បាត់ដំបង៖ សមត្ថកិច្ច រួមជាមួយសហគម៍នេសាទមូលដ្ឋានស្រុកបាណន់ ចុះបង្ក្រាបរឹបអូសសម្ភារបម្រើការនេសាទត្រីខុសច្បាប់ បានជាច្រើនម៉ែត្រ ពីតំបន់អាងស្តុកទឹកកំពីងពួយ ខេត្តបាត់ដំបង។
នគរបាលស្រុកបាណន់ បានប្រាប់ឲ្យដឹងថា ករណីបង្ក្រាបបទល្មើសនេសាទខាងលើនេះ ធ្វើឡើងនៅវេលាម៉ោង៧និង៣០នាទី ថ្ងៃទី១៣ ខែកញ្ញា ឆ្នាំ២០១៩ ត្រង់ចំណុចអាងស្តុកទឹកកំពីងពួយ ស្ថិតនៅក្នុងឃុំតាគ្រាម ស្រុកបាណន់ ខេត្តបាត់ដំបង។
ការប្រើប្រាស់វិធានការតាមផ្លូវច្បាប់រហូតឈានដល់ការចុះបង្ក្រាប សំដៅការទប់ស្កាត់នេះដែរ អនុវត្តឆ្លើយតបបន្ទាន់ភ្លាមៗមួយក្រោយបទល្មើសនៅចំណុចខាងលើ បានកើតមានកាន់តែមានសន្ទុះកើនឡើងពីមួយថ្ងៃ ទៅមួយថ្ងៃដែលជនខិលខូចមួយចំនួនតូច បានឆ្លៀតឱកាសប្រើប្រាស់នូវឧបករណ៍នេសាទផ្ទុយពីច្បាប់អនុញ្ញាតទៅនេសាទត្រី បង្កការប៉ះពាល់ និងរេចរឹលខ្លាំងទៅៗនូវមច្ឆាជាតិ គ្រប់ប្រភេទ ដែលមាននៅក្នុងអាងស្តុកទឹកកំពីងពួយ និងម៉្យាងទៀតបានបង្កការលំបាកផងដែរ ទៅដល់ប្រជាពលរដ្ឋជាច្រើនគ្រួសារផ្សេងទៀត នៅក្នុងសហគមន៍ ដែលមានមុខរបរនេសាទត្រីត្រឹមត្រូវ ដើម្បីចិញ្ចឹមជីវិត ទ្រទ្រង់សេដ្ឋកិច្ចគ្រួសារ។
ប្រភពដដែលបានបញ្ជាក់បន្ថែមថា ឧបករណ៍ល្មើសច្បាប់ដែលកម្លាំងបង្ក្រាបដកហូតបាន ហើយត្រូវដុតបំផ្លាញចោលរួមមានស្បៃរាំងត្រីក្រឡល្អិតចំនួន១៥៧ខ្សែ ស្មើនឹង៣៩២៥ម៉ែត្រ និងអំភ្លីឆក់ត្រីចំនូន០៣គ្រឿងផង ៕ដោយ៖កូឡាប
