ខេត្តព្រះសីហនុ៖ រដ្ឋបាលខេត្តព្រះសីហនុ កាលពីព្រឹកថ្ងៃទី១៦ ខែកញ្ញា ឆ្នាំ២០១៩នេះ បានបើកវគ្គផ្សព្វផ្សាយឯកសារបច្ចេកទេស ស្ដីពីការកសាងផែនការអភិវឌ្ឍន៍ ៥ឆ្នាំ របស់ខេត្ត-ក្រុង-ស្រុក ឲ្យស្របតាមឯកសារបច្ចេកទេស នៃការកសាងផែនថ្មី។
វគ្គបណ្ដុះបណ្ដាលស្ដីពីការរៀបចំ និងកសាងផែនការអភិវឌ្ឍន៍ រយៈពេល ៥ឆ្នាំ របស់ខេត្តព្រះសីហនុនេះ គិតចាប់ពី ឆ្នាំ២០២០ ដល់ ឆ្នាំ២០២៤។
វគ្គបណ្តុះបណ្តាលរយៈពេលនេះ ធ្វើឡើងនៅសាលាខេត្តព្រះសីហនុ ចាប់ពីថ្ងៃទី១៦~១៧ ខែកញ្ញា ឆ្នាំ២០១៩ ដោយមានតំណាងចូលរួមមកពីមន្ទីរ អង្គភាពស្ថាប័ន ក្រុង ស្រុក និងក្រុមការងារពាក់ព័ន្ធ ក្នុងខេត្តព្រះសីហនុទាំងមូល។
លោក ឈិន សេងងួន អភិបាលរង នៃគណៈអភិបាលខេត្តព្រះសីហនុ ដែលចូលរួមជាអធិបតីក្នុងសិក្ខាសាលានោះ មានប្រសាសន៍ថា គោលបំណងនៃការបើកវគ្គបណ្ដុះបណ្ដាលនេះ គឺចង់បង្ហាញពីច្បាប់ ស្ដីពី ការគ្រប់គ្រងរដ្ឋបាលរាជធានី-ខេត្ត ក្រុង-ស្រុក-ខ័ណ្ឌ មាត្រា៣៧ ដែល ក្រុមប្រឹក្សាត្រូវរៀបចំ និងអនុម័ត ផែនការអភិវឌ្ឍន៍រយៈពេល៥ឆ្នាំ ហើយត្រូវធ្វើបច្ចុប្បន្នភាពជារៀងរាល់ឆ្នាំ តាមកម្មវិធីវិនិយោគបីឆ្នាំរំកិលប្រចាំឆ្នាំ។
លោកអភិបាលរងបន្តថា វគ្គបណ្ដុះបណ្ដាលនេះ គឺអនុវត្តន៍តាមសេចក្ដីណែនាំបច្ចេកទេសថ្មី សម្រាប់រដ្ឋបាលខេត្តព្រះសីហនុ និងក្រុមការងារកសាងផែនការអភិវឌ្ឍន៍ និងកម្មវិធីវិនិយោគខេត្ត ធ្វើជាមូលដ្ឋានក្នុងការរៀបចំ និងកសាងផែនការអភិវឌ្ឍន៍ជាតិ ស្របតាមគោលនយោបាយអភិវឌ្ឍន៍រយៈពេល៥ឆ្នាំ ២០២០~២០២៤ ជូនក្រុមប្រឹក្សាអាណត្តិទី៣ ឲ្យមានសុក្រិតភាព ជាមួយផែនការអភិវឌ្ឍន៍ជាតិ ស្របតាមគោលនយោបាយអភិវឌ្ឍន៍ជាតិ របស់រាជរដ្ឋាភិបាលនីតិកាលទី៦ នៃរដ្ឋសភា។ ជាពិសេស បំពេញទៅតាមសេចក្ដីត្រូវការអភិវឌ្ឍន៍ខេត្តព្រះសីហនុ ដើម្បីលើកស្ទួយ ជីវភាព របស់ប្រជាពលរដ្ឋក្នុងមូលដ្ឋាន។
ចំពោះលទ្ធផល លោក ឈិន សេងងួន អភិបាលរងខេត្តព្រះសីហនុ រំពឹងទុកថា ឆ្លងកាត់វគ្គបណ្ដុះបណ្ដាលរយៈពេល២ថ្ងៃនេះ ក្រុមការងារអាចកសាងផែនការខេត្ត-ក្រុង-ស្រុក ហើយអ្នកពាក់ព័ន្ធ បានចូលរួម នឹងយល់ដឹងអំពីការកសាងផែនការអភិវឌ្ឍន៍ ៥ឆ្នាំ និងរៀបចំផែនការ ក្នុងអាណត្តិក្រុមប្រឹក្សា របស់ខេត្ត-ក្រុង-ស្រុក ដោយត្រូវធ្វើការបញ្ចូល នូវគោលនយោបាយ និងផែនការអភិវឌ្ឍន៍ របស់វិស័យទាំងឡាយ ដែលប្រតិបត្តិការ ក្នុងផែនការសមត្ថកិច្ចរបស់ ខេត្ត-ក្រុង-ស្រុកនីមួយៗ ឲ្យសម្រេចបានជោគជ័យ៕ ដោយ៖ ដែន សីមា