ភ្នំពេញ៖នៅទីស្តីការក្រសួងកសិកម្ម រុក្ខាប្រមាញ់ និងនេសាទ នាថ្ងៃទី១៦ ខែកញ្ញា ឆ្នាំ២០១៩ លោករដ្ឋមន្ត្រី វេង សាខុន បានអនុញ្ញាតឲ្យលោក Luke Arnold ទទួលបន្ទុកកិច្ចការទូទៅនៃស្ថានទូតអូស្ត្រាលីប្រចាំព្រះរាជាណាចក្រកម្ពុជា និងសហការីចូលជួបដើម្បី៖ ទី១. ពិនិត្យលើវឌ្ឍនភាពនៃការអនុវត្តគម្រោងស្តីពី “កម្មវិធីខ្សែសង្វាក់តម្លៃកសិកម្មកម្ពុជា” ទី២. ស្វែងរកទស្សននិងទិដៅយុទ្ធសាស្ត្រ និងគំតថ្មីៗដើម្បីតម្រង់ទិសក្នុងការអនុវត្តគម្រោងនេះ ទី៣. ស្នើសុំមតិ និងយោបល់ពាក់ព័ននឹងកិច្ចសន្ទនាត្រីភាគីរវាង កម្ពុជា-អូស្ត្រាលី-ចិន និងទី៤. ធ្វើការពិភាក្សាលើទិសដៅអនាគតសម្រាប់កម្មវិធីជំនួយនៅកម្ពុជា។
ជាកិច្ចស្វាគមន៍ តាមរយ:លោក Luke Arnold លោករដ្ឋមន្ត្រីបានសម្តែងអំណរអរគុណចំពោះរដ្ឋាភិបាល និងប្រជាជនអូស្ត្រាលីដែលបាន និងបន្តជួយឧបត្ថម្ភ គាំទ្រលើការអភិវឌ្ឍប្រទេសកម្ពុជា។ ចំពោះវិស័យកសិកម្ម រដ្ឋាភិបាលអូស្ត្រាលីក៏បានផ្តល់កិច្ចសហប្រតិបត្តិការយ៉ាងសំខាន់ផងដែរ តាមរយៈការអនុវត្តគម្រោងជាច្រើនជាពិសេសគម្រោងស្តីពី កម្មវិធីខ្សែសង្វាក់តម្លៃកសិកម្មកម្ពុជា (CAVAC) ដែលគម្រោងនេះបាននិងកំពុងចូលរួមអនុវត្តន៍គោលនយោបាយ និងផែនការអភិវឌ្ឍន៍វិស័យកសិកម្មរបស់ក្រសួងយ៉ាងមានប្រសិទ្ធភាព។ លោកបានបន្តថា គម្រោងទាំងអស់នេះ ពិតបានចូលរួមប្រើប្រាស់ធនធាន និងសក្ដានុពល ដែលមានស្រាប់សំដៅលើកកម្ពស់ផលិតភាព ពិពិធភាវូបនីយកម្ម និងពាណិជ្ជូបនីយកម្មកសិកម្ម ដើម្បីបង្កើតការងារ ធានាសន្តិសុខស្បៀងនិងអាហារូបត្ថម្ភ និងបង្កើនការនាំចេញកសិផល ដើម្បីលើកកម្ពស់កម្រិតជីវភាព កាត់បន្ថយភាពក្រីក្រ និងចំណាកស្រុក ពិសេសជំរុញកំណើនសេដ្ឋកិច្ចជាតិ។ ស្ថិតក្នុងបរិបទនេះ ក្រសួងបានខិតខំស្វែងរកដៃគូជាតិ និងអន្តរជាតិ ដើម្បីចូលរួមសហការលើការងារពិសោធន៍ស្រាវជ្រាវ ផ្សព្វផ្សាយបច្ចេកទេសដាំដុះ ចិញ្ចឹមសត្វ ត្រី ការជ្រើសរើស បង្កាត់ ផ្លាស់ប្តូរ និងប្រើប្រាស់ពូជសត្វ និងដំណាំ ការប្រើប្រាស់ធាតុចូលឲ្យមានប្រសិទ្ធភាព ឆ្លើយតបទៅតាមតម្រូវការទីផ្សារទាំងបរិមាណ គុណភាព សុវត្ថិភាព និងស្តង់ដារទីផ្សារអន្តរជាតិក្នុងទិសដៅនាំចេញកសិផលកម្ពុជានាពេលអនាគត។
ជាការឆ្លើយតប លោក Luke Arnold បានឯកភាព និងយល់ស្របតាមអ្វីដែលលោករដ្ឋមន្ត្រីបានជម្រាបជូនខាងលើ ព្រោះជាក់ស្តែងប្រជាកសិករ ដែលស្ថិតក្នុងគោលដៅរបស់គម្រោង បាននិងកំពុងមានការកែប្រែយ៉ាងវិជ្ជមានទាំងទម្លាប់ កម្រិតជីវភាព កំណើនចំណូល និងសេដ្ឋកិច្ចគ្រួសារ ស្តែងចេញឲ្យឃើញតាមរយ:ពួកគាត់មានរបររឹងមាំ ក្មេងៗបានទៅសិក្សារៀនសូត្រ និយាយរួម ស្ថានភាពរស់នៅក្នុងសង្គមគ្រួសារត្រូវបានផ្លាស់ប្តូរជាបន្តបន្ទាប់។ ម្យ៉ាងវិញទៀត អ្វីដែលឯកឧត្តរដ្ឋមន្ត្រីបានលើកឡើងពាក់ព័ន្ធនិងការអភិវឌ្ឍវិស័យកសិកម្ម គឺពិតជាស្របតាមផែនការយុទ្ធស្រាយនៃជំនួយរបស់រដ្ឋាភិបាលអូស្ត្រាលីថ្មី ដែលផែនការនេះផ្តោតជាសំខាន់លើការបង្កើនភាពប្រកួតប្រជែង និងការធ្វើពិពិធកម្មកសិកម្ម ដោយសំដៅលើការធ្វើពិពិធភាវូបនីយកម្មកសិកម្ម ពាណិជ្ជូបនីយកម្មកសិកម្ម បង្កើនផលិតភាព ការកែច្នៃ ស្តង់ដារគុណភាព ជារួមបង្កើនខ្សែសង្វាក់ផលិតកម្ម និងតម្លៃ។
លោករដ្ឋមន្ត្រីបានឆ្លើយតបយ៉ាងមោទនថា នេះគឺអ្វីដែលរូបលោក និងក្រសួងចង់បាន ហើយក៏កំពុងជំរុញ និងអនុវត្តផងដែរតាមរយៈការធ្វើទំនើបកម្មកសិកម្ម ការធ្វើពិពិធកម្មកសិកម្ម និងផលិតកម្មកសិកម្មតាមកិច្ចសន្យា។ ទាំងអស់នេះ ទាមទារឲ្យមានកិច្ចសហការពេញលេញពីគ្រប់ភាគីពាក់ព័ន្ធគឺ រដ្ឋ វិស័យឯកជន ដៃគូអភិវឌ្ឍន៍ សហគមន៍កសិកម្ម ដោយត្រូវធ្វើយ៉ាងណាបង្កើនផលិតភាព ជាមួយការប្រកួតប្រជែង និងកាត់បន្ថយថ្លៃដើម។ លោកសង្ឃឹម និងជឿជាក់ថា ភាគីអូស្ត្រាលីនឹងបន្តផ្តល់កិច្ចសហប្រតិបត្តិការយ៉ាងល្អប្រសើរនេះមកភាគីកម្ពុជា ជាប្រយោជន៍ដល់វិស័យកសិកម្មទាំងមូល និងប្រជាកសិករយើង៕ ដោយ៖កូឡាប