សហរដ្ឋអាមេរិចបានធ្វើការបញ្ជាក់ពីទីតាំងនៅក្នុងប្រទេសអ៊ីរ៉ង់ កន្លែងដែលយន្តហោះដ្រូន និងមីស៊ីលត្រូវបានគេបាញ់ចេញទៅលើរោងចក្រផលិតប្រេងរបស់ប្រទេសអារ៉ាប៊ី សៅអូឌី កាលពីថ្ងៃសៅរ៍កន្លងទៅនេះ។
មន្រ្តីអាមេរិចបញ្ជាក់ប្រាប់សារព័ត៌មានថា ទីតាំងដែលដ្រូន និងមីស៊ីលត្រូវបានបាញ់ចេញនោះ គឺស្ថិតនៅភាគខាងត្បូងប្រទេសអ៊ីរ៉ង់។
មន្រ្តីជាន់ខ្ពស់អាមេរិចបាននិយាយថា ក្រុមការងាររបស់អាមេរិចបានទៅដល់កន្លែងវាយប្រហារស្ថិតនៅតំបន់ផលិតប្រេង Abqaiq និងបានធ្វើការបញ្ជាក់ពីយន្តហោះដ្រូន និងមីស៊ីលដែលត្រូវបានគេប្រើប្រាស់ក្នុងការវាយប្រហារ។
បំណែកទាំងនោះនឹងត្រូវគេធ្វើការវិភាគ និងប្រើប្រាស់ដើម្បីបង្ហាញពីករណីដែលថា អ៊ីរ៉ងជាអ្នកនៅពីក្រោយការវាយប្រហារនោះ។
ចំណែកអនុប្រធានាធិបតីអាមេរិច លោក Mike Pence បាននិយាយកាលពីថ្ងៃអង្គារម្សិលមិញថា “អាមេរិចកំពុងតែវាយតម្លៃភស្ថុតាង” ហើយរដ្ឋមន្រ្តីការបរទេស Mike Pompeo កំពុងធ្វើដំណើរទៅកាន់អារ៉ាប៊ី សៅអូឌី ដើម្បីពិភាក្សាគ្នាពីការវាយបកវិញ។
លោកបញ្ជាក់ថា “អាមេរិចនឹងចាត់វិធានការគ្រប់បែបយ៉ាងដែលចាបាច់ ដើម្បីការពារប្រទេស និងកងទ័ពយើង និងសម្ព័ន្ធមិត្តរបស់យើងនៅឈូងសមុទ្រ”។
ទោះយ៉ាងណា អ៊ីរ៉ង់បានធ្វើការបដិសេធថា ខ្លួនជាប់ពាក់ព័ន្ធនឹងការវាយប្រហារនោះ។
រដ្ឋមន្រ្តីការបរទេសអ៊ីរ៉ង់លោក Javad Zarif បានធ្វើការបង្ហោះនៅលើ Twitter ថា “យេមែនជាអ្នកទទួលខុសត្រូវលើការវាយប្រហារនោះ”។ លោកបញ្ជាក់ថា ការដាក់កំហុសលើអ៊ីរ៉ង់នឹងមិនអាចផ្លាស់ប្តូរស្ថានការណ៍បាននោះទេ។
សូមបញ្ជាក់ថា បន្ទាប់ពីមានការវាយប្រហារកន្លែងផលិតប្រេងនៅអារ៉ាប៊ី សៅអូឌី តម្លៃប្រេងឆៅបានហក់ឡើងជិត ២០ភាគរយ ដោយមានតម្លៃ ៧១,៩៥ដុល្លារក្នុងមួយធុង។
រដ្ឋមន្រ្តីថាមពលអារ៉ាប៊ី សៅអូឌី បញ្ជាក់ថាសង្វាក់ផលិតប្រេងនឹងត្រូវទៅកាន់ដំណើរការពេញលេញវិញ នៅចុងខែនេះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC