ភ្នំពេញ៖ សម្តេច សាយ ឈុំ អនុប្រធានគណបក្សប្រជាជនកម្ពុជា បានចេញលិខិតតែងតាំងលោក ឈឿន ចាន់ថន ហៅ ម៉ៅ ជាអតីតមេអង្គរក្សសម្តេចជាស៊ីម ជាសមាជិកក្រុមការងារថ្នាក់កណ្តាល ចុះជួយខេត្តត្បូងឃ្មុំ។ សេចក្តីសម្រេចនេះ បានធ្វើឡើង យោងតាមចំណារយល់ព្រមដ៏ខ្ពង់ខ្ពស់របស់សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ចុះថ្ងៃទី១០ ខែកញ្ញា ឆ្នាំ២០១៩។
លោក ឈឿន ចាន់ថន ហៅម៉ៅ អតីតមេអង្គរក្ស សម្តេច ជា ស៊ីម ធ្លាប់ត្រូវបានតុលាការយោធាផ្តន្ទាទោសរយៈពេល១៥ឆ្នាំ ពាក់ព័ន្ធបទល្មើសរំលោភលើទំនុកចិត្ត បំផ្លិចបំផ្លាញដោយចេតនា និងគៃបំបាត់ដោយទុច្ចរិត លក់ដូរ និងចែកចាយអាវុធ បំផ្លិចបំផ្លាញសម្ភារៈយោធាសម្រាប់បម្រើការប្រយុទ្ធ និងខ្វះការទទួលខុសត្រូវ ក្នុងការដឹកនាំគ្រប់គ្រងអង្គភាព ។
នៅថ្ងៃទី១២ ខែវិច្ឆិកា ឆ្នាំ២០១៨ ព្រះមហាក្សត្រ បានចេញព្រះរាជក្រឹត្យ លើកលែងទោសដល់ទណ្ឌិត ឈឿន ចាន់ថន ហើយត្រូវបានដោះលែងចេញពីពន្ធនាគារ ៕ ដោយ៖បញ្ញាស័ក្តិ