កណ្តាល៖ ក្រសួងសាធារណការនិងដឹកជញ្ជូន នៅព្រឹកថ្ងៃទី 13 ខែកញ្ញានេះ បានចេញសេចក្ដីជូនដំណឹងស្ដីពី ការបិទចរាចរណ៍នាវា ជលយាន ជលយានយន្តគ្រប់ប្រភេទតាមផ្លូវទឹកទន្លេមេគង្គ ចំណុចស្ពានព្រែកតាមាក់ ស្ថិតក្នុងស្រុកខ្សាច់កណ្ដាល និងស្រុកមុខកំពូល ខេត្តកណ្ដាល។
ក្រសួងសាធារណការបានបញ្ជាក់បន្ថែមទៀតថា ផ្អាកជាបណ្ដោះអាសន្ន ចាប់ពីម៉ោង ៦:០០នាទីព្រឹក ថ្ងៃទី១៣ កញ្ញា ឆ្នាំ២០១៩ រហូតដល់មានសេចក្ដីជូនដំណឹងជាថ្មី។
មន្ទីរសាធារណការ និងដឹកជញ្ជូនខេត្តកណ្តាល មានកិត្តិយសសូមជម្រាបជូនដំណឹងដល់ ឯកឧត្តម លោកជំទាវ លោក លោកស្រី សាធារណជន សហគ្រាសសាធារណៈ ក្រុមហ៊ុន ម្ចាស់អាជីវកម្ម ដឹកជញ្ជូន មេត្តាជ្រាបថា៖ ដោយហេតុថា សាឡង់ដឹកខ្សាច់ជាប់គាំងនៅស្ពានព្រែកតាមាក់ ហើយក្រុមការងារបច្ចេកទេស កំពុងធ្វើការជួយសង្គ្រោះ ដូចនេះ មន្ទីរសាធារណការ
និងដឹកជញ្ជូនខេត្តកណ្តាល សូមធ្វើការផ្អាកចរាចរណ៍ តាមផ្លូវទឹកទន្លេមេគង្គ ស្ថិតក្នុងស្រុកកំពូល ជាបណ្តោះអាសន្នពីម៉ោង ៦:០០n ព្រឹក ថ្ងៃទី ១៣ ខែកញ្ញា ឆ្នាំ ២០១៩ រហូតដល់មានសេចក្តីជូនដំណឹងជាថ្មី ។
ប្រតិបត្តិការទាញយកសាឡង់ដឹកខ្សាច់មួយគ្រឿង ដែលបើកបុកសសរស្ពានព្រែកតាមាក់ បានបន្តឈានដល់ថ្ងៃទី៦ហើយ។
នៅថ្ងៃទី១៣ ខែកញ្ញា ឆ្នាំ២០១៩ លោកទេសរដ្ឋមន្ដ្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានបន្តដឹកនាំក្រុម ការងារបច្ចេកទេសក្រសួង និងភាគីពាក់ព័ន្ធ អញ្ជើញចុះពិនិត្យមើលការទាញយកចេញនូវសាឡង់ដឹក ខ្សាច់មួយគ្រឿងដែលបុកសសរស្ពានព្រែកតាមាក់ ដោយមានការចូលរួមពីថ្នាក់ដឹកនាំ ក្រសួង មន្ដ្រីបច្ចេកទេស អាជ្ញាធរមូលដ្ឋាន និងភាគីពាក់ព័ន្ធផងដែរ។
សូមជម្រាបជូនថា៖ កាលពីថ្ងៃអាទិត្យ ទី៨ ខែកញ្ញា ឆ្នាំ២០១៩ វេលាម៉ោងប្រមាណ ១៣ និង៣០នាទី រសៀល នៅចំណុចភូមិសាស្រ្ត ស្រុកមុខកំពូល ខេត្តកណ្តាល មានករណីសាឡង់ដឹកខ្សាច់មួយគ្រឿង បើកបរដោយឈ្មោះ ភា រម្យ ភេទប្រុស អាយុ៣៩ឆ្នាំ រួមដំណើរដោយប្រពន្ធ និងកូនធ្វើដំណើរតាមបណ្តោយខ្សែទឹកពីត្បូងទៅជើង បានបើកបុកសសរស្ពានទី៣ នៃស្ពានព្រែកតាមាក់ ទើរជាប់នឹងសសរ (ស្ថិតនៅចន្លោះសសរស្ពានសម្រាប់ធ្វើនាវាចរណ៍) ដោយសារបើកគេចពីនាវាទេសចរណ៍មួយគ្រឿងទៀត មានផ្ទុកមនុស្សច្រើនបើកបញ្ជ្រាសទិសគ្នាពីត្បូងទៅជើង ហើយត្រូវបានជួយសង្គ្រោះ ដោយទូកនេសាទរបស់បងប្អូនខ្មែរឥស្លាម។
បន្ទាប់ពីមានឧប្បត្តិហេតុនេះកើតឡើង ក្រុមការងារបច្ចេកទេសជួយសង្គ្រោះ របស់ក្រសួងរួមជាមួយ នឹងអាជ្ញាធរខេត្តកណ្តាល និងកំពង់ផែស្វយ័តភ្នំពេញ បានប្រជុំពិភាក្សារិះរកមធ្យោបាយ ដើម្បីទាញរំដោះយកសាឡង់នោះចេញ ពីជើងសសរស្ពាន ដោយប្រើនាវាសណ្តោង៣គ្រឿងក្នុងនោះ៖ នាវាកំពង់ផែស្វយ័តភ្នំពេញចំនួន២គ្រឿង និងនាវាក្រុមហ៊ុនSovereign ចំនួនមួយគ្រឿង រួមជាមួយនាវាបូមខ្សាច់មួយគ្រឿងទៀត ដើម្បីសម្រាលបន្ទុកនាវា ប៉ុន្តែដោយសារសាឡង់ដឹកខ្សាច់នោះ មានទម្ងន់ធ្ងន់ពេក រួមជាមួយនឹង កម្លាំងទឹកហូរគួចខ្លាំង និងស្ថានភាពមិនអំណោយផលផង ក្រុមប្រតិបត្តិការជួយសង្គ្រោះ មិនអាចទាញរំដោះយកសាឡង់ដឹកខ្សាច់នោះចេញបានទេ ហើយប្រតិបត្តិការនេះនៅបន្តឈាន ដល់ថ្ងៃនេះបន្តទៀត។
សាឡង់ដឹកខ្សាច់នោះពាក់ផ្លាកលេខ ភព៦. ៨២៦៣ សម្បកដែក ម៉ាស៊ីនម៉ាក Mitsubishi មានបណ្តោយ ប្រវែង៤៣,៣០ម៉ែត្រ ទទឹង៨,០៥ ម៉ែត្រ ជម្រៅផ្ទុកខ្សាច់ពេញ ២,៥០ម៉ែត្រ តាមការប៉ាន់ស្មានមានទម្ងន់ សរុបប្រហែល៨០០តោន ជាកម្មសិទ្ធិរបស់ក្រុមហ៊ុន ង៉ូវ ចាន់ណា បានចុះបញ្ជីការនៅក្រសួងសាធារណការ និងដឹកជញ្ជូននៅ ថ្ងៃទី១០ ខែតុលា ឆ្នាំ២០១០៕ដោយ៖កូឡាប