សៀមរាប៖ នៅព្រឹកថ្ងៃទី១៧ ខែកញ្ញា ឆ្នាំ២០១៩ នៅខេត្តសៀមរាប សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ ក្នុងពិធីបើកកិច្ចប្រជុំថ្នាក់មន្រ្តីជាន់ខ្ពស់ ការងារលើកទី៥ ក្នុងក្របខ័ណ្ឌក្រុមប្រទេស CLMTV រួមមាន៖ កម្ពុជា ឡាវ មីយ៉ាន់ម៉ា ថៃ និងវៀតណាម ក្រោមប្រធានបទ “ការឆ្ពោះទៅកាន់កិច្ចគាំពារពលករទេសន្តប្រវេសន៍នៅក្នុងប្រទេស CLMTV៖ កិច្ចសហប្រតិបត្តិការវិស័យសន្តិសុខសង្គម” ដែលកម្មវិធីនេះត្រូវបានរៀបចំនៅសណ្ឋាគារអប្សរាផាឡេស ខេត្តសៀមរាប។
សម្តេចតេជោ ថ្លែងថា CLMTV អាចពិភាក្សាគ្នា ដើម្បីសម្រួលដល់ពលករដែលកំពុងធ្វើការនៅបរទេស ហើយផ្លាស់ប្តូរទៅប្រទេសផ្សេងក្នុងក្របខ័ណ្ឌនេះ ឬចូលមកកម្ពុជា អាចរក្សាទុកនៅអតីតភាពការងារដដែល ។ សម្ដេច ហ៊ុន សែន បានថ្លែងថា ពេលអ្នកស្រី អោង សាន ស៊ូជី អំពាវនាវឱ្យពលករខ្លួនចេញពីថៃទៅស្រុកវិញ តើរហូតមកដល់ពេលនេះ មានពលករមីយ៉ាន់ម៉ាប៉ុន្មាន បានត្រឡប់ទៅប្រទេសខ្លួនវិញ រឿងនេះបក្សប្រឆាំងកម្ពុជាបែរជាវាយប្រហារសម្តេច ហើយពលករមីយ៉ាន់ម៉ា មិនបានទៅផ្ទះតាមការអំពាវនាវរបស់ អ្នកស្រី អោង សានស៊ូជីទេ មានតែទៅធ្វើការនៅប្រទេសថៃ កាន់តែច្រើន ដោយសារតែតម្លៃពលកម្មនៅមីយ៉ាន់ម៉ាតិចតួច។
សម្តេចតេជោ ហ៊ុន សែន ជំរុញឱ្យ CLMTV សិក្សាធ្វើយ៉ាងណាឱ្យពលករនៅក្រៅប្រទេស ទទួលបានរបបសន្តិសុខសង្គម ដែលពួកគេនៅតែបន្តទទួលបាន អតីតភាពការងារ ពេលផ្លាស់ប្តូរទៅប្រទេសផ្សេង។ ឥឡូវនេះ ការចល័តពលករ មិនមែនធ្វើត្រឹមអាស៊ានទេ ពលករខ្លះ បានទៅធ្វើការដល់ប្រទេសនៅមជ្ឈបូព៌ាឯណោះ។ នៅប្រទេសណាក៏ត្រូវធ្វើការដែរ នៅខ្មែរក៏ត្រូវធ្វើការដែរ ទើបមានបាយហូប៕ដោយ៖កូឡាប
