ខេត្តកំពត៖ អាណាព្យាបាលយុវជន ៣នាក់ ដែលត្រូវរថយន្តបុកស្លាប់ កាលពីថ្ងៃទី១៣ ខែកញ្ញា ឆ្នាំ២០១៩ ទទូចសុំឲ្យ លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត ជួយរកយុត្តិធម៌ លើករណីគ្រោះថ្នាក់ចរាចរ បណ្តាលឲ្យកូន របស់ពួកគាត់ស្លាប់។
អាណាព្យាបាលជនរងគ្រោះទាំងបីនាក់ បានឲ្យដឹងថា រហូតមកដល់ពេលនេះ គ្រួសារគាត់មិនទាន់ទទួលបានយុត្តិម៌នៅឡើយទេ។ ហើយជនបង្កគ្រោះថ្នាក់ចរាចរ ដែលក្រោយកើតហេតុភ្លាមៗ ត្រូវសមត្ថកិច្ចនគរបាល នៃអធិការដ្ឋានស្រុកឈូក ចាប់ឃាត់ខ្លួននោះ ក្រោយមក ក៏ត្រូវលោក សំរិទ្ធ សិលាវិបុល អធិការនគរបាលស្រុកឈូក បានដោះលែងឲ្យមានសេរីភាពវិញ ទាំងមិនទាន់មានដំណោះស្រាយផ្លូវច្បាប់ ជូនគ្រួសារ របស់ពួកគាត់នៅឡើយ។
មន្ត្រីនគរបាល នៃអធិការដ្ឋានស្រុកឈូក ខេត្តកំពត ស្នើមិនបញ្ចេញឈ្មោះម្នាក់ បានឲ្យដឹងថា គ្រោះថ្នាក់ចរាចរនេះ កើតឡើងនៅម៉ោង ១១ និង៤៥នាទី ថ្ងៃទី១៣ ខែកញ្ញា ឆ្នាំ២០១៩ នៅត្រង់ចំណុចគីឡូម៉ែត្រ ១១៨ ~១១៩ តាមបណ្តោយផ្លូវជាតិលេខ៣A ស្ថិតក្នុងភូមិត្រពាំងរាំង ឃុំអង្គរមាស ស្រុកឈូក ខេត្តកំពត។
ប្រភពព័ត៌មានពីសមត្ថកិច្ចនៅកន្លែងកើតហេតុ បានឲ្យដឹងបន្តថា រថយន្តបង្កគ្រោះថ្នាក់ចរាចរនេះ ម៉ាក សាំយ៉ុង ពាក់ស្លាកលេខភ្នំពេញ 2U-0823 បានបើកបុកម៉ូតូម៉ាក អ៊ិចសិនទ័រ ពណ៌ខ្មៅ គ្មានផ្លាកលេខ ពីក្រោយយ៉ាងពេញទំហឹង។ ម៉ូតូជនរងគ្រោះជិះគ្នា៣នាក់ បណ្តាលឲ្យស្លាប់ទាំង៣នាក់ភ្លាមៗ នៅនឹងកន្លែងកើតហេតុ។
ចំណែកជនសង្ស័យជាអ្នកបើករថយន្តបង្ក បុកយុវជន៣នាក់ស្លាប់ មានឈ្មោះ ឆែម ដារ៉ា ភេទប្រុសអាយុ ៤៦ឆ្នាំ រស់នៅភូមិឈើនី ឃុំព្រៃកប្បាស ស្រុកព្រៃកប្បាស ខេត្តតាកែវ។
សមត្ថកិច្ចមិនបញ្ចេញឈ្មោះ អះអាងថា ជនសង្ស័យបើករថយន្តបុកយុវជនទាំង៣នាក់ ឲ្យស្លាប់នោះ គឺនៅក្រោយកើតហេតុ ត្រូវបានសមត្ថកិច្ចឃាត់ខ្លួននៅកន្លែងកើតហេតុ។
ប្រភពបន្តទៀតថា ករណីគ្រោះថ្នាក់ចរាចរខាងលើនេះ លោកអធិការនគរស្រុកឈូក ក៏មិនបានរាយការណ៍ជូន លោក ម៉ៅ ច័ន្ទ មធុរិទ្ធ ស្នងការនគរបាលខេត្តកំពត ឲ្យដឹងទេ ពោលគឺបានលាក់បាំងសំណុំរឿង មិនឲ្យមេដឹង។ ជាងនេះទៀត លោកអធិការរូបនេះ ថែមទាំងបានដោះលែងជនបង្ក ដែលជាអ្នកបើករថយន្តបុកយុវជនទាំង៣នាក់ ឲ្យស្លាប់នោះ ឲ្យមានសេរីភាពស្ងាត់ៗថែមទៀតផង។
យ៉ាងពាក៏ដោយចុះ អ្នកយកព័ត៌មាន ប្រចាំខេត្តកំពត មិនទាន់មានប្រភពទាក់ទង លោក សំរិទ្ធ សិលាវិបុល អធិការនគរបាលស្រុកឈូក ដើម្បីបំភ្លឺជុំវិញការចោទប្រកាន់ លើករណីគ្រោះថ្នាក់ចរាចរខាងលើបានទេ នៅរសៀលថ្ងៃទី១៨ ខែកញ្ញា ឆ្នាំ២០១៩នេះ។
ត្រង់ចំណុចនេះ អាណាព្យាបាលយុវជនរងគ្រោះទាំងបីនាក់ ក៏បានស្នើដល់ លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត ជួយពិនិត្យទៅលើសកម្មភាពការងារ របស់លោក សំរិទ្ធ សិលាវិបុល អធិការនគរបាលស្រុកឈូក តើមានជាប់ពាក់ព័ន្ធអ្វីខ្លះ ជាថ្នូរដោះលែងជនបង្កគ្រោះថ្នាក់ចរាចរខាងលើ ឲ្យបានឆាប់ផង។
យ៉ាងណាក៏ដោយចុះ រហូតមកដល់ថ្ងៃទី១៨ ខែកញ្ញា ឆ្នាំ២០១៩នេះ នៅមិនទាន់ដឹងថា លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពត នឹងចាត់ការបែបណា ចំពោះសំណុំរឿងខាងលើនេះ៕ ដោយ៖ ដែន សីមា
