ភ្នំពេញ ៖ នៅព្រឹកថ្ងៃអង្គារ ទី១៧ ខែកញ្ញា ឆ្នាំ២០១៩នេះ លោក នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអញ្ជើញជាអធិបតីភាពដឹកនាំកិច្ចប្រជុំផ្សព្វផ្សាយសភាពការណ៍សន្តិសុខ និងសណ្តាប់ធ្នាប់សាធារណៈ ។
កិច្ចប្រជុំប្រារព្ធធ្វើឡើងនៅសាលប្រជុំក្រសួងមហាផ្ទៃ ដោយមានការចូលរួមពីគ្រប់នាយកដ្ឋាន ចំណុះក្រោមអគ្គស្នងការដ្ឋាននគរបាលជាតិ ដែលមានសមាជិកចូលរួមប្រមាណជិត១.០០០នាក់ ។
លោកអគ្គស្នងការ បានថ្លែងថា កិច្ចប្រជុំនេះ ក្នុងគោលបំណង គឺដើម្បីផ្សព្វផ្សាយនូវស្ថានការណ៍ថ្មីៗមួយចំនួន ដល់បណ្តាថ្នាក់ដឹកនាំអង្គភាពនគរបាលជាតិពាក់ព័ន្ធ សម្រាប់បន្តយកទៅផ្សព្វផ្សាយព័ត៌មានទាំងអស់ ទៅដល់មន្រ្តីក្រោមឱវាទរបស់ខ្លួន ដើម្បីពង្រឹងសមត្ថភាព គុណភាពដល់កងកម្លាំងនគរបាលទាំងអស់ ឲ្យយកចិត្តទុកដាក់ក្នុងការពង្រឹងសន្តិសុខ និងការពារផលប្រយោជន៍របស់ប្រជាពលរដ្ឋ ក្នុងការចូលរួមថែរក្សាការពារ សន្តិសុខ សណ្តាប់ធ្នាប់សង្គម ពិសេសគឺយកចិត្តទុកដាក់នៅក្នុងរដូវបុណ្យកាន់បិណ្ឌ និងភ្ជុំបិណ្ឌ នៅតាមវត្តអារាម និងទីប្រជុំជននានា ដែលនៅតាមមូលដ្ឋានកម្លាំងនគរបាល និងប៉ុស្តិ៍រដ្ឋបាលត្រូវមានការចាត់ចែងផែនការឈរជើងដើម្បីធានាដោះស្រាយ អន្តរាគមន៍ទាន់ហេតុការណ៍ប្រសិនបើមានសភាពការណ៍ណាមួយកើតឡើងដោយចៃដន្យ៕ ដោយ៖កូឡាប