ខេត្តស្វាយរៀង៖ យុវជនម្នាក់បានរងរបួសដោយសារតែបើកបរម៉ូតូ មិនប្រកាន់ស្ដាំ ហើយត្រូវរថយន្តធ្វើដំណើរបញ្ច្រាសទិសគ្នា បុកខ្ទាតម៉ូតូដួលអូសជាង១០ម៉ែត្រ។ ករណីគ្រោះថ្នាក់នេះបានកើតឡើងកាលពីវេលាម៉ោង ០៧:៤៥ នាទី ថ្ងៃ អាទិត្យ ០២ រោច ខែ ភទ្របទ ឆ្នាំ កុរ ឯកស័ក ព.ស ២៥៦៣ ត្រូវនិងថ្ងៃទី ១៥ ខែ កញ្ញា ឆ្នាំ ២០១៩ នៅលើផ្លូវជាតិលេខ ០១ ចន្លោះគីឡូម៉ែត្រលេខ ១៣០-១៣១ ស្ថិតក្នុងភូមិ ស្វាយតឿ សង្កាត់ ស្វាយតឿ ក្រុង ស្វាយរៀង ។
យោងតាមសមត្ថកិច្ច បានឲ្យដឹងថា ៖ នៅមុនពេលកើតហេតុមានរថយន្ដម៉ាក ហ៊ីយ៉ាន់ដាយ ពណ៌ ខៀង ពាក់ផ្លាកលេខ ភ្នំពេញ ៣D ៩៣០៩ បើកបរពីលិចទៅកើត លុះមកដល់កន្លែងកើតហេតុខាងលើ ក៏មានម៉ូតូមួយគ្រឿង ម៉ាក ស៊ូមើអ៊ិច ពណ៌ក្រហម ពាក់ផ្លាកលេខ ស្វាយរៀង ១L ៨៦០៣ បើកបរដោយឈ្មោះ ម៉ែន សាន ភេទ ប្រុស អាយុ ១៩ ឆ្នាំ មុខរបរ កសិករ រស់នៅភូមិ រោងដំរី ឃុំ ស្វាយចេក ស្រុក រំដួល ខេត្ត ស្វាយរៀង បើកបរពីកើតទៅលិច ដោយមិនប្រកាន់ស្តាំបណ្តាលឲ្យរថយន្តបុកចំចំហៀងខាងឆ្វេង បែកកង់មុខ ហើយអ្នកបើកបរមិនស្គាល់អត្តសញ្ញាណ បានចុះរត់គេចពីកន្លែងកើតហេតុ បន្សល់ទុករថយន្ដនិងម៉ូតូ ខូចខាតធ្ងន់ ។
មធ្យោបាយត្រូវបានសមត្ថកិច្ចយកទៅរក្សាទុក នៅអធិការដ្ឋាននគរបាលក្រុងស្វាយរៀង ដើម្បីចាត់ការបន្តទៅតាមច្បាប់។ ចំណែកជនរងគ្រោះ កំពុងសម្រាកព្យាបាលនៅមន្ទីរពេទ្យខេត្តស្វាយរៀង ។ មូលហេតុ : អ្នកបើកបរម៉ូតូមិនប្រកាន់ស្ដាំ ៕ដោយ៖វ៉ៃកូ