តៃវ៉ាន់ បានធ្វើការព្រមានដល់ប្រជាជនខ្លួន កុំឲ្យធ្វើដំណើរទៅកាន់ទីក្រុងហុងកុង ឬចិន ដោយបញ្ជាក់ថា ស្ថានភាពកំពុងតែអាក្រក់ខ្លាំង។ ការព្រមានរបស់គណបក្សដឹកនាំតៃវ៉ាន់ បានធ្វើឡើង ក្រោយពេលអ្នកជំនួញតៃវ៉ាន់ម្នាក់ត្រូវបានឃុំខ្លួន បន្ទាប់ពីបានធ្វើដំណើរទៅគាំទ្រការតវ៉ាក្នុងទីក្រុងហុងកុង មុនពេលធ្វើដំណើរទៅចិន។
អ្នកជំនួញតៃវ៉ាន់ម្នាក់នោះមានឈ្មោះថា Lee Meng-chu អាយុ ៤៣ឆ្នាំ។ គាត់បានបាត់ខ្លួនក្រោយពេលឆ្លងព្រំដែន ចូលចិនពីហុងកុង នៅថ្ងៃទី ១៩ ខែសីហាកន្លងទៅ។ គាត់ត្រូវបានមិត្តភក្តិរាយការណ៍ថាបាត់ខ្លួន។ មិត្តភក្តិរបស់គាត់បានថ្លែងថា លោក Lee Meng-chu បានចូលរួមការតវ៉ានៅហុងកុង មុនពេលធ្វើដំណើរឆ្លងដែនចូលទៅចិន។
កាលពីថ្ងៃពុធកន្លងទៅនេះ អ្នកនាំពាក្យសម្រាប់ការិយាល័យកិច្ចការតៃវ៉ាន់ របស់ចិន បានបញ្ជាក់ថា លោក Lee Meng-chu កំពុងត្រូវបានអាជ្ញាធរចិនសួរចម្លើយ ទាក់ទងនឹងសកម្មភាពឧក្រិដ្ឋ ដែលនាំឲ្យប៉ះពាល់ដល់សន្តិសុខរបស់ចិន។
ចំណែក លោក Hsueh Cheng-yi អ្នកនាំពាក្យរបស់គណបក្សរីកចម្រើនប្រជាធិបតេយ្យ (DPP) ដែលដឹកនាំតៃវ៉ាន់ បាននិយាយថា ការឃុំខ្លួនពលរដ្ឋតៃវ៉ាន់បានធ្វើឲ្យមានការភ័យខ្លាំង ចំពោះសុវត្ថិភាពអ្នកធ្វើដំណើរទៅកាន់ហុងកុង ឬចិន។
លោកថ្លែងក្នុងសេចក្តីប្រកាសថា ”ស្ថានភាពនៅហុងកុង និងចិនកំពុងតែអាក្រក់ ដូច្នេះរាល់ការធ្វើដំណើរទៅកាន់ទីនោះ គួរតែកាត់បន្ថយ។ ប្រសិនជាអ្នកត្រូវតែធ្វើដំណើរទៅកាន់ទីនោះ អ្នកត្រូវតែយកចិត្តទុកដាក់ខ្ពស់ចំពោះសុវត្ថិភាពផ្ទាល់ខ្លួន និងប្រាប់មិត្តភក្តិ និងសាច់ញាតិពីកន្លែងរបស់អ្នក”។
សូមបញ្ជាក់ថា តៃវ៉ាន់គឺជាដែនដីដែលមានប្រព័ន្ធដឹកនាំរបស់ខ្លួន ដែលបានប្រែក្លាយពីការដឹកនាំដោយគណបក្សតែមួយ ទៅជាប្រជាធិបតេយ្យ។ ចិនតែងតែចាត់ទុកតៃវ៉ាន់ គឺជាផ្នែកមួយនៃទឹកដីរបស់ខ្លួន ហើយនឹងបានគំរាមច្រើនលើកច្រើនសារថា នឹងធ្វើការរួបរួមជាមួយនឹងតៃវ៉ាន់នៅថ្ងៃណាមួយ ដោយប្រើប្រាស់កម្លាំងយោធាវាយយក៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
