ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្ត្រីក្រសួងមហាផ្ទៃ បានបកស្រាយថា សំឡេងបែកធ្លាយបញ្ជាឱ្យទប់ស្កាត់ផែនការរបស់គណបក្សប្រឆាំងនៅតាមវត្តអារាមក្នុងរដូវភ្ជុំថាជាវិធានការទប់ស្កាត់ចលនាបំបែកផ្ទៃក្នុងជាតិចង់ផ្តួលរំលំរដ្ឋាភិបាល មិនមែនជាបំបិទសិទ្ធិសេរីភាពរបស់ប្រជាពលរដ្ឋនោះទេ។
សម្តេចក្រឡាហោម ស ខេង លើកឡើងលើគេហទំព័រហ្វេសប៊ុករបស់សម្តេចថ្ងៃទី១៨ខែកញ្ញានេះថា ក្នុងនាមសម្តេចជាអ្នកទទួលខុសត្រូវសន្តិសុខសណ្ដាប់ធ្នាប់សាធារណៈមានសិទ្ធិ និងកាតព្វកិច្ចតាមផ្លូវច្បាប់ក្នុងការដាក់ចេញបទបញ្ជា ដើម្បីថែរក្សាសន្តិសុខសណ្ដាប់ធ្នាប់សាធារណៈសម្រាប់គ្រប់គ្រងព្រឹត្តិការណ៍នានា។ សម្តេច បានអះអាងទៀតថា “ខ្ញុំព្រះករុណា ខ្ញុំមានសិទ្ធិចេញបញ្ជាទៅមន្ត្រីក្រោមឱវាទក្នុងការគ្រប់គ្រងសភាពការណ៍ ហើយសកម្មភាពទាំងឡាយណា ដែលប៉ុនប៉ងបំផ្លាញសុខសន្តិភាព ស្ថេរភាពនយោបាយ បំផុសឱ្យមានអំពើហិង្សា ចលនាបំបែកបំបាក់ផ្ទៃក្នុងជាតិ ឈានទៅផ្ដួលរំលំរាជរដ្ឋាភិបាល អាជ្ញាធរសមត្ថកិច្ចគ្រប់លំដាប់ថ្នាក់ត្រូវមានវិធានការច្បាប់យ៉ាងម៉ឺងម៉ាត់បំផុត”។
សារលិខិត សម្តេចក្រឡាហោម ជូនចំពោះបងប្អូនជនរួមជាតិ ព្រះថេរានុថេរៈគ្រប់ព្រះអង្គជាទីគោរពសក្ការៈ
បងប្អូនជនរួមជាតិជាទីគោរពស្រលាញ់ដ៏ជ្រាលជ្រៅ៖ “កាលពីថ្ងៃទី១០ ខែកញ្ញា ឆ្នាំ២០១៩ ខ្ញុំព្រះករុណាខ្ញុំបានផ្ញើសារសំឡេង ទៅអភិបាលរាជធានីខេត្ត ណែនាំឲ្យខិតខំ និងគ្រប់គ្រងសភាពការណ៍ សន្តិសុខសណ្ដាប់ធ្នាប់សាធារណៈ ក្នុងឱកាសដែលប្រជាពលរដ្ឋទូទាំងប្រទេស កំពុងប្រារព្ធពិធីបុណ្យកាន់បិណ្ឌ និងបុណ្យភ្ជុំបិណ្ឌ ដោយមិនបានបញ្ជាឲ្យរារាំង ឬគៀបសង្កត់ប្រជាពលរដ្ឋណាម្នាក់ មិនឲ្យចូលរួមប្រារព្ធពិធីបុណ្យនេះឡើយ។
ប៉ុន្តែមានបុគ្គល និងសារព័ត៌មានមួយចំនួន ដែលមាននិន្នាការប្រឆាំង បានយកទៅធ្វើអាជីវកម្ម បកស្រាយបំភ្លើស និងមួលបង្កាច់ក្នុងន័យថាខ្ញុំព្រះករុណា បានរារាំង ឬគៀបសង្កត់ប្រជាពលរដ្ឋក្នុងការធ្វើបុណ្យទៅតាមប្រពៃណីព្រះពុទ្ធសាសនាទៅវិញ។ នេះជាចេទនាអាក្រក់ដែលខ្ញុំព្រះករុណាខ្ញុំមិនទទួលយកបានឡើយ។
ក្នុងនាមជាអ្នកទទួលខុសត្រូវសន្តិសុខសណ្ដាប់ធ្នាប់សាធារណៈសម្រាប់ប្រទេសជាតិ ខ្ញុំព្រះករុណាខ្ញុំមានសិទ្ធិ និងកាតព្វកិច្ចតាមផ្លូវច្បាប់ក្នុងការដាក់ចេញបទបញ្ជាដើម្បីថែរក្សាសន្តិសុខសណ្ដាប់ធ្នាប់សាធារណៈសម្រាប់គ្រប់ព្រឹត្តិការណ៍នានា។
ទន្ទឹមនឹងនេះ ខ្ញុំព្រះករុណាខ្ញុំមានសិទ្ធិចេញបញ្ជាមន្ត្រីក្រោមឱវាទក្នុងការគ្រប់គ្រងសភាពការណ៍ ហើយសកម្មភាពទាំងឡាយណា ដែលប៉ុនប៉ងបំផ្លាញសុខសន្តិភាព ស្ថេរភាពនយោបាយ បំផុសឲ្យមានអំពើហិង្សា ចលនាបំបែកបំបាក់ផ្ទៃក្នុងជាតិ ឈានទៅផ្ដួលរំលំរាជរដ្ឋាភិបាល អាជ្ញាធរសមត្ថកិច្ចគ្រប់លំដាប់ថ្នាក់ត្រូវមានវិធានការច្បាប់យ៉ាងម៉ឺងម៉ាត់បំផុត។
ចុងក្រោយនេះ ក្នុងឱកាសពិធីបុណ្យកាន់បិណ្ឌ និងភ្ជុំបិណ្ឌរបស់ពុទ្ធសាសនិកទាំងអស់ ខ្ញុំព្រះករុណាខ្ញុំសូមអំពាវនាវបងប្អូនជនរួមជាតិទាំងអស់ មេត្តាចូលរួមថែរក្សាសុខសន្តិភាព និងរួមគ្នាកសាងបុណ្យកុសលតាមកម្លាំងសទា្ធរៀងៗខ្លួន ដោយទឹកចិត្តជ្រះថ្លា។
ការបកស្រាយរបស់លោកស ខេង នេះក្រោយពីមានការបែកធ្លាយសារសំឡេង ដែលសម្តេចបញ្ជាឱ្យទប់ស្កាត់ផែនការខ្មៅរបស់ក្រុមប្រឆាំងនៅរដូវភ្ជុំបិណ្ឌនេះ។
សម្តេច ស ខេង បានថ្លែងថា៖ ”សុំជម្រាបជូនឯកឧត្តម លោកជំទាវ អភិបាលរាជធានីខេត្តមេត្តាជា្របអញ្ចេះ ពួកប្រឆាំងក្នុងឱកាសបុណ្យភ្ជុំបិណ្ឌនេះ គេបានឱ្យគ្នាគេចុះទៅតាមវត្តពេលភ្ជុំបិណ្ឌនោះឱ្យបានច្រើន ដើម្បីជាឱកាសពេលភ្ជុំបិណ្ឌហ្នឹងជួបជុំគ្នាហើយនឹងពិភាក្សា ឬក៏រៀបចំផែនការខ្មៅរបស់គេនោះ។ ឥឡូវនេះ យើងនាំគ្នារៀបចំតាមខ្ញុំ យើងរៀបចំឱ្យមន្ត្រីចុះតាមវត្តម្យ៉ាង គឺដើម្បីរៀបចំបុណ្យភ្ជុំបិណ្ឌម្យ៉ាងគឺរៀបចំសភាពការណ៍ឱ្យបានល្អផង”៕ ដោយ៖បញ្ញាស័ក្តិ