ភ្នំពេញ៖ រដ្ឋបាលរាជធានីភ្នំពេញ បានចេញសេចក្តីជូនដំណឹង ស្តីពីការជីកផ្លូវកប់បណ្តាញខ្សែកាប្ដិ៍អគ្គិសនី លើគម្រោងដាក់ខ្សែកាប្ដិ៍អគ្គិសនីកប់ដីថ្មីចេញពីតំបន់ភ្លើង OP ០៨ ចូលទៅតំបន់ភ្លើង S ៨១១ ក្នុងរាជធានីភ្នំពេញ។
រដ្ឋបាលរាជធានីភ្នំពេញ សូមជម្រាបជូនដំណឹងដល់បងប្អូនប្រជាពលរដ្ឋ ក្នុងរាជធានីភ្នំពេញទាំងអស់ ឱ្យបានជ្រាបថា ដោយសារកំណើន នៃការអភិវឌ្ឍក្នុងរាជធានីភ្នំពេញ និងដោយមានតម្រូវការចាំបាច់
នៃការប្រើប្រាស់ថាមពលអគ្គិសនី កើនឡើងយ៉ាងខ្លាំងនោះ រដ្ឋបាលរាជធានីភ្នំពេញ បានអនុញ្ញាតជូនអគ្គិសនីកម្ពុជា
ធ្វើការជីកផ្លូវកប់បណ្តាញខ្សែកាប្ដិ៍អគ្គិសនីតាមចិញ្ចើមផ្លូវលេខ ២២២ ២៣២ និងផ្លូវលេខ ១១១ និងឆ្លងផ្លូវលេខ
១១១ ផ្លូវសុកហុក និងផ្លូវឧកញ៉ា នូ កន (ផ្លូវលេខ ១០៥) ដូចមានបង្ហាញជូនក្នុងឧបសម្ព័ន្ធតម្រាយផ្លូវ និងផែនទីផ្លូវ
ដែលមានស្រាប់ ។
ការអនុវត្តគម្រោង នឹងត្រូវចាប់ផ្តើមពីថ្ងៃជូនដំណឹងនេះ ដូច្នេះដើម្បីរក្សាបាននូវសណ្តាប់ធ្នាប់របៀបរៀបរយ កាត់បន្ថយជាអតិបរមានូវគ្រោះថ្នាក់ជាយថាហេតុ និងបញ្ចៀសការកកស្ទះចរាចរណ៍ក្នុងតំបន់ការដ្ឋាននោះ រដ្ឋបាលរាជធានីភ្នំពេញ ស្នើសុំឱ្យបងប្អូនប្រជាពលរដ្ឋជាម្ចាស់លំនៅឋាន ម្ចាស់អាជីវកម្ម ក្រុមហ៊ុន អង្គភាពរដ្ឋ
និងអ្នកពាក់ព័ន្ធទាំងអស់ ដែលស្ថិតនៅសងខាងតម្រាយផ្លូវជីកបណ្តាញ ចូលរួមសហការបង្កលក្ខណៈងាយស្រួល
ដល់ក្រុមការងារ ដើម្បីឱ្យការអនុវត្តគម្រោងនេះ ប្រព្រឹត្តទៅដោយរលូន និងទទួលបានលទ្ធផលតាមការគ្រោងទុក។
រដ្ឋបាលរាជធានីភ្នំពេញ សង្ឃឹមជឿជាក់ថា បងប្អូនប្រជាពលរដ្ឋ អង្គភាពរដ្ឋ បណ្តាក្រុមហ៊ុនឯកជន
ក៏ដូចជាអ្នកពាក់ព័ន្ធទាំងអស់ផ្តល់ការអធ្យាស្រ័យ និងចូលរួមសហការអនុវត្តឱ្យបានម៉ឺងម៉ាត់តាមខ្លឹមសារខាងលើនេះ
ប្រកបដោយស្មារតីទទួលខុសត្រូវខ្ពស់ ៕ដោយ៖កូឡាប