តាកែវ៖ រដ្ឋបាលខេត្តតាកែវតាមរយៈមន្រ្តីជាន់ខ្ពស់របស់ខ្លួន បានធ្វើការជំរុញទៅដល់មន្ទីរ អង្គភាពនៅជុំវិញខេត្ត ដែលចាត់ឲ្យមន្រ្តីរបស់ខ្លួន ឲ្យមកប្រចាំការនៅច្រកចេញចូលតែមួយ នៅរដ្ឋបាលខេត្តតាកែវ ត្រូវតែចូលរួមសហការគ្នាជាមួយនឹងមន្រ្តីនៅការិយាល័យច្រកចេញចូលតែមួយរបស់ខេត្ត លើការងារ បម្រើ សេវាសាធារណៈជូនប្រជាពលរដ្ឋ ឲ្យបានល្អប្រសើរ និងឆាប់រហ័សបំផុត។
ថ្លែងនៅក្នុងឱកាសបើកកិច្ចប្រជុំត្រួតពិនិត្យការផ្ដល់សេវារដ្ឋបាល អង្គភាពច្រកចេញចូលតែមួយថ្នាក់ខេត្ត ការិយាល័យ និងយន្តការច្រកចេញចូលតែមួយរបស់ ក្រុង ស្រុក កាលពីថ្ងៃទី១៦ ខែកញ្ញា ឆ្នាំ២០១៩ លោក លី សាវ៉េត អភិបាលរងខេត្តតាកែវ បានមានប្រសាសន៍ថា ច្រកចេញចូលតែមួយនៅរដ្ឋបាលខេត្តនេះ វាជាយន្តការដើម្បីបង្កើនប្រសិទ្ធភាព ការងារនៅរដ្ឋបាលថ្នាក់ក្រោមជាតិ ធ្វើយ៉ាងណាឲ្យការបម្រើសេវាសាធារណៈ ជូនប្រជាពលរដ្ឋ កាន់តែមានប្រសិទ្ធភាព លឿននិង រហ័ស ពិសេសឲ្យប្រជាពលរដ្ឋពេញ ចិត្តចំពោះ ការមកទទួលសេវា នៅច្រកចេញចូលតែមួយនៅក្នុងរដ្ឋបាលខេត្ត ។
លោក លី សាវ៉េត បានបន្ថែមទៀតថា នៅក្នុងកម្មវិធីជាតិកំណែទម្រង់ រដ្ឋបាលសាធារណៈ ក្នុងឆ្នាំ២០១៩ដល់ឆ្នាំ២០៣០នេះ គោលដៅសំខាន់នៃការកំណែទម្រង់នេះ គឺដើម្បី ធានា ឲ្យមានរដ្ឋបាលសាធារណៈមួយ ដែលស្អាតស្អំ ឆ្លាតវៃ ថ្លៃ នឹងផ្តោតសំខាន់ប្រជាជនជាស្នូល ប្រកបដោយបរិយាប័ន្ន សមធម៌ និងយុត្តិធម៌សង្គម ពិសេសនោះ គឺ ការអនុវត្ត តួនាទី ជាអាជ្ញាធរ គឺមានគោលដៅ៣ដែលយើងត្រូវធ្វើ គឺការការពារ សន្តិសុខ និងសណ្តាប់ ធ្នាប់ សាធារណៈជូនប្រជាពលរដ្ឋ ការអភិវឌ្ឍមូលដ្ឋាន និងការបម្រើសេវាសាធារណៈ ឲ្យបានល្អ ឆាប់រហ័ស ជូនប្រជាពលរដ្ឋ ៕ដោយ៖ តាកែវ