កណ្តាល៖ អធិការដ្ឋាននគរបាលស្រុកល្វាឯម បានឲ្យដឹងថា សូមបងប្អូនប្រជាពលរដ្ឋកុំបរិភោគពងគីង្គក់ឲ្យសោះ ព្រោះវាបណ្តាលឲ្យពុលស្លាប់ភ្លាមៗ។ ករណីពុលពងគីង្គក់ បណ្ដាលឲ្យបុរសម្នាក់ស្លាប់ ដែលកើតហេតុនៅថ្ងៃ សុក្រ ទី ១៣ ខែ កញ្ញាឆ្នាំ ២០១៩ វេលាម៉ោង ១និង ៣០នាទីរំលងអធ្រាត្រ នៅចំណុចភូមិកោះកែវក្រោម ឃុំកោះកែវ ស្រុកល្វាឯម ខេត្តកណ្តាល។
ជនរងគ្រោះឈ្មោះ គង់ សុភ័ក្ត អាយុ៤៥ឆ្នាំ ទីលំនៅភូមិ ឃុំកើតហេតុខាងលើ មុខរបរ កសិករ។
នគរបាលដែលចុះពិនិត្យសព បានរៀបរាប់ពីសភាពរឿងហេតុនេះថា មុនពេលកើតហេតុ ជនរងគ្រោះបានចេញទៅរកចាប់គីង្គក់នៅខាងក្រោយផ្ទះយកមកធ្វើម្ហូប ពេលចាប់បានរួច ជនរងគ្រោះបានយកមកធ្វើយកពងគីង្គក់
មកដាក់កូនចានជំហុយ ហើយហូបបានមួយសន្ទុះក្រោយមក ក៏ក្អួតបីបួនដង ប្រពន្ធបាននាំយកមកមណ្ឌលសុខភាព ឃុំសំបួរ បានដាច់ខ្យល់ស្លាប់ភ្លាម។
តាមការសន្និដ្ឋានរបស់នគរបាលជំនាញ បានបញ្ជាក់ថា ករណីនេះបណ្ដាលមកពីជនរងគ្រោះហូបពងគីង្គក់ បណ្ដាលឲ្យពុលស្លាប់
លោកមេឃុំមេភូមិពេទ្យមណ្ឌលសុខភាពឃុំ សមត្ថកិច្ចប៉ុស្តិ៍ចូលរួម ធ្វើកោសល្យវិច្ច័យ៕ដោយ៖កូឡាប