដែរ មេធាវីយើងក៏កំពុងរៀបចំដាក់ពាក្យបណ្តឹងនៅប្រទេសខ្មែរដែរ ដើម្បីការពារតម្លៃខ្មែរទូទៅដែលត្រូវបានពួកនេះដៀលពូជ។
លោកហេង ឡុង បានបន្ថែមទៀតថា ក្រែងម៉ែឪលោកឯង បង្កើតលោកមក គាត់ជាខ្មែរដែរតើ? លោកថា យុត្តិធម៌ត្រូវតែមានដាំផ្លែអ្វី បានផ្លែហ្នឹង ច្បាប់នឹងការពារយើង។
រឿងមួយពិតជាល្បីខ្លាំងឬយ៉ាងណា បានជាផ្អើលដល់អ្នកនយោបាយជាច្រើនរូបក៏បានចូលខ្លួនមកបញ្ចេញមតិផងដែរ។ ក្នុងនោះ គឺលោកពេជ្រ ស្រស់ ប្រធានគណបក្សយុវជនកម្ពុជា នៅថ្ងៃទី១២ខែកញ្ញា បានសរសេរលើហ្វេសប៊ុកថា ហេតុអ្វីខ្មែរមួយចំនួន ចេះតែដៀលពូជសាសន៍ខ្លួនឯងដូច្នេះ ម្យ៉ាងវិញទៀតអ្នកដៀលនឹងគឺមិនមែនជាតិសាសន៍ដទៃឯណា ខ្លួនដៀលគេថាមិនថ្លៃ តែត្រង់អាខ្លួនឯងនឹងថតគេបណ្តើរដៀលគេបណ្តើរនេះមិនដឹងថាថ្លៃត្រង់ណាទេ ពោលគឺថោករកលេខដាក់គ្មានតែម្តង អាចនិយាយបានថា៖ កូនកើតពីផ្ទៃម្តាយតែមួយ ប៉ុន្តែដៀលសមាជិករួមផ្ទៃថា៖ ពូជនេះមិនថ្លៃថ្នូរសោះទាំងខ្លួនឯងនឹងក៏ជាអ្នករួមផ្ទៃជាមួយគេដែរ ។ នេះបានគេហៅថា ហែកសំពត់ឲ្យអ្នកក្រៅមើលងាយមាយាទ។ លោក បានបញ្ជាក់ថា តាមច្បាប់នៅកូរ៉េគឺជាប់។
នៅមុននេះបន្តិច ល្ងាចថ្ងៃទី ១២ ខែកញ្ញា ឆ្នាំ២០១៩នេះ លោក សុខសុវណ្ណ វឌ្ឍនាសាប៊ុង ប្រធានគណបក្សខ្មែរក្រោក និងជាសមាជិកឧត្តមក្រុមប្រឹក្សាពិគ្រោះ និងផ្ដល់យោបល់ បានលើកឡើងតាមរយៈផេកផ្លូវការរបស់លោកថា គួរតែមានច្បាប់ដាក់ទោស ចំពោះ ការជេរប្រមាថទាំងឡាយណាដែលប៉ះពាល់ដល់ ជាតិសាសន៍ និងកិត្យានុភាពជាតិ រួមទាំងអំពើទាំងឡាយណាដែលអាចធ្វើឲ្យប៉ះពាល់ដល់សេចក្ដីថ្លៃថ្នូរ វប្បធម៌ កិត្យានុភាពជាតិ និងជាតិសាសន៍ខ្មែរផងដែរ។
ការលើកឡើងបែបនេះក្រោយពេលផ្ទុះរឿងពលករចំណាកស្រុក និងក្រុមសិល្បករ ដែលកំពុងមានការជជែក និងឈានដល់ការប្ដឹងគ្នាទៀតផង។ ជាមួយគ្នានេះលោក ថានឹងពិចារណាចំណុចនេះ , ជារួម អ្នកដែលធ្វើអំពើណាជាហេតុនាំឲ្យប៉ះពាល់ដល់កិត្តិយសជាតិគួរមានទោស ឯអ្នកជេរប្រមាថរហូតដៀលដល់ជាតិសាសន៍របស់ខ្លួនក៏គួរមានទោស ព្រោះមានបុគ្គលខ្លះធ្វើទង្វើនាំភាពអាប់ឱនដល់វប្បធម៌ សាសនា សេចក្ដីថ្លៃថ្នូរ រួមទាំងកិត្យានុភាពជាតិ ហើយបុគ្គលផ្សេងទៀតទៅជេរបុគ្គលនោះ ដោយដៀលជាតិសាសន៍ទាំងមូល ជារួមគួរមានច្បាប់ព្រហ្មទណ្ឌដាក់ទោសតែម្ដង ។
ចំណែកលោកឆាយ ធី មេឃុំប៉ាតេ បានសរសេរថា អ្នកលួចថតមានចេតនាបង្ករឿង បុគ្គលអ្នករាំមិនបានបង្កឲ្យប៉ះពាល់ដល់អ្នកដទៃ បើអ្នករាំប្រព្រឹត្តខុសសមត្ថកិច្ចនៅព្រលានយន្តហោះជាអ្នកចាត់វិធានការ មិនមែនអ្នកថតហ្នឹង លួចថតហើយ ថែមទាំងបង្ហោះជាសាធារណៈ ។ នេះជាអំពើខុសច្បាប់ នេះមិនទាន់គិតពីបទជេរប្រមាថជាតិសាសន៍ខ្មែរ។
រីឯតារាសម្តែង សុភ័ណ្ឌ លីដា បានបញ្ចេញនូវទស្សនផ្ទាល់លើបណ្តាញសង្គមរបស់កញ្ញាថា ចំពោះខ្ញុំវិញគិតថាបើបងប្រុស ឡេង ណាវ៉ាត្រា នឹង បងប្រុស ហេង ឡុង វាអ្នកអែងក៏គាត់មិនខុសដែល តែនៅដាក់ទិចពេកផង បើវាដៀលពូជខ្មែរឡើងពេញមាត់នេះ: ហើយបើមិនទៅទើសគេមុន សុខៗក៏គេមិនទៅវាយអ្នកអែងទេ ព្រោះគេអ្នកសិល្បៈឲ្យគេទៅស្គាល់ទៅវាយអ្នកអែងម៉េច…??? មានតែអ្នកទេស្គាល់គេទើសគេ នេះមានទាំងvideo ទៀត ហើយអាអ្នកថតនឹង ខ្ញុំចង់ដឹងណាស់ ហ្សែនអ្នកអែងកើតចេញពីសត្វអីបានហា បានហ៊ានមកនិយាយពេញមាត់ហ្សែនខ្មែរ នឹង…? ហើយជួយបកប្រែទិចមក ហ្សែនខ្មែរនឹងម៉េច….? ខ្ញុំគិតថាខ្មែរមិនអាក្រក់ទេ តែបើខ្មែរអាក្រក់ខ្លាំង ព្រោះតែខ្មែរមានអាប្រភេទហ្សែនមនុស្សដូចអស់អ្នកអែងនឹង សិល្បៈខ្មែរមិនរីកចម្រើន ក៏ព្រោះតែមនុស្សដូចអ្នកអែងនឹងហើយ។
រឿងនេះផ្អើលដល់លោកខឹម វាសនា ដែលជាប្រធានគណបក្សសម្ព័ន្ធដើម្បីប្រជាធិបតេយ្យ បានចេញសាវែងអន្លាយបកស្រាយជំនួសយុវជននោះថា ទីមួយ គេចោទថាដៀលខ្មែរទាំងអស់។ ពាក្យថាខ្មែរគឺសំដៅខ្មែរលើសពី៥០%ឡើងទៅ ឬខ្មែរទូទៅ តែមិនមែនខ្មែរទាំងអស់ទេ។ បញ្ហាខ្លាំងណាស់ដែលមនុស្សមិនយល់ន័យពិតនៃការប្រើភាសាខ្មែរ ហើយតាំងខ្លួនជាអ្នកការពារខែ្មរដោយយកមុខ និងដើម្បីលាងគំនុំនឹងក្រុមណាមួយ ដោយមួលចេតនារបស់អ្នកស្មោះត្រង់ដែលប្រើពាក្យខ្មែរនេះ។
ការទទួលយកការពិតដែលជាចំណុចមិនល្អ មិនត្រឹមត្រូវរបស់ខ្លួន ជាចំណុចចាប់ផ្តើមនៃការអភិវឌ្ឍទៅរកភាពប្រសើរ។
ទីពីរ បើមិនពេញចិត្តអ្នករាំនៅព្រលានយន្តហោះ ម្តេចមិនដៀលតែអ្នករាំនៅព្រលានយន្តហោះហ្នុងទៅ ម្តេចមកដៀលខ្មែរទាំងអស់ធ្វើអី? ចិត្តអ្នកដៀលមិនមែនចង់ដៀលតែខ្មែរដែលរាំនៅតាមព្រលានយន្តហោះនោះទេ ហើយក៏មិនមែនដៀលខ្មែរទាំងអស់នោះដែរ គឺចិត្តគេចង់ដៀលខ្មែរទូទៅ លើសពី៥០%ឡើងទៅដែលមានចរិត មិនថ្លៃថ្នូរបែបហ្នឹង។
ទីបី គេចោទថា អ្នកថតហ្នឹង លួចថតគេក្នុងទីសាធារណ:ដោយមិនបានសុំការអនុញ្ញាត ហើយចោទថាជារឿងខុសច្បាប់។ សួរថាតើអ្នកចោទគេថាខុសច្បាប់ហ្នឹង តើអ្នកមានបានដឹងពីច្បាប់នៅម៉ាឡេស៊ី ស្តីពីការថតរូបរបស់គេ ក្នុងទីសាធារណ:អត់? តើថតរូបមនុស្សប្រព្រឹត្តខុសឆ្គងនៅទីសាធារណៈជារឿងខុសច្បាប់ឬ? ហើយរឿងកើតនៅម៉ាឡេស៊ី បើចង់ប្តឹង ត្រូវប្តឹងនៅម៉ាឡេស៊ី។ ឥឡូវ កុំទាន់និយាយដល់រឿងខុសច្បាប់ ឬអត់ ក្នុងមនសិការជាមនុស្ស បើអ្នកបានឃើញទង្វើណាមួយខុសឆ្គង មិនសមរម្យ មិនត្រឹមត្រូវ ហើយអ្នកថតទុក ឬក៏ផុសឲ្យគេដឹង សួរថាតើវាត្រឹមត្រូវដែរឬទេ? ហើយបើអ្នកចាំសុំការអនុញ្ញាតថត ពីមនុស្សដែលកំពុងរឿងធ្វើខុសនោះ តើមានវីដេអូពីមនុស្សខូច មនុស្សអាក្រក់ឯណា ឲ្យបងប្អូនបានឃើញតាមប្រព័ន្ធផ្សព្វផ្សាយដូចសព្វថ្ងៃនេះ??។
លុះនៅព្រឹកថ្ងៃបន្ទាប់ម្ចាស់គណនីហ្វេសប៊ុកដដែល បានបង្ហោះសារភ្ជាប់ជាមួយនឹងរូបភាពយ៉ាងដូច្នេះថា ៖ “ព្រឹកមិញ នៅព្រលានយន្តហោះប្រទេសកូរ៉េ តារានិងឧកញ៉ាមួយក្រុម បានមករករឿងយើង ហើយលោកឧកញ៉ាម្នាក់នេះលោតមកវាយយើង។ បន្តិចទៀត ខ្ញុំនឹងបញ្ចេញវីដេអូនេះ”។ ប៉ុន្តែមុនការបង្ហោះបញ្ហានេះ បុរសខាងលើបានបង្ហោះវីដេអូ ដែលខ្លួនបានថតក្រុមអ្នកសិល្បៈថែមទាំងបានប្រើប្រាសពាក្យសម្តីធ្ងន់ៗជាច្រើន ដូចជាពាក្យដៀលថា “ពូជខ្មែរជាពូជមិនថ្លៃថ្នូរ” នៅក្នុងវីដេអូផងដែរ តែពេលនេះវីដេអូនោះត្រូវបានបុរសម្ចាស់គណនីលុបចោលបាត់ហើយ យ៉ាងណាក៏នៅមានគេទាយយកវីដេអូនោះមកទុក និងចែករំលែកតគ្នាពេញបណ្តាញនៅឡើយ។
ទោះយ៉ាងណា ម្ចាស់គណនីហ្វេសប៊ុកដដែល នៅយប់ថ្ងៃទី១២កញ្ញានេះ ក៏បានចេញឃ្លីបវីដេអូមួយឆ្លើយតបទៅភាគីម្ខាងទៀត ដោយបានអះអាងថាខ្លួនមិនបានខុសនោះទេ ព្រោះថាខ្លួនថតនៅទីសាធារណៈ ហើយក៏មិនបានលួចថតវីដេអូដែរ។ យុវជនម្ចាស់វីដេអូនោះ បានហៅក្រុមសិល្បៈទាំងនោះថា ជាក្រុមពាលាអាវ៉ាសែ ច្រៀងរាំគ្មានសណ្តាប់ធ្នាប់។ ម្ចាស់គណនីហ្វេសប៊ុកនោះ បាននិយាយថា បើសិនគេប្តឹង ខ្ញុំក៏សុខចិត្តចាញ់ដែរ ហើយខ្ញុំបង់លុយ និងសុំទៅគឺចប់ហើយ ប៉ុន្តែការសុំទោសនោះគឺចេញតែពីមាត់ប៉ុណ្ណោះ មិនចេញពីក្នុងចិត្តទេ ។
ម្ចាស់ផេក Bun Hoeun Sanh បានសរសេរថា តាំងព្រឹកមិញម្ល៉េះ គេមកគម្រាមផង សុំសម្រួលផង ចង់ប្រើអំពើហឹង្សាផង សុំទោសផង ខ្ញុំក៏បានដាក់Only meទៅ ព្រោះចង់បញ្ចប់រឿង។ ប៉ុន្តែឥរិយាបទរបស់ពួកគេ មិនមែនសុំសម្រួលទេ គេសរសេរប្តឹងអញ្ចេះអញ្ចុះ អញ្ចឹងខ្ញុំដាក់Publicវិញ។ យប់បន្តិចខ្ញុំសរសេរលំអិតបកស្រាយ សូមFanFanផ្កាប់មុខទាំងអស់ ជួយLike Share អោយIdolខ្លួនឃើញផង។
យោងតាមរយៈម្ចាស់គណនី ហ្វេសប៊ុកខាងលើ ដដែលបានបង្ហាញទិដ្ឋភាពវីដេអូហើយ ដោយនៅក្នុងនោះម្ចាស់គណនីរូបនេះ បានសរសេរយ៉ាងដូច្នេះថា៖”(ពីព្រលានយន្តហោះកូរ៉េ ពេលព្រឹក) តាមជើងយន្តហោះជាមួយគ្នា ខ្ញុំ និងក្រុមការងារបានចេញដំណើរពីព្រលានយន្តហោះភ្នំពេញ ទៅព្រលានយន្តម៉ាឡេស៊ី (កូឡាឡាំពួ) រួចបន្តដំណើរតាមជើងយន្តហោះម៉ាឡេស៊ី ទៅកាន់ប្រទេសកូរ៉េ ដូចទៅនឹងក្រុមតារាមួយក្រុម រួមទាំងឧកញ៉ាម្នាក់ផងដែរដែលនៅក្នុងក្រុមជាមួយតារានោះ។ មកដល់ព្រលានយន្តហោះម៉ាឡេ ខ្ញុំនឹងក្រុមការងារ ដើរយ៉ាងស្ងៀមស្ងាត់ និងមានរបៀបរបប ចំណែកក្រុមតារា និងឧកញ្ញានោះ ដើរបណ្តើរ ចាក់បាស់រាំបណ្តើរ មិនថាក្រៅជណ្តើរយន្ត លើជណ្តើរយន្ត ក្នុងព្រលានយន្តម៉ាឡេស៊ី ចាក់បាស់តម្លង់ និងរាំមិនចេះខ្មាសគេ មិនគោរពដល់ភ្ញៀវដទៃទៀត។ វីដេអូដែលខ្ញុំថតបាន រួចបានបង្ហោះកាលពីយប់មិញ គឺក្រុមតារានោះ ចាក់បាស់រាំច្រៀង នៅកន្លែងផ្លូវដើរ និងជាកន្លែងដែលគេសម្រាក រង់ចាំស្តាប់ដំណឹងពីការប្រកាសរបស់មន្ត្រីធ្វើការក្នុងព្រលាន។
សកម្មភាពរាំច្រៀង តួយ៉ាងនៅកន្លែងព្រលានយន្តហោះ ជាសកម្មភាពអសីលធម៌ មិនចេះខ្លាចចិត្តអ្នកដទៃដែលគេចង់សម្រាកបន្ទាប់ ពីហត់ នឿយក្រោយចុះពីយន្តហោះ ម្យ៉ាងទៀតវាបានទាញតម្លៃជនជាតិខ្មែរឱ្យធ្លាក់ចុះ តាមរយៈសកម្មភាពអសីលធម៌របស់តារាទាំងនោះ រួមទាំងលោកឧកញ្ញានោះផងដែលរាំប្រកាច់ប្រកិនពេញផ្លូវដើរ។
វីដេអូខាងក្រោមនេះ ខ្ញុំមិនបកស្រាយទៀតទេ ចុចមើលទៅ តែខ្ញុំគ្រាន់តែចង់ប្រាប់ថា ពួកគេដូចជាដាក់ម៉ូគ្នាអញ្ចឹង ឡេង ណាវ៉ាត់ត្រា ចូលមករកវាយខ្ញុំ គ្នាវានៅក្បែរខ្ញុំចាប់កញ្ឆក់ទូរសព្ទដៃរបស់ខ្ញុំបិទចោល ក្នុងបំណងមិនចង់ឱ្យខ្ញុំថតជាប់សកម្មភាព វាលោតមកវាយខ្ញុំ។ ក្នុងវីដេនេះ ខ្ញុំបានកាត់តដូរប្លង់ពី Camera សមាជិកខ្ញុំ ត្រង់កន្លែង ឡេង ណាវ៉ាត់ត្រា វាលោតមកវាយ ហើយគ្នាវាកញ្ឆក់ទូរស័ព្ទខ្ញុំបិទចោល ។
ហ្វេសប៊ុក Ratana EN បានរៀបរាប់ថា យើងថាបោះបាយបិណ្ឌមិនល្អ គេថាគេជាខ្មែរស្រឡាញ់ប្រពៃណីណាស់។ គេចាក់ចម្រៀងច្រៀងរាំកណ្តាលព្រលានយន្តហោះនៅស្រុកគេអាឡេអាឡូ យើងជួយប្រាប់ថានោះជាប្រពៃណីមិនល្អទេ វាប៉ះពាល់ដែលខ្មែរដទៃទៀត គេថាកុំពូកែទើសពេក គេត្រូវការសប្បាយ។ ហើយចុងក្រោយគេយំបោកខ្លួនថាគេជាជនរងគ្រោះ រួចប្តឹងយើងដោយចេតនាអាក្រក់ជួជាតិ គឺគេចង់រុញយើងឲ្យស្លាប់ក្រោមពាក្យថាមើលងាយសាសន៍ខ្មែរទៀត។
ឱ! ពាក្យថាជប៉ុនជាជនជាតិល្អ តើអ្នកគិតថាគ្មានជនជាតិជប៉ុនណាមួយជាចោរ ឬគ្មានម៉ាហ្វីយ៉ាជប៉ុនឬយ៉ាងម៉េច? មិនមែនដូច្នោះទេលោកខ្មែរ នោះគេគ្រាន់តែសម្គាល់បានថា យ៉ាងហោចណាស់ក៏មានពលរដ្ឋជប៉ុន លើសពីពាក់កណ្តាលដែរដែលល្អ តែប៉ុណ្ណឹងទេតើ!
ដូច្នេះតើគេប្រុងរុញយើងឲ្យស្លាប់ដោយថាយើងមើលងាយសាសន៍ខ្មែរ នោះវាជាចេតនាអ្វី?
ងាកមើលលោកខ្មែរខ្លះ ចេញមកដឹងតែស្អប់ពួក LDP យកតែម្តង ដោយមិនមើលហេតុមិនមើលផលឲ្យគ្រប់ជ្រុងជ្រោយ មិនពិចារណាថ្លឹងថ្លែង និងមើលថាទំនងឬមិនទំនងទេអី? អីក៏អគតិលើ LDP ម្ល៉េះលោក? អូហ៍! ឬមួយហេតុតែស្អប់យួនពេក ទោះបីយួនប្រាប់ថា នែ៎! ខំរៀនសូត្រ ខំធ្វើការ កុំរវល់តែច្រៀងរាំពេកប្រយ័ត្នអញយកដីអស់ អីចឹងលោកខ្មែរសុខចិត្តអស់ដី មិនខ្ចីធ្វើតាម ទោះដឹងថាយួននិយាយត្រូវក៏ដោយឬ? ហ្នឹងឬជនជាតិថ្លៃថ្នូរ?
ព្រមទទួលថាខ្លួនអន់ជាច្រកតែមួយគត់សម្រាប់អភិវឌ្ឍន៍ខ្លួន។ អួត អឿ ជឿ ជោរ ល្ងង់ធ្វើចេះ នាំឲ្យខ្លួនអត់កំណើត៕ ដោយ៖កូឡាប