ភ្នំពេញ៖ ហាងសាច់អាំងចិនមួយកន្លែងយីហោ Han Sheng ដែលមានទីតាំងស្ថិតក្នុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ ត្រូវអគ្គិភ័យឆាបឆេះផ្នែកខាងមុខ នៅព្រឹកព្រលឹមថ្ងៃទី១៤ ខែកញ្ញា ឆ្នាំ២០១៩នេះ។
សេចក្ដីរាយការណ៍ បានឲ្យដឹងថា នៅមុនពេលកើតហេតុគេឃើញផ្សែងខ្មួលខ្មាញ់ ហុយចេញពីផ្នែកខាងមុខ នៃហាងសាច់អាំងចិន ទើបធ្វើឲ្យមានការភ្ញាក់ផ្អើលដល់សមត្ថកិច្ច ដើម្បីចេញអន្ដរាគមន៍ ជួយសង្គ្រោះ។ ក្នុងប្រតិបត្តិការជួយសង្គ្រោះនេះ សមត្ថកិច្ចបានប្រើប្រាស់ ឡានទឹកអស់ចំនួន១៧គ្រឿង ទើបអាចគ្រប់គ្រងស្ថានការបានទាំងស្រុង នៅវេលាម៉ោងប្រមាណជាង៨ព្រឹក។
បើតាមសេចក្ដីរាយការណ៍ ករណីអគ្គិភ័យនេះ សមត្ថកិច្ចសន្និដ្ឋានជំហ៊ានដំបូងថា ផ្ដើមចេញពីការឆ្លងចរន្ដអគ្គិសនី ហើយមិនបណ្ដាលឲ្យមានពលរដ្ឋណាម្នាក់រងគ្រោះនោះទេ គ្រាន់តែខូចខាតសម្ភារមួយចំនួន។
ចំពោះករណីទី២ គឺនៅព្រឹកថ្ងៃដដែលនេះ អគ្គិភ័យឆាបឆេះនៅសង្កាត់ច្បារអំពៅទី២ ខណ្ឌច្បារអំពៅ ហើយពេលនេះកម្លាំងសមត្ថកិច្ច អាជ្ញាធរសង្កាត់ និងអាជ្ញាធរខណ្ឌ បានជួយអន្តរាគមន៍ផងដែរ៕ដោយ៖បញ្ញាស័ក្តិ
