ម្ចាស់ក្សត្រីរបស់ប្រទេសម៉ាឡេស៊ី បានបង្ហោះនៅក្នុងបណ្តាញសង្គម Twitter ដោយបង្ហាញការខកចិត្តយ៉ាងខ្លាំង ចំពោះប៉ូលីសដែលបានចាប់មនុស្សដោយសារតែរិះគន់គាត់នៅលើបណ្តាញសង្គម។
ម្ចាស់ក្សត្រីព្រះនាម Raja Permaisuri Agong បាននិយាយថា គាត់ និងព្រះមហាក្សត្រមិនបានស្នើឲ្យប៉ូលីសចាត់វិធានការលើអ្នកទាំងនោះទេ ហើយគាត់ពិតជាមានការខូចចិត្តយ៉ាងខ្លាំងចំពោះព័ត៌មាននៃការចាប់ខ្លួនអ្នករិះគន់គាត់។
ម្ចាស់ក្សត្រី Raja Permaisuri Agong គឺជាព្រះមហេសីរបស់ប្រមុខរដ្ឋម៉ាឡេស៊ីបច្ចុប្បន្ន។
ម្ចាស់ក្សតី បានសរសេរសារជាច្រើនៅលើ Twitter ដូច្នេះថា “ខ្ញុំពិតជាមានការខូចចិត្តយ៉ាងខ្លាំង ដែលបានដឹងថាប៉ូលីសបានឃុំខ្លួនអ្នកទាំងនោះ។ អស់ជាច្រើនឆ្នាំមកហើយ ស្វាមីខ្ញុំ និងរូបខ្ញុំផ្ទាល់មិនដែលបានរាយការណ៍ដល់ប៉ូលីសឡើយ ចំពោះអ្នកដែលបានរិះគន់ពួកយើង”។ សារជាច្រើនដែលអ្នកគាត់បានសរសេរ ត្រូវបានលុបចោលវិញ។
គាត់បញ្ជាក់ថា “វា (ម៉ាឡេស៊ី) គឺជាប្រទេសសេរី”។ គាត់ក៏បានលុបគណនេយ្យ Twitter ចោលផងដែរ។
គាត់ថ្លែងថា “ខ្ញុំបានលុបគណនេយ្យ Twitter របស់ខ្ញុំចោល បន្ទាប់ពីខ្ញុំបានឮពីព័ត៌មាននៃការចាប់ខ្លួននោះ ពីព្រោះខ្ញុំខឹង និងខូចចិត្ត”។
សូមបញ្ជាក់ថា កាលពីថ្ងៃសុក្រកន្លងទៅនេះ សកម្មជនម្នាក់មកពីគណបក្ស Parti Socialis Malaysia ត្រូវបានចាប់ខ្លួនពីបទ បង្ហោះសារប្រមាថលើម្ចាស់ក្សត្រីម៉ាឡេស៊ី។
គាត់ត្រូវបានចាប់ខ្លួនក្រោមច្បាប់ ១៩៤៨ ដែលច្បាប់នេះត្រូវបានអ្នកនយោបាយប្រឆាំង និងក្រុមសិទ្ធិមនុស្សធ្វើការរិះគន់យ៉ាងខ្លាំង។ សកម្មជនរូបនោះត្រូវបានឃុំខ្លួនអស់រយៈពេលមួយយប់ មុនពេលគាត់ត្រូវបានដោះលែងឲ្យនៅក្រៅឃុំកាលពីថ្ងៃសៅរ៍៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC