ខេត្តមណ្ឌលគិរី ៖កម្លាំងមន្រ្តីឧទ្យានុរក្សដែនជម្រកសត្វព្រៃភ្នំព្រេច សហការជាមួយប៉ុស្តិ៍នគរបាលរដ្ឋបាលឃុំមេម៉ង់ បានវាយខ្នោះបុរសម្នាក់ ព្រោះតែជននេះប្រើកាំភ្លើងអាកាបាញ់សម្លាប់សត្វខ្ទីងយកមកធ្វើម្ហូប ។ ការចាប់ខ្លួននេះ នៅព្រឹកថ្ងៃទី១៤ ខែកញ្ញា ឆ្នាំ២០១៩ នៅចំណុចផ្ទះជនសង្ស័យ ស្ថិតក្នុងភូមិពូងោល ឃុំមេម៉ង់ ស្រុកកែវសីមា ខេត្តមណ្ឌលគិរី ។
ជនសង្ស័យដែលឃាត់ខ្លួន ឈ្មោះ ចប់ ហាញ ជាជនជាតិព្នង មានទីលំនៅបច្ចុប្បន្នភូមិពូងោល ឃុំមេម៉ង់ ស្រុកកែវសីមា ខេត្តមណ្ឌលគិរី ជាឪពុកក្មេករបស់ជនដៃដល់ ខណៈជនដៃដល់បានរត់គេចខ្លួនបាត់។
ក្នុងពេលឃាត់ខ្លួន សមត្ថកិច្ច ដកហូតវត្ថុតាងរួមមាន ៖ ១. អាវុធអាកាស្វ័យបត់ចំនួន១ដើម និងគ្រាប់ចំនួន៩គ្រាប់។ ២. សាច់សត្វខ្ទីងស្រស់ចំនួន៣០គីឡូក្រាម ៣. សាច់ខ្ទីងចម្អិនឆ្អិនចំនួន១ឆ្នាំងធំ និង៤.អាវុធកែច្នៃ (កាំភ្លើងខ្យល់) ចំនួន២ដើម ៕ដោយ៖បញ្ញាស័ក្តិ