មេដឹកនាំកូរ៉េខាងត្បូង លោក ម៉ូន ជេអ៊ីន នឹងធ្វើជំនួបកំពូលជាមួយនឹងមេដឹកនាំអាមេរិច ដូណាល់ ត្រាំ ក្នុងខែនេះ បន្ទាប់ពីមានសង្ឃឹមថា ការចរចាជាមួយនឹងកូរ៉េខាងជើងដើម្បីរំសាយអាវុធនុយក្លេអ៊ែរអាចរស់ឡើងវិញ។ នេះបើតាមការបញ្ជាក់របស់ការិយាល័យរបស់ប្រធានាធិបតីម៉ូន។
ទីក្រងវ៉ាស៊ីនតោន និងសេអ៊ូល កំពុងធ្វើកិច្ចការជាមួយគ្នា ដើម្បីកំណត់ថ្ងៃជំនួបកំពូលរវាងមេដឹកនាំទាំងពីរ នៅពេលលោក ម៉ូន ជេអ៊ីនធ្វើដំណើរទៅកាន់ទីក្រុងញូវញ៉ក ដើម្បីចូលរួមមហាសន្និបាតអង្គការសហប្រជាជាតិចាប់ពីថ្ងៃទី ២២ ដល់ ២៤ ខែកញ្ញានេះ។
ជំនួបកំពូលរវាងមេដឹកនាំនៃប្រទេសសម្ព័ន្ធមិត្តទាំងពីរគ្រោងធ្វើឡើង ក្រោយពេលប្រទេសកូរ៉េខាងជើង បានបង្ហាញឆន្ទៈរបស់ខ្លួនក្នុងការចរចាបញ្ហានុយក្លេអ៊ែររបស់ខ្លួនជាមួយនឹងអាមេរិច។
សូមបញ្ជាក់ថា ការចរចាបញ្ហានុយក្លេអ៊ែររបស់កូរ៉េខាងជើង ជាប់គាំងអស់ជាច្រើនខែ ក្រោយពេលជំនួបកំពូលរវាង ដូណាល់ ត្រាំ និងគីម ជុងអ៊ុន កាលពីខែកុម្ភៈបានបរាជ័យ ប៉ុន្តែពួកគេបានព្រមព្រៀងគ្នាចរចាឡើងវិញ ក្រោយពេលពួកគេបានជួបគ្នានៅតំបន់គ្មានកងទ័ព ដែលខ័ណ្ឌចែកប្រទេសកូរ៉េទាំងពីរ កាលពីខែមិថុនាកន្លងទៅ៕
អត្ថបទប្រែសម្រួលដោយ៖ សុភ័ក្រ
ប្រភព៖ channelnewsasia
