តម្លៃប្រេងបានឡើងខ្ពស់ខ្លាំងបំផុតក្នុងរយៈពេល ៤ខែចុងក្រោយនេះ បន្ទាប់ពីមានការវាយប្រហារចំនួន ២ដងទៅលើរោងចក្រផលិតប្រេង ក្នុងប្រទេសអារ៉ាប៊ី សៅអូឌីកាលពីថ្ងៃសៅរិ៍ ចុងសប្តាហ៍នេះ។ ការវាយប្រហារនោះបណ្តាលឲ្យប៉ះពាល់ដល់ការផ្គត់ផ្គង់ប្រេងទូទាំងពិភពលោកចំនួន ៥ភាគរយ។
បន្ទាប់ពីមានការវាយប្រហារ តម្លៃប្រេងឆៅប្រភេទ Brent បានហក់ឡើងដល់ ១៩ភាគរយ ដោយមានតម្លៃ ៧១,៩៥ដុល្លារក្នុងមួយធុង ខណៈតម្លៃប្រេងឆៅប្រភេទ West Texas ក៏បានកើនឡើង ១៥ភាគរយផងដែរ ដោយមានតម្លៃ ៦៣,៣៤ដុល្លារក្នុងមួយធុង។
ទោះយ៉ាងណា តម្លៃប្រេងក៏បានធ្លាប់ចុះបន្តិចវិញ ក្រោយពេលប្រធានាធិបតីអាមេរិច ដូណាល់ ត្រាំ បានអនុញ្ញាតិឲ្យមានការបញ្ចេញប្រេងបម្រុងអាមេរិច។
វាប្រហែលជាត្រូវការពេលជាច្រើនសប្តាហ៍ សម្រាប់រោងចក្ររបស់អារ៉ាប៊ី សៅអូឌីអាចធ្វើការផលិតប្រេងដូចធម្មតាវិញបាន។
សូមបញ្ជាក់ថា កាលពីថ្ងៃសៅរ៍កន្លងទៅនេះ មានការវាយប្រហារដោយយន្តហោះដ្រូន ទៅលើរោងចក្រផលិតប្រេងដ៏សំខាន់របស់អារ៉ាប៊ី សៅអូឌី ។
រដ្ឋមន្រ្តីការបរទេសអាមេរិច លោក Mike Pompeo បាននិយាយថា ប្រទេសអ៊ីរ៉ង់គឺជាអ្នកនៅពីក្រោយការវាយប្រហារនោះ។ ចំណែកអ៊ីរ៉ង់វិញ បានចោទអាមេរិចវិញថាបោកប្រាស់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC