តាកែវ៖ លោក អ៊ូច ភា អភិបាលខេត្តតាកែវ ប្រាប់ឲ្យអភិបាលក្រុងស្រុក ក៏ដូចជា អាជ្ញាធរមានសម្ចកិច្ចត្រូវបង្កើនការយកចិត្តទុកដាក់ និងរាយការណ៍អំពីស្ថាពជាក់ស្តែង ពីគ្រោះធម្មជាតិផ្សេងៗ នៅក្នុងមូលដ្ឋានខ្លួន គ្រប់គ្រងឲ្យបានឆាប់មកកាន់ថ្នាក់លើ ដើម្បីចាត់វិធានការដោះស្រាយឲ្យទាន់ពេលវេលា ។
ថ្លែងបែបនេះគឺក្នុងពេលដែរ លោក អភិបាលខេត្តតាកែវ ចូលរួមកិច្ចប្រជុំកិច្ចប្រជុំផ្សព្វផ្សាយសារាចរណែនាំលេខ០៨ សណន របស់ រាជរដ្ឋាភិបាលកម្ពុជា សារាចរណែនាំលេខ០០១ សណន របស់គណៈកម្មាធិការជាតិ គ្រប់គ្រងគ្រោះ មហន្តរាយ និងសេចក្ដីសម្រេចលេខ១២២ សសរ ស្តីពី ការកែសម្រួលសមាសភាព គណៈកម្មាធិការគ្រប់គ្រងគ្រោះមហន្តរាយខេត្ត កាលពីថៃទី ១៣ ខែ កញ្ញា ឆ្នាំ២០១៩ នៅសាលប្រជុំរដ្ឋបាលខេត្តតាកែវ ។
លោក អ៊ូច ភា បានមានប្រសាសន៍បន្តថា នៅពេលជួបឬទទួលបានព័ត៌មានណាមួយពីរការជួបនៅគ្រោះធម្មជាតិផ្សេងៗ ឬបញ្ហាទឹកជំនន់លិចនោះ ក្នុងនាមជាអាជ្ញាធរមូលដ្ឋាន ត្រូវចាត់វិធានចុះជួយជាបន្ទាន់ និងត្រូវរាយការណ៍មកកាន់ថ្នាក់ខេត្តឲ្យបានលឿនជាទីបំផុត ដើម្បីថ្នាក់ខេត្តធ្វើការរាយការណ៍ជាបន្ត និងចាត់វិធានការជាបន្ទាន់ ក្នុងការចុះទៅជួយដល់ប្រជាពលរដ្ឋ ដែលកំពុងជួបបញ្ហា ឬទួលរងគ្រោះ ឲ្យបានទាន់ពេលវេលា និងទាន់សភាពការណ៍ជាក់ស្តែងតែម្តង ។
លោកបន្តថា ក្នុងរយៈពេលជាច្រើនថ្ងៃកន្លងមកនេះ បន្ទាប់ពីមានការជូនដំណឹងរបស់ក្រសួងធនធានទឹករួចមក យើងឃើញថា នៅតាមបណ្តាខេត្តនីមួយៗ មានជំនន់ទឹកភ្លៀងជន់លិច ដូច្នេះហើយសូមឲ្យអាជ្ញាធរគ្រប់ស្រុក ក្រុង ពិសេសអាជ្ញាធរស្រុកដែលជាប់តំបន់ដែលធ្លាប់មានទឹកជន់លិច ត្រូវសហការចុះទៅតាមមូលដ្ឋានឲ្យបានជាប្រចាំ ដើម្បីបានដឹងពីស្ថានភាពជាក់ស្តែង ក្នុងមូលដ្ឋានគ្រប់គ្រង និងងាយស្រួលក្នុងការជួយដល់បងប្អូនប្រជាពលរដ្ឋដែលជួបបញ្ហាបានទាន់ពេលវេលា។
ឆ្លៀតក្នុងឱកាសនោះផងដែរ លោកអភិបាលខេត្ត ក៏ស្នើឲ្យអភិបាលក្រុងស្រុកទាំងអស់ នៅពេលចុះទៅតាមមូលដ្ឋានក្នុងភូមិសាស្រ្តខ្លួន ត្រូវចូលរួមផ្សព្វផ្សាយបន្ថែមពីច្បាប់ចរាចរណ៍ និងបញ្ហាគ្រោះថ្នាក់ចរាចរ ទៅដល់បងប្អូនប្រជាពលរដ្ឋ ដែលជាអ្នកប្រើមប្រាស់យានជំនិះគ្រប់ប្រភេទ នៅលើដងផ្លូវសាធារណៈ ឲ្យពួកគាត់បានយល់ដឹងកាន់តែច្បាស់បន្ថែមទៀត ពីការគោរពច្បាប់ក្នុងការបើកបរ ដើម្បីបញ្ជៀសឲ្យបានបញ្ហាគ្រោះថ្នាក់ចរាចរ តាមដងផ្លូវនៅក្នុងឱកាសបុណ្យភ្ជុំបិណ្ឌនាពេលខាងមុខនេះ ៕ដោយ៖តាកែវ