ភ្នំពេញ៖ លោកឧបនាយករដ្ឋមន្ត្រី ជា សុផារ៉ា បានបញ្ជាក់ថា លោកតែងតែទទួលការណែនាំពី សម្ដេចតេជោនាយករដ្ឋមន្ត្រី ដើម្បីកំណត់ទិសក្នុងការគាំទ្រដល់វិស័យឯកជន ព្រោះថាការវិនិយោគទាំងអស់ដែលមានលក្ខណៈរឹងមាំ ។ចំណែលអ្នកឧកញ៉ាគិត ម៉េង ក៏បានស្នើទៅ សម្តេចតេជោនាយករដ្ឋមន្ត្រី ដើម្បីបង្កើតក្រុមការងារពិភាក្សាពីបញ្ហាសំណង់។
លោកឧបនាយករដ្ឋមន្ត្រីជាសុផារ៉ារដ្ឋមន្ត្រីក្រសួងរៀបចំដែនដីនគរូបនីយកម្មនិងសំណង់បានហើយបើកកិច្ចប្រជុំជាមួយប្រតិភូសភាពាណិជ្ជកម្មកម្ពុជានាព្រឹកថ្ងៃទី១២ ខែកញ្ញា ឆ្នាំ ២០១៩។
នៅក្នុងកិច្ចប្រជុំនេះអ្នកឧកញ៉ាគិតម៉េងប្រធានសភាពាណិជ្ជកម្មកម្ពុជាបានលើកឡើងថា កន្លងមកនេះសភាពាណិជ្ជកម្មកម្ពុជាមានក្រុមការងារទាំង១០ ដើម្បីដោះស្រាយការងារពាក់ព័ន្ធជាមួយក្រសួងរៀបចំដែនដីនគរូបនីយកម្មនិងសំណង់ ក្រសួងសេដ្ឋកិច្ចនិងហិរញ្ញវត្ថុ អគ្គនាយកដ្ឋានពន្ធដារ ក្រសួងកសិកម្ម ពាណិជ្ជកម្មជាដើម។ សភាពាណិជ្ជកម្មសង្កេតឃើញថា ក្រោមការដឹកនាំរបស់ប្រមុខរាជរដ្ឋាភិបាល គឺមានការរីកចម្រើនលើគ្រប់វិស័យ ក្នុងនោះវិស័យអប់រំមានការកើនឡើងទាំងសាលាបរទេស ឯកជន និងរដ្ឋ រីឯកវិស័យសុខាភិបាល គឺមានការកើនឡើងនៅមន្ទីរពេទ្យឯកជន និងរដ្ឋ រីឯវិស័យសំណង់ឃើញមានការរីកចម្រើនយ៉ាងខ្លាំង ដូច្នេះអ្នកឧកញ៉ាក៏បានស្នើទៅ សម្តេចតេជោនាយករដ្ឋមន្ត្រី ដើម្បីបង្កើតក្រុមការងារពិភាក្សាពីបញ្ហាសំណង់នេះ។ អ្នកឧកញ៉ា គិត ម៉េង បញ្ជាក់ថានេះជាព្រឹត្តិការណ៍មួយដើម្បីសន្ទនាគ្នាសំដៅទទួលបានផលប្រយោជន៍ទាំងអស់គ្នា។
ជាមួយនេះលោកឧកញ៉ា លីហួរ បានឱ្យដឹងថានេះជាលើកទីមួយហើយដែលក្រុមការងារវិស័យសំណង់ និងអចលនទ្រព្យ វិស័យឯកជន និងមន្ត្រីរាជការបានជួបប្រជុំគ្នា។ ក្នុងកិច្ចប្រជុំនេះមានរបៀបវារៈចំនួន ៥ ចំណុចដែលស្នើឡើងដោយវិស័យឯកជននិងបញ្ហាផ្សេងទៀត។ របៀបវារៈទាំង ៥ នេះមានបញ្ហាភាពយឺតយ៉ាវក្នុងវិស័យសំណង់ និងអចលនទ្រព្យជាពិសេសនៅខេត្តព្រះសីហនុ ការបាត់ជំនឿទុកចិត្តរបស់អតិថិជនចំពោះគុណភាពសំណង់អគារនានាការបាត់បង់កន្លែងរំដោះ និងបង្ហូរប្រព័ន្ធទឹកលូកខ្វក់ បញ្ហាការស្នើសុំលិខិតអនុញ្ញាតសាងសង់មានរយៈពេលយូររហូតដល់ ៦១២ ឡើងដែរបញ្ហានេះធ្វើឱ្យប៉ះពាល់យ៉ាងខ្លាំងដល់ការស្នើសុំអាជ្ញាបណ្ណនៅ ក្រសួងសេដ្ឋកិច្ច និងហិរញ្ញវត្ថុ ព្រមទាំងការប្រើប្រាស់ស្តង់ដារ និងការបញ្ជាក់អំពីគុណភាពសំណង់។
ក្នុងឱកាសនេះ លោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានចាត់ទុកថាប្រតិភូសភាពាណិជ្ជកម្ម និងវិស័យឯកជន ទាំងអស់ជាដៃគូដ៏មានសារសំខាន់ជាមួយក្រសួងរៀបចំដែនដី នគរូបនីយកម្ម និងសំណង់។ លោកឧបនាយករដ្ឋមន្ត្រីបានបញ្ជាក់ថាលោកតែងតែទទួលការណែនាំពី សម្ដេចតេជោនាយករដ្ឋមន្ត្រី ដើម្បីកំណត់ទិសក្នុងការគាំទ្រដល់វិស័យឯកជន។ ម្យ៉ាងទៀតការវិនិយោគទាំងអស់ដែលមានលក្ខណៈរឹងមាំ គឺមានការវិនិយោគដែលកើតចេញពី ការខិតខំប្រឹងប្រែងរបស់ប្រតិភូទាំងអស់ដែលជាកិច្ចការ ជាអ្នកផ្ដួចផ្ដើម ជាអ្នកស្គាល់ការពិតអំពីកត្តាប្រវត្តិសាស្ត្រ ស្គាល់នូវអ្វីដែលជាជីវភាពប្រក្រតីរបស់ប្រជាពលរដ្ឋ និងតម្រូវការជាក់ស្ដែង ដែលទាំងអស់នេះសុទ្ធតែជាស្ថាបនិក ជាដៃគូរវាងរដ្ឋាភិបាល និងវិស័យឯកជន។ ក្នុងនាម ក្រសួងរៀបចំដែនដី នគរូបនីយកម្ម និងសំណង់ និងសាការីទាំងអស់ លោកឧបនាយករដ្ឋមន្ត្រី ជា សុផារ៉ា បានបង្ហាញពីក្ដីរីករាយក្នុងការពិភាក្សាគ្នាជាមួយប្រតិភូសភាពាណិជ្ជកម្មនិងវិស័យឯកជន នៅគ្រប់ករណី និងគ្រប់របៀបវារៈដែលបានស្នើឡើងដោយហើយក្នុងករណីដែលការពិភាក្សាគ្នានាពេលនេះមិនទាន់បានជោគជ័យ ឬមិនទាន់ដាច់សាច់នោះយើងនឹងបន្តពិភាក្សាក្នុងកិច្ចប្រជុំដាច់ដោយឡែកផ្សេងទៀតរហូតទទួលបានជោគជ័យគ្រប់ជ្រុងជ្រោយ៕ ដោយ ៖ កូឡាប
