ភ្នំពេញ ៖ អគ្គនាយកដ្ឋានគយនិងរដ្ឋករកម្ពុជា បានឲ្យដឹងថា កាកសំណល់ប្លាស្ទិកចំនួន៨៣កុងតឺន័រ ត្រូវបានបញ្ជូនត្រឡប់ទៅប្រទេសដើមវិញរួចរាល់អស់ហើយកាលពីចុងសប្តាហ៍មុន បន្ទាប់ពីមានវិធានការរដ្ឋបាល បង់ប្រាក់ពិន័យ និងច្បាប់របស់ប្រទេសកម្ពុជាយ៉ាងតឹងរ៉ឺង ។
ក្នុងសេចក្តីប្រកាសព័ត៌មានចុះទី១៦ ខែកញ្ញា ឆ្នាំ២០១៩ អគ្គនាយកដ្ឋានគយ និងរដ្ឋាករកម្ពុជាបានឲ្យដឹងថា កាលពីថ្ងៃទី១៥ ខែកញ្ញា ក្រុមហ៊ុនឈ្មោះ CHUNGYUEN PLASTIC MANUFACTURE CO.,LTD បានដឹកសំរាម៦៩កុងតឺន័រ ដែលនៅសល់ទៅប្រទេសដើមវិញ រួចរាល់ហើយ។ ចំណែកសំរាម១៤កុងតឺន័រទៀត បានដឹកចេញកាលពីថ្ងៃទីថ្ងៃទី២០ ខែសីហា ប៉ុន្តែមិនបានបញ្ជាក់ថាដឹកទៅប្រទេសណាមួយនោះទេ។
អគ្គនាយកដ្ឋានគយ និងរដ្ឋាករកម្ពុជា បញ្ជាក់ថា ម្ចាស់ក្រុមហ៊ុន CHUNGYUEN PLASTIC MANUFACTURE CO.,LTD បានបំពេញលក្ខខណ្ឌដែលបានសម្រេចដោយអាជ្ញាធរកម្ពុជាអស់ហើយ និងបង់ប្រាក់ពិន័យចូលកញ្ចប់ថវិកាជាតិគ្រប់ចំនួនផងដែរ។
អគ្គនាយកដ្ឋានគយ និងរដ្ឋាករកម្ពុជា ឱ្យដឹងថាគម្រោងនាំសំរាមកាកសំណល់ប្លាស្ទិកត្រឡប់ទៅកាន់ប្រទេសដើមវិញនោះ ធ្លាប់សុំពន្យារទៅថ្ងៃទី២៥ ខែតុលា ដោយមូលហេតុអាកាសធាតុ និងការកកស្ទះទំនិញច្រើន។
ក្រុមហ៊ុន CHUNGYUEN PLASTIC MANUFACTURE CO.,LTD បាននាំចូលសំរាមទាំង៨៣កុងតឺន័រ មកកម្ពុជាចាប់ពីខែកញ្ញា ឆ្នាំ២០១៨ ដល់ខែមករា ឆ្នាំ២០១៩ ហើយក្រុមហ៊ុននេះត្រូវបានអាជ្ញាធរកម្ពុជាពិន័យជាប្រាក់ជិត ២៥៥.០០០ ដុល្លារ។
កាលពីថ្ងៃទី១៧ ខែកក្កដា សមត្ថកិច្ចកម្ពុជា បានបើកទូកុងទឺន័រក្នុងកំពង់ផែស្វយ័តខេត្តព្រះសីហនុ រកឃើញសំរាមប្លាស្ទិកចំនួន ៨៣កុងទឺន័រ ដែលមានទម្ងន់ជិត ១.៦០០តោន។ អាជ្ញាធរកម្ពុជា បានអះអាងថាសំរាមទាំងនោះមានប្រភពមកពីសហរដ្ឋអាមេរិក និងកាណាដា។
យោងតាមសេចក្តីប្រកាសព័ត៌មានរបស់អគ្គនាយកដ្ឋានគយនិងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុ នៅថ្ងៃទី១៦ កញ្ញា ឆ្នាំ២០១៩ នេះ បានបញ្ជាក់ឲ្យសាធារណជន និងបណ្តាញផ្សព្វផ្សាយព័ត៌មានទាំងអស់ ជ្រាបពីវឌ្ឍនភាពនៃការដឹកជញ្ជូនកាកសំណល់ប្លាស្ទិកចំនួន៨៣កុងតឺន័រ ត្រឡប់ទៅប្រទេសដើមវិញ ដែលត្រូវបានលួចនាំចូលដោយ ខុសច្បាប់មកកម្ពុជា ដោយក្រុមហ៊ុន CHUNGYUEN PLASTIC MANUFACTURE CO., LTD ។
សេចក្តីប្រកាសព័ត៌មាន បានបញ្ជាក់ថា អាជ្ញាធរមានសមត្ថកិច្ចបាន សម្រេចដាក់បន្ទុក លើក្រុមហ៊ុនដែលប្រព្រឹត្តល្មើសរួមមានការបង់ពិន័យជាប្រាក់ចូលថវិកាជាតិ និងតម្រូវឲ្យនាំចេញ នូវកាកសំណល់ប្លាស្ទិកទាំងនេះ ត្រឡប់ទៅប្រទេសដើមវិញ ហើយទន្ទឹមនេះសាមី ក្រុមហ៊ុនក៏ បានបំពេញនូវកាតព្វកិច្ចដូចដោយបានបង់ប្រាក់ពិន័យចូលថវិកាជាតិគ្រប់ចំនួន ព្រមទាំងបានដឹកជញ្ជូន កាកសំណល់ប្លាស្ទិកចេញពីកម្ពុជាចំនួន១៤កុងតឺន័រ នៅថ្ងៃទី២០ ខែសីហា ឆ្នាំ២០១៩ និងបាន បន្តដឹកចេញពីកម្ពុជានូវកាកសំណល់ប្លាស្ដិចចំនួន៦៩កុងតឺន័រ ដែលនៅសល់កាលថ្ងៃទី១៥ ខែកញ្ញា ឆ្នាំ២០១៩។
អគ្គនាយកដ្ឋានគយនិងរដ្ឋាករកម្ពុជា ក្រុមហ៊ុនដែលលូចនាំចូលកាកសំណល់ហាមនេះ បានបំពេញ តាមលក្ខខណ្ឌទាំងអស់ដែលបានសម្រេចដោយអាជ្ញាធរមានសមត្ថកិច្ចចប់សព្វគ្រប់។ កាលពីថ្ងៃទី១៦ ខែកក្កដា ឆ្នាំ២០១៩ ក្រសួងបរិស្ថាន សហការជាមួយអគ្គនាយកដ្ឋានគយ និងរដ្ឋាករ ចុះគាស់ទូរកុងទឺន័រទាំងនោះ ដើម្បីពិនិត្យជាក់ស្ដែងនៅក្នុងកំពង់ផែខេត្តព្រះសីហនុ ក្រោយពីមានការ សង្ស័យលើទំនិញដែលមាននៅក្នុងទូកុងទឺន័រនោះ៕ ដោយ៖កូឡាប