ខេត្តស្វាយរៀងៈ លោកណុប ចំរើន អភិបាលក្រុងស្វាយរៀង តំណាងលោក ម៉ែន វិបុល អភិបាលខេត្តស្វាយរៀង នៅព្រឹកថ្ងៃទី១៨ ខែកញ្ញា ឆ្នាំ២០១៩ នេះបានធ្វើការជំរុញដល់សិស្សានុសិស្សទាំងអស់ត្រូវខិតខំរៀនសូត្រ និងជៀសឲ្យឆ្ងាយពីគ្រឿងញៀន ពិសេសគឺចូលរួមគោរពច្បាប់ចរាចរណ៍ឲ្យបានគ្រប់ៗគ្នា។
លោកអភិបាលក្រុងស្វាយរៀង បានមានប្រសាសន៍ដូច្នេះ ក្នុងឱកាសអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ អគារទីចាត់ការថ្មី១ខ្នង នៅសាលាបឋមសិក្សាពភ្លា អកនាគ ស្ថិតនៅក្នុងសង្កាត់សង្ឃ័រ ក្រុងស្វាយរៀង ខេត្តស្វាយរៀង ដែលជាអំណោយរបស់លោក ម៉ៅ លន់ និងលោកស្រី យ៉ឹក ហ៊ុច ព្រមទាំងកូនចៅ ។
ក្នុងឱកាសនោះ លោកអភិបាលក្រុងក៏បានលើកឡើង ពីសមិទ្ធផលនានា ក្នុងខេត្តស្វាយរៀង ពិសេសក្រុងស្វាយរៀង ព្រមទាំងលើកឡើងពីស្ថានភាព នយោបាយ នៅប្រទេសកម្ពុជានាពេលបច្ចុប្បន្នផងដែរ។
ក្នុងកម្មវិធីននេះផងដែរ លោកអភិបាលក្រុង ក៏បានបំពាក់មេដាយជូនសប្បុរសជន និងប្រគល់លិខិតថ្លែងអំណរគុណ ព្រមទាំងបានចែកសៀវភៅ ប៊ិច និងថវិកាដល់សិស្សានុសិស្ស និងវត្ថុអនុស្សាវរីយ៍ ជូនចាស់ព្រឹទ្ធាចារ្យ និងលោកគ្រូ អ្នកគ្រូ និងប្រជាពលរដ្ឋដែលបានអញ្ជើញចូលរួមផងដែរ៕ដោយ៖វ៉ៃកូ