ភ្នំពេញ៖ ព្រះរាជាណាចក្រកម្ពុជា ក្នុងឋាៈជាម្ចាស់ផ្ទះ សីហ្គេម លើកទី៣២ ឆ្នាំ២០២៣ បានប្រារព្ធពិធី សម្ពោធកាលបរិច្ឆេទផ្លូវការនៃព្រឹត្តិការណ៍ប្រវត្តិសាស្ដ្រការប្រកួតកីឡាស៊ីហ្គេម លើកទី៣២ និង អាស៊ានប៉ារ៉ា ហ្គេម ឆ្នាំ២០២៣ ជាផ្លូវការហើយ នៅព្រឹកថ្ងៃទី១៣ ខែកញ្ញា ឆ្នាំ២០១៩ នេះ នៅពហុកីឡដ្ឋានជាតិមរតកតេជោ ក្រោមអធិបតីសម្ដេចពិជ័យសេនា ទៀ បាញ់ ឧបនាយករដ្ឋមន្ដ្រី រដ្ឋមន្ដ្រីក្រសួងការពារជាតិ និងជាប្រធាន គណៈកម្មាធិការជាតិរៀបចំការប្រកួតកីឡាស៊ីហ្គេម លើកទី៣២ ឆ្នាំ២០២៣ (CAMSOC)។
ពិធីសម្ពោធកាលបរិច្ឆេទនេះ គឺជាការរាប់ថយក្រោយ (Countdown) ក្នុងវេទិកាជាតិ លើកទី១ ដើម្បីផ្សព្វ ផ្សាយព្រឹត្តិកាណ៍កីឡា SEA Games និង ASEAN Para Games ឆ្នាំ២០២៣ ដោយមានការចូលរួមពីថ្នាក់ដឹកនាំ មន្ដ្រីកីឡា អ្នកជំនាញបរទេស មន្ដ្រីសហព័ន្ធ និងកីឡាករ-កីឡាការិនីជាច្រើន ព្រមទាំងឯកអគ្គរដ្ឋទូតនៃបណ្តា ប្រទេសនានា ក្នុងតំបន់អាស៊ានផងដែរ។
លោក វ៉ាត់ ចំរើន អគ្គលេខាធិការ CAMSOC បានបង្ហាញនូវរបាយការណ៍សកម្មភាព និងវឌ្ឍនភាព ការងាររបស់ CAMSOC ជាបន្តបន្ទាប់ដូចជាផ្នែករដ្ឋបាល ហិរញ្ញវត្ថុ សិក្ខាសាលា ហើយបច្ចុប្បន្ន មានសហព័ន្ធ កីឡាជាតិចំនួន១៧ ដែលស្នើសុំចូលរួមប្រកួត និងហ្វឹកហាត់ក្រៅប្រទេស។ ចំពោះហេដ្ឋារចនាសម្ព័ន្ធ កីឡដ្ឋាន ធំ នៃពហុកីឡដ្ឋានជាតិមរតកតេជោ កំពុងបន្តដំណើរការសាងសង់ ដោយសម្រេចបានប្រមាណ៥៥% និង គ្រោងបញ្ចប់ការសាងសង់ នាថ្ងៃទី៣១ ខែធ្នូ ឆ្នាំ២០២០ ខាងមុខ។ រីឯភូមិកីឡា ឬបុរីកីឡា គ្រោងនឹងចាប់ផ្តើម សាង់សង់ នាខែតុលា ឆ្នាំ២០១៩។ លោកបន្ថែមទៀតថា ក្នុងនាមប្រតិបត្តិករកីឡាបានត្រៀមខ្លួនរួចជាស្រេច ក្នុងការបំពេញក្តីសុបិនរយៈពេល៥៤ឆ្នាំ ចាប់តាំងពី SEAP GAMES លើកទី១ ឆ្នាំ១៩៥៩ ឲ្យក្លាយជាការពិត គឺ ជោគជ័យ ក្នុងនាមជាម្ចាស់ផ្ទះ ស៊ីហ្គេម ឆ្នាំ២០២៣។ ជាមួយគ្នានោះ លោកបានបង្ហាញពីនូវក្តីរំពឹងពីការចូល រួមរបស់ប្រជាពលរដ្ឋទូទាំងប្រទេស ក្នុងយុទ្ធនាការលាងសម្អាតភាពអសកម្មក្នុងសង្គម ដូចជាយុទ្ធនាការកម្ពុជា ស្អាត ប្រជាជនម្នាក់លេងកីឡាមួយមុខ, ការកាត់បន្ថយគ្រឿងញៀន និងការកាត់បន្ថយគ្រោះថ្នាក់ចរាចរ ជាដើម។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មា ធិការជាតិរៀបចំការប្រកួតកីឡាអាស៊ីអាគ្នេយ៍ ឆ្នាំ២០២៣ (CAMSOC) មានប្រសាសន៍ថា សម្តេចពិតជារំភើប រីករាយយ៉ាងខ្លាំង ហើយក៏ជាកិត្តិយសដ៏ធំធេងបំផុត ដែលព្រះរាជាណាចក្រកម្ពុជាទទួលរៀបចំព្រឹត្តិការណ៍ កីឡាជាប្រវត្តិសាស្រ្ត នាឆ្នាំ២០២៣ ខាងមុខនេះ។ ព្រឹត្តិការណ៍ប្រវត្តិសាស្រ្ត នាពេលនេះ គឺវេទិកាជាតិលើកទី១ ដើម្បីជំរុញការប្រកួត ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ ដែលជាការបោះជំហានទៅមុខមួយសម្រាប់ ការធ្វើជាម្ចាស់ផ្ទះស៊ីហ្គេមឆ្នាំ ២០២៣ ប្រកបដោយជោគជ័យនា ពេលខាងមុខនេះ។
សម្តេចប្រធានបន្ថែមទៀតថា ព្រឹត្តិការណ៍ថ្នាក់ជាតិលើកដំបូង ថ្ងៃនេះគឺមានគោលបំណងដំបូង ដើម្បី ប្រកាសកាលបរិច្ឆេទផ្លូវការនៃព្រឹត្តិការណ៍ស៊ីហ្គេមឆ្នាំ ២០២៣។ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានសម្រេចឲ្យពិធីបើកជាផ្លវការនៃពិធីបើកស៊ីហ្គេម ឆ្នាំ២០២៣ គឺនៅថ្ងៃទី៥ឧសភា និងពីធីបិទជាផ្លូវការ នៅថ្ងៃទី ១៥ ខែឧសភាឆ្នាំ ២០២៣។
ជាមួយគ្នានោះ សម្តេចពិជ័យសេនា ទៀ បាញ់ បានប្រកាសបើកឲ្យរាប់ថយក្រោយ ស៊ីហ្គេម ឆ្នាំ២០២៣ ចាប់ផ្តើមពីថ្ងៃនេះតទៅឲ្យបានជ្រួតជ្រាបដល់សាធារណជនជាតិ និងអន្តរជាតិ មន្ត្រីរដ្ឋាភិបាល នគរបាល និង កងកម្លាំងយោធា និស្សិត ប្រជាពលរដ្ឋ និងអង្គការមិនមែនរដ្ឋាភិបាល ដើម្បីចូលរួមរួមគ្នា ក្នុងការរៀបចំ សម្រាប់ការធ្វើជាម្ចាស់ផ្ទះ ស៊ីហ្គេម ឆ្នាំ២០២៣៕ដោយ៖កូឡាប