ភ្នំពេញ៖ លោក កូយ សៅ អនុប្រធាន និងចៅក្រមស៊ើបសួរនៃសាលាដំបូងរាជធានីភ្នំពេញ នៅថ្ងៃទី១៦ ខែកញ្ញា ឆ្នាំ២០១៩នេះ បានចេញដីកាបង្គាប់ឱ្យសមត្ថកិច្ចគ្រប់ជាន់ថ្នាក់ ស្រាវជ្រាវ និងនាំខ្លួន ទណ្ឌិត សម រង្ស៊ី ដើម្បីយកមកចាត់ការតាមផ្លូវច្បាប់ ចំពោះករណីប្រមាថព្រះមហាក្សត្រ។
ដីកាតុលាការ នៅរសៀលថ្ងៃទី១៦ ខែកញ្ញា ឆ្នាំ២០១៩ បានឱ្យដឹងថា តុលាការក៏បានបញ្ជាដល់ប្រធានពន្ធនាគារ ឬមណ្ឌលឃុំខ្លួន នៃអគ្គនាយកដ្ឋនពន្ធនាគារ ក្រសួងមហាផ្ទៃ ឱ្យទទួល និងឃុំខ្លួនបុគ្គលនេះ និងត្រូវនាំខ្លួនបុគ្គលនេះ ទៅបង្ហាញមុខដល់ចៅក្រមស៊ើបសួរ ក្នុងរយៈពេលយ៉ាងខ្លីបំផុត។
ចំណែកលោក គឹម សន្តិភាព រដ្ឋលេខាធិការ និងជាអ្នកនាំពាក្យក្រសួងយុត្តិធម៌ នៅថ្ងៃទី១៦ ខែកញ្ញា ឆ្នាំ២០១៩នេះ បានលើកឡើងថា ករណីសំណុំរឿងថ្មីនៃបទប្រមាថចំពោះព្រះមហាក្សត្រ អតិបរមានៃទោសដាក់ពន្ធនាគារចំពោះទណ្ឌិត សម រង្ស៊ី នឹងកើនទ្វេដង (១០ឆ្នាំ) ព្រោះជាករណីមិនរាងចាលក្នុងការប្រព្រឹត្តបទ ប្រមាថចំពោះអង្គព្រះមហាក្សត្រ ប្រសិនតុលាការរកឃើញទោសកំហុសនេះ។
ទណ្ឌិត សម រង្ស៊ី មេក្រុមប្រឆាំងជ្រុលនិយម ត្រូវបានតុលាការផ្តន្ទាទោសចំនួន៤ឆ្នាំ រួចម្តងហើយ កាលខែមិថុនា ឆ្នាំ២០១៩ ពីបទ ប្រមាថចំពោះអង្គព្រះមហាក្សត្រ ហើយទណ្ឌិតរូបនេះក៏ត្រូវបានរងការចោទប្រកាន់ក្នុងបទល្មើសនេះដដែល នៅខែកញ្ញា ឆ្នាំ២០១៩នេះ។ សរុបជារួមទណ្ឌិត សម រង្ស៊ី មានសំណុំរឿងចំនួន២ ពាក់ព័ន្ធនឹងបទប្រមាថអង្គព្រះមហាក្សត្រ។
លោក គឹម សន្តិភាព បានបញ្ជាក់ថា យោងតាមក្រមព្រហ្មទណ្ឌ នៃព្រះរាជាណាចក្រកម្ពុជា មាត្រា៨៣ មាត្រា៨៨ មាត្រា ៤៣៧ស្ទួន ទណ្ឌិតរូបនេះ ស្ថិតក្នុងភាពមិនរាងចាល នៃការប្រព្រឹត្តបទល្មើស “បទប្រមាថចំពោះអង្គព្រះមហាក្សត្រ” ហេតុនេះអតិបរមានៃទោសដាក់ពន្ធនាគារនឹងកើនឡើងផ្ទេរដង ពី៥ឆ្នាំទៅ១០ឆ្នាំ ប្រសិនបើតុលាការរកឃើញនូវទោសកំហុសនេះម្តងទៀត៕ដោយ៖បញ្ញាស័ក្តិ
