ខេត្តស្វាយរៀង៖ នារសៀលថ្ងៃទី ១៦ ខែកញ្ញា ឆ្នាំ ២០១៩ លោកស្រី សំ ថាវី អភិបាលរងស្រុក និងជាប្រធានអនុសាខាកាកបាទក្រហមកម្ពុជាស្រុកចន្ទ្រា បានដឹកនាំក្រុមការងារ នាំអំណោយមនុស្សធម៌ចុះសួរសុខទុក្ខ និងផ្តល់អំណោយដល់គ្រួសារក្រីក្រមានឈ្មោះ សែម សិ ភេទស្រី អាយុ១៨ឆ្នាំមានជំងឺ មហារីកច្រមុះ រស់ភូមិចេកនៅឃុំ សំរោង ស្រុកចន្ទ្រា ខេត្តស្វាយរៀង។
ក្នុងឱកាសនោះ លោកស្រីអភិបាលរងស្រុកនិងជាប្រធានអនុសាខាកាកបាទក្រហមកម្ពុជាស្រុក បាននាំមកនូវការផ្តាំផ្ញើសាកសួរសុខទុក្ខពីសំណាក់លោកនាយឧត្តមសេនីយ៍ ម៉ឹង សំផន ប្រធានក្រុមការងារថ្នាក់កណ្តាល ចុះជួយស្រុកចន្ទ្រា និងលោក ម៉ែន វិបុល អភិបាលនៃគណ:អភិបាលខេត្តស្វាយរៀង និងជា ប្រធានគណៈកម្មាធិការសាខាខេត្ត ដែលជានិច្ចកាលលោកតែងតែគិតគូរពីសុខទុក្ខរបស់ ប្រជាពលរដ្ឋគ្រប់ពេលវេលា ពិសេសចាស់ជរាគ្មានទីពឹង ជនពិការ កុមារកំព្រា អ្នករស់នៅជាមួយមេរោគអេដស៍ជាដើម។ លោកស្រី សំ ថាវី អភិបាលរងស្រុក និងប្រធានអនុសាខាស្រុក បានបញ្ជាក់ថា ជាការពិតណាស់អំណោយមនុស្សធម៌នៅថ្ងៃនេះ គឺមានចំនួនតិចតួច ពិតមែនមិនអាចបំពេញតាមតម្រូវការរបស់បងប្អូនបានយូរអង្វែងនោះទេ ប៉ុន្តែក៏ជាចំណែកមួយសម្រាប់ជួយដោះស្រាយ និងទ្រទ្រង់ជីវភាពរបស់បងប្អូនបានមួយកម្រិត ។
អំណោយដែលបានផ្តល់ជូន១គ្រួសារ អង្ករ ៥០ គីឡូក្រម.មី ១ កេស ត្រីខ ១ យួរ ទឹកត្រី ១ យួរ ទឹកស៊ីអ៊ីវ ១ យួរ និងថវិកា ១២០.០០០ រៀល ។ ជាអំណោយរបស់លោកនាយឧត្តមសេនីយ៍ ម៉ឹង សំផន និងលោកស្រី ៕ ដោយ៖ វ៉ៃកូ
