ភ្នំពេញ៖ នៅក្នុងបទបង្ហាញសិក្ខាសាលាពិគ្រោះយោបល់ប្រមូលធាតុចូល ដើម្បីរៀបចំសេចក្តីព្រាងច្បាប់ស្តីពីការគ្រប់គ្រងវិស័យអប់រំកាយ និងកីឡា នៅព្រឹកថ្ងៃទី១២ ខែកញ្ញា ឆ្នាំ២០១៩ ក្រោមការរៀបចំរបស់ក្រសួងអប់រំ យុវជន និងកីឡា នៅមជ្ឈមណ្ឌលជាតិហ្វឹកហ្វឺនកីឡា លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជាបានលើកឡើងនូវមូលដ្ឋានគ្រឹះចំនូន ៧ចំណុចសំខាន់ៗនៃធម្មនុញ្ញអូឡាំពិក ដែលជាច្បាប់កំពូលនៃចលនាអូឡាំពិកពិភពលោក។
លោកវ៉ាត់ ចំរើន បានលើកឡើងនូវធម្មនុញរបស់អូឡាំពិកបង្ហាញជូនអង្គសិក្ខាសាលា ដើម្បីរួមចំណែកដល់គោលការណ៍នៃការអភិវឌ្ឍវិស័យកីឡានៅកម្ពុជា ក៏ដូចជាបង្ហាញនូវធាតុចូល សម្រាប់សេចក្តីព្រាងច្បាប់នេះផងដែរ។ លោកបានពន្យល់ថា៖ ទស្សនៈវិជ្ជាអូឡាំពិក ឬទស្សនៈវិជ្ជានៃកីឡា គឺជាទស្សនៈវិជ្ជានៃជីវិត ដែលជាមូលដ្ឋាននៃការធ្វើសកម្មភាពផ្លូវកាយ ឆន្ទៈ និងស្មារតី ហើយកីឡាជាការរួមបញ្ចូលគ្នារវាង វប្បធម៌ ការអប់រំ និងភាពអត់ធន់នៃកីឡា។ ទស្សនៈវិជ្ជាអូឡាំពិក គឺជាមធ្យោបាយស្វែងរកតម្លៃសម្រាប់ជីវិត ដែលធ្វើឲ្យមានការខិតខំប្រឹងប្រែងក្នុងជីវិត ការផ្តល់គុណតម្លៃនានាឲ្យមានការទទួលខុសត្រូវក្នុងសង្គម និងជា មូលដ្ឋាននៃក្រមសីលធម៌កីឡាសកលលោក។ ធម្មនុញ្ញអូឡាំពិក បង្ហាញគោលដៅរបស់ទស្សនៈវិជ្ជាអូឡាំពិក គឺដាក់ សកម្មភាពកីឡា ឲ្យស្ថិតនៅក្នុងសេវាបម្រើ និងការអភិវឌ្ឍសុខដុមនីយកម្មមនុស្សជាតិ ដោយផ្តោតលើការជំរុញឲ្យមានសុវត្ថិភាពសង្គម ជួយការពារកិត្តិយស ឥស្សរិយភាពរបស់មនុស្សជាតិ។ ការលេងកីឡា ការហាត់កីឡា គឺជាសិទ្ធិមនុស្ស ដូច្នេះមនុស្សគ្រប់រូប ទាំងក្មេង ចាស់ ប្រុស ស្រី ជនពិការ មានសិទ្ធិលេងកីឡាមិនត្រូវបានហាមឃាត់ ហើយយកស្មារតីនៃសាមគ្គីភាព មិត្តភាព ការគោរពគ្នាទៅវិញទៅមក បូកជាមួយការលេងដោយយុត្តិធម៌ (Fair Play) គឺទទួលបានសិទ្ធិស្មើគ្នានៅក្នុងកីឡា។
ការទទួលស្គាល់ក្នុងការបង្កើតនូវយន្តការសង្គម កីឡា ក្នុងចលនាអូឡាំពិក មានសិទ្ធិ និងកាតព្វកិច្ច ស្វ័យភាព ដោយមានន័យថា អ្នកណាក៏អាចបង្កើតជាក្រុម អង្គការកីឡាបានដែរ ដែលអាចបង្កើតដោយខ្លួនឯង ដោយស្វ័យភាព ពីព្រោះថាកីឡាគឺជាចលនាសង្គម ដោយមានសេរីភាពគ្រប់គ្រាន់ក្នុងការបង្កើតប្រភេទកីឡាណាមួយដែលខ្លួនស្រឡាញ់ចូលចិត្ត។ ការបង្កើតសង្គមកីឡាឡើង ដើម្បីគ្រប់គ្រងបទប្បញ្ញត្តិ ដែលជាបុព្ធសិទ្ធិ ហើយអ្នកបង្កើតនោះគឺជាអ្នកការពារ ប៉ុន្តែការបង្កើតនោះត្រូវមានកាតព្វិច្ច ការទទួលខុសត្រូវរបស់អង្គការកីឡា សង្គម ដោយសហព័ន្ធកីឡាជាតិ ឬក្លឹបនោះត្រូវបានអភិបាលកិច្ចល្អ ហើយបើកាលណាអង្គការសង្គម កីឡា នោះមានអភិបាលកិច្ចល្អ នឹងទទួលបានការគាំទ្រ និងការឧបតម្ថម្ភពីរដ្ឋអំណាចកីឡា ប៉ុន្តែការបង្កើតនោះ ត្រូវច្បាស់លាស់ថា ការគ្រប់គ្រងដឹកនាំរបស់ខ្លួនអនុលោមតាមអភិបាលកិច្ចល្អ ដោយឈរលើសុច្ចចរិតភាព និង ស័ក្តិសិទ្ធិភាព ក្នុងការដឹកនាំនោះ។ ការប្រព្រឹត្តទៅរបស់អង្គការកីឡាសង្គមត្រូវបានការពារ ដោយធម្មនុញ្ញអូឡាំពិក ដោយគ្មានការរើសរើង គ្រប់ទម្រង់ ដូចជាពណ៌សម្បុរ ភេទ សាសនា ភាសា នយោបាយ ទស្សនៈខុសគ្នា ដើមកំណើតខុសគ្នាក៏ដោយ ក៏ត្រូវបានការពារមិនឲ្យប៉ះពាល់ដល់ចលនាកីឡានោះទេ។ នេះជាការលើកឡើងបន្ថែមរបស់លោក វ៉ាត់ ចំរើន។
លោកបញ្ជាក់ថា អ្វីដែលលោកបានលើកឡើងទាំងអស់នេះ គឺជាធម្មនុញ្ញរបស់អូឡាំពិក ដែលយើងទាំងអស់គ្នាត្រូវតែដឹងឮអំពីធាតុចូលទាំងនេះ ដើម្បីសម្របខ្លួនតាមច្បាប់អន្តរជាតិ ក្នុងការរៀបចំឈានដល់ការតាក់តែងសេចក្តីព្រាងច្បាប់ ស្តីពីវិស័យអប់រំកាយ និងកីឡា នាពេលខាងមុខ៕ដោយ៖កូឡាប