មនុស្សយ៉ាងហោចណាស់ចំនួន ៥០នាក់បានស្លាប់ និងជាច្រើននាក់ទៀតរងរបួស ក្រោយពេលរថភ្លើងមួយគ្រឿងបានរត់ធ្លាក់ផ្លូវ នៅក្នុងប្រទេសកុងហ្គោ។ នេះបើតាមការបញ្ជាក់របស់រដ្ឋមន្រ្តីកិច្ចការមនុស្សធម៌របស់ប្រទេសនេះប្រាប់ CNN។
លោករដ្ឋមន្រ្តីខាងលើឈ្មោះ Steve Mbikayi បាននិយាយថា គ្រោះអកុសលនោះបានកើតឡើងនៅម៉ោង ៣ព្រឹកថ្ងៃព្រហស្បតិ៍ម្សិលមិញនេះ ស្ថិតក្នុងទីក្រុង Mayibaridi ភាគអាគ្នេយ៍នៃខេត្ត Tanganyika។
មូលហេតុដែលបណ្តាលឲ្យរថភ្លើងរត់ធ្លាក់ផ្លូវ គេនៅមិនទាន់បានដឹងច្បាស់នៅឡើយទេ។
សូមបញ្ជាក់ថា គ្រោះថ្នាក់ទាក់ទងនឹងរថភ្លើង តែងកើតមានជាញឹកញាប់ក្នុងប្រទេសកុងហ្គោ។
កាលពីខែមីនាកន្លងទៅ មនុស្សចំនួន ២៤នាក់ ដែលភាគច្រើនជាកុមារ បានស្លាប់បាត់បង់ជីវិត ក្រោយពេលរថភ្លើងដឹកអីវ៉ាន់មួយបានរត់ធ្លាក់ផ្លូវនៅកណ្តាលខេត្ត Kasai។
ចំណែក ក្នុងឆ្នាំ ២០១៧ ក៏មានករណីរថភ្លើងរត់ធ្លាក់ផ្លូវ ចូលក្នុងទន្លេ បណ្តាលឲ្យមនុស្សចំនួន ៣០នាក់ស្លាប់៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN