មន្រ្តីជាន់ខ្ពស់មួយរូបរបស់ក្រុមសកម្មប្រយុទ្ធតាលីបង់ បានថ្លែងប្រាប់សារព័ត៌មាន BBC ថា “ទ្វារនៅបើកចំហរ” សម្រាប់ប្រធានាធិបតីអាមេរិច ដូណាល់ ត្រាំ បើចង់បន្តការចរចាសន្តិភាពនៅពេលខាងមុខ។
ប្រធានក្រុមចរចារបស់ក្រុមតាលីបង់ឈ្មោះ Sher Mohammad Abbas Stanikzai បានបញ្ជាក់ថា “ការចរចារនៅតែជាវិធីតែមួយគត់សម្រាប់សន្តិភាពនៅអាហ្គានីស្ថាន”។
ការបញ្ជាក់របស់អ្នកចរចារូបនោះ កើតឡើងតែមួយសប្តាហ៍ប៉ុណ្ណោះ ក្រោយពេលលោក ដូណាល់ ត្រាំបានប្រកាសថា ការចរចាបានស្លាប់បាត់ទៅហើយ។
កាលពីដើមខែនេះ ភាគីអាមេរិច និងក្រុមតាលីបង់ទំនងជាបានខិតជិតដល់កិច្ចព្រមព្រៀងមួយដើម្បីបញ្ចប់សង្រ្គាមរយៈពេល ១៨ឆ្នាំនៅអាហ្គានីស្ថាន។
លោកដូណាល់ ត្រាំ ថែមទាំងបានអញ្ជើញមេដឹកនាំជាន់ខ្ពស់របស់តាលីបង់ និងប្រធានាធិបតីអាហ្គានីស្ថាន Ashraf Ghani មកធ្វើការជួបគ្នានៅអាមេរិចនៅថ្ងៃទី ៨ ខែកញ្ញា ប៉ុន្តែគម្រោងនោះត្រូវបានលុបចោលវិញ ក្រោយពេលក្រុមតាលីបង់បានធ្វើការវាយប្រហារកាលពីថ្ងៃទី ៦ ខែកញ្ញា បណ្តាលឲ្យទាហ៊ានអាមេរិចម្នាក់ស្លាប់ និង ១១នាក់រងរបួស។
លោកត្រាំ បានថ្លែងថា ក្រុមនោះមិនមានសិទ្ធិអំណាចចរចាឡើយ ប្រសិនជាពួកគេមិនអាចព្រមព្រៀងលើបទឈប់បាញ់ក្នុងកំឡុងការចរចា។
ប៉ុន្តែអ្នកចរចាក្រុមតាលីបង់បានច្រានចោលក្តីកង្វល់របស់អាមេរិច និងបានថ្លែងប្រាប់ BBC ដូច្នេះថា ក្រុមតាលីបង់មិនបានធ្វើអ្វីខុសនោះទេ។
លោកនិយាយថា “ពួកគេ (អាមេរិច) បានសម្លាប់ក្រុមតាលីបង់រាប់ពាន់នាក់ ប៉ុន្តែនោះពេលនោះដែរ ប្រសិនជាទាហ៊ានអាមេរិចម្នាក់ត្រូវបានសម្លាប់ វាមិនមែនមានន័យថា ពួកគេត្រូវបង្ហាញការប្រតិកម្មនោះទេ ពីព្រោះវាគ្មានបទឈប់បាញ់ពីភាគីទាំងពីរ”។
លោកបន្ថែមថា “សម្រាប់ភាគីយើង ទ្វារនៅបើកចំហរសម្រាប់ការចារចា ហើយដូច្នេះពួកយើងសង្ឃឹមថា ភាគីម្ខាងទៀតនឹងគិតឡើងវិញ ពីការសម្រេចចិត្តរបស់ពួកគេចំពោះការចរចា”៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
