ខេត្តស្វាយរៀង៖ លោកស្រី ដួង វណ្ណា តំណាងរាស្ត្រមណ្ឌលស្វាយរៀង តំណាងលោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី និងជារដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច និងសហការី នៅថ្ងៃទី១៦ ខែកញ្ញា ឆ្នាំ២០១៩នេះ បានអញ្ជើញជួបសំណេះសំណាលសាកសួរសុខទុក្ខ និងចែកអំណោយ ដល់ ពុក ម៉ែ បងប្អូន គ្រួសារអតីតយុទ្ធជន ស្ថិតនៅដីសម្បទានសង្គមកិច្ចក្នុងភូមិជីកដី ឃុំអណ្តូងត្របែក ស្រុករមាសហែក ខេត្តស្វាយរៀង ។
មានប្រសាសន៍ទៅកាន់បងប្អូនប្រជាពលរដ្ឋ នាឱកាសនោះ លោកស្រី ដួង វណ្ណា បានថ្លែងនូវការកោតសរសើរចំពោះលោក លោកស្រីជាប្រធានមន្ទីរអង្គភាពនានា ក្នុងខេត្តស្វាយរៀង ដែលបានយកចិត្តទុកដាក់ ក្នុងការចុះសួសុខទុក្ខតាមខ្នងផ្ទះរួមទាំងការនាំយកនូវកូនឈើហូបផ្លែ ដែលជាដំណាំផ្សេងៗ មកចែកជូននឹងដាំដុះជាមួយបងប្អូនប្រជាពលរដ្ឋនៅទីនេះ តាមអ្វីដែលរដ្ឋបាលខេត្តបានបែងចែក ។ តាមរយៈ លោកស្រីបងប្អូនអតីតយុទ្ធជនដែលកំពុងរស់នៅទីនេះ បានគោរពថ្លែងនូវការដឹងគុណយ៉ាងជ្រាលជ្រៅ គ្មានថ្ងៃបំភ្លេចបានចំពោះសម្តេចតេជោ ហ៊ុន សែន ដែលបានផ្តល់ដី ផ្តល់ផ្ទះជូនពួកគាត់ ធ្វើឲ្យជីវភាពរបស់ពួកគាត់ដែលពីមុនមានការខ្វះខាត ឥឡូវបានធូរធារមួយកម្រិត និងសូមអរគុណ សម្តេច ដែលតែងតែឲ្យអស់លោក លោកស្រី មន្ត្រី រាជការតាមន្ទីរអង្គភាពនានា ចុះសួរសុខទុក្ខ និងដោះស្រាយការលំបាកជូនពួកគាត់គ្រប់ពេលវេលា។
ក្នុងឱកាសនោះដែរ លោកស្រីក៏បាននាំមកនូវអំណោយជាគ្រឿងឧបភោគបរិភោគមួយចំនួន ចែកជូនគ្រួសារយោធិនពិការ ចំនួន ៨៥ គ្រួសារ ក្នុង ១ គ្រួសារទទួលបាន អង្ករ ២៥ គីឡូក្រាម មីសួរ ១ គីឡូក្រាម ខ្ទឹមស ១ គីឡូក្រាម កាំបិត ១ ក្រម៉ា ១ សារ៉ុង ១ អាវយឺត ២ មួកសុវត្ថិភាព ១ និងថវិកា ៤០.០០០ រៀល ម្ហូបមួយស្រាក់ នំអន្សម ១ បាញ់ត្រាង ១ ដុំ ដោយឡែកគ្រួសារយោធិនពិការ កាយសម្បទា ៤០ នាក់ ទទួលបានថវិកា ១០០.០០០ រៀល ។ ព្រមទាំងបានធ្វើរបង ដាំកូនឈើ និងលើកស្លាក គណបក្សប្រជាជនកម្ពុជា ក្នុងឃុំនោះផងដែរ ៕ដោយ៖វ៉ៃកូ
