ខេត្តស្វាយរៀង៖ លោកនាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ និងជាប្រធានក្រុមការងារថ្នាក់ជាតិ ចុះមូលដ្ឋានស្រុកចន្ទ្រា និងក្រុងបាវិត រួមនិងក្រុមការងារ កាលពីរសៀលថ្ងៃទី១២ ខែកញ្ញា ឆ្នាំ២០១៩នេះ បានមានប្រសាសន៍ថា យើងត្រូវចូលរួមទប់ស្កាត់រាល់សភាពការណ៍ណាទាំងអស់ ដែលកើតមានឡើងដែលមានបំណងមកបំផ្លាញរដ្ឋាភិបាល ឬក៏ប្រទេសជាតិរបស់យើង គឺត្រូវតែទប់ស្កាត់ និងរក្សាបាននូវសន្តិភាព និងការអភិវឌ្ឍ មិនឱ្យប្រទេសជាតិ និងប្រជាជនយើង ជួបការលំបាកទៀតនោះដែរ។
លោកនាយឧត្តមសេនីយ៍ បានមានប្រសាសន៍ ដូច្នេះខណៈពេលដែលលោកបានអញ្ជើញ ចុះធ្វើការត្រួតពិនិត្យទីតាំងមណ្ឌលសុខភាព ដើម្បីបង្ការការពារគ្រោះមហន្តរាយ ព្រមទាំងការរៀបចំប្រព័ន្ធ លូរបង្ហរទឹកស្អុយ នៅតាមបណ្តោយខ្សែបន្ទាត់ព្រំដែនកម្ពុជា-វៀតណាម ក្នុងភូមិសាស្ត្រ ឃុំសំរោង និងឃុំទួលស្តី ស្រុកចន្ទ្រា ខេត្តស្វាយរៀង។
ក្នុងឱកាសនោះ លោកនាយឧត្តមសេនីយ៍ ម៉ឹង សំផន បានមានប្រសាសន៍ឱ្យដឹងថា តាមរយៈកិច្ចព្រមព្រៀង រវាងរាជរដ្ឋាភិបាលកម្ពុជា និងរដ្ឋាភិបាលវៀតណាម បានឱ្យក្រសួងការពារជាតិ នៃប្រទេសទាំងពីរ ត្រូវធ្វើការងារទប់ស្កាត់ គ្រោះមហន្តរាយ នៅតាមបណ្តោយតំបន់ព្រំដែន នៃប្រទេសទាំងពីរ ហើយថ្ងៃនេះ ក្រុមការងារបានចុះមកតំបន់នេះផ្ទាល់ ដោយយកភូមិសាស្ត្រស្រុកចន្ទ្រា ក្នុងឃុំទួលស្តី ដែលមានចំងាយពីព្រំដែនវៀតណាម ត្រឹមតែ១៥០០ម៉ែត្រ ដើម្បីងាយស្រួលក្នុងការទំនាក់ទំនងគ្នា ហើយជាងនេះទៅទៀត ប្រសិនបើមានគ្រោះមហន្តរាយ ឈឺថ្កាត់កើតឡើងក្នុងភូមិសាស្ត្រខេត្តស្វាយរៀង នៅតំបន់ព្រំដែននោះ គឺយើងមានមជ្ឈមណ្ឌលសុខាភិបាល ពិនិត្យសុខភាព ជូនប្រជាជនជាជាងដឹកយកអ្នកជំងឺទៅវៀតណាម ឬក៏យកទៅភ្នំពេញ ពីព្រោះវាឆ្ងាយហេតុដូច្នេះហើយទើបក្រសួងការពារជាតិ នៃប្រទេសទាំងពីរ បានឯកភាពគ្នា ធ្វើមជ្ឈមណ្ឌលសុខភាព នៅទីនេះផ្ទាល់តែម្តង ដោយមានពេទ្យសម្រាប់ព្យាបាលប្រជាជនរបស់យើង។
លោក ម៉ឹង សំផន បានមានប្រសាសន៍បន្តទៀតថាៈ ដូចសម្តេច តេជាបានមានប្រសាសន៍ថា នៅពេលមានគ្រោះមហន្តរាយ វាមិនលែងមានជំងឺឈឺស្កាត់កើតឡើងនោះទេ ដូច្នេះគ្រូពេទ្យ គឺសំខាន់ណាស់ សម្រាប់ព្យាបាល យើងទាំងអស់គ្នា ហើយលោកក៏មានមោទនភាពខ្លាំងណាស់ នៅក្នុងដំណាក់កាលនេះ ក្រោមការដឹកនាំរបស់សម្តេចតេជោ ហ៊ុន សែន ពីព្រោះថាតំបន់នេះកាលពីដើម ជាតំបន់មួយប្រយុទ្ធគ្នាគ្មានថ្ងៃឈប់ ថ្ងៃណាក៏វាយគ្នា ឥឡូវនេះ យើងកសាងបានប៉ុននេះ គឺដោយសារការដឹកនាំរបស់គណបក្សប្រជាជនកម្ពុជា និងសម្តេចតេជោ ជាប្រមុខ ដែលលោកបានដឹកនាំអស់រយៈពេលជាច្រើនឆ្នាំមកនេះ មានការអភិវឌ្ឍ និងមានសុខសន្តិភាពល្អ រហូតដល់ពេលនេះ ហើយជាពិសេស គឺយើងមានពេលអភិវឌ្ឍន៍ ដែលវាខុសគ្នាពីពេលដែលយើងមានសង្គ្រាម និងពេលដែលយើងមានសន្តិភាព។
លោកបានមានប្រសាសន៍បន្ថែមទៀតថា ឥឡូវយើងបានកសាងអភិវឌ្ឍន៍នូវផ្ទះ សណ្ឋាគារ បូរី កន្លែង កម្សាន្តជាច្រើន សម្រាប់ឱ្យបងប្អូនយើង រស់នៅមានជីវភាពធូរធារ នៅតាមតំបន់ព្រំដែនទាំងនេះ ជាការងារមួយសំខាន់ណាស់ របស់រាជរដ្ឋាភិ បាលរបស់យើង៕ដោយ៖ វ៉ៃកូ
