កំពង់ស្ពឺ៖ គ្រោះថ្នាក់ចរាចរមួយកើតឡើងនៅលើផ្លូវជាតិលេខ៤១ ត្រង់ចំណុចគីឡូម៉ែត្រលេខ ១៥ ដែលបណ្តាលមកពីរថយន្តអ្នកដំណើរ បុកជាមួយរថយន្ដដឹកកម្មកររោងចក្រ ស្លាប់មនុស្ស3នាក់ របួសមនុស្ស7 នាក់ របួសធ្ងន់5នាក់ ខូចរថយន្ដ2គ្រឿងធ្ងន់ ម៉ូតូ2គ្រឿង ។
រដ្ឋបាលខេត្តកំពង់ស្ពឺ បានឲ្យដឹងថា បន្ទាប់ពីទទួលដំណឹងថា មានហេតុការណ៍គ្រោះថ្នាក់ចរាចរមួយកើតឡើងនៅលើផ្លូវជាតិលេខ៤១ ត្រង់ចំណុចគីឡូម៉ែត្រលេខ ១៥ ដែលបណ្តាលមកពីរថយន្តអ្នកដំណើរ បុកជាមួយរថយន្ដដឹកកម្មកររោងចក្រ ភ្លាមៗនោះដែរ លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ ក៏បានអញ្ជើញចុះពិនិត្យស្ថានភាពជាក់ស្ដែង នៅកន្លែងកើតហេតុផងដែរ ។
បើតាមសមត្ថកិច្ចបានឲ្យដឹងថា នៅថ្ងៃទី18 កញ្ញា 2019 វេលាម៉ោង 18និង25នាទី នៅលើផ្លូវជាតិលេខ41 ចន្លោះគីឡូម៉ែត្រលេខ14-15 ត្រង់ចំណុចភូមិទួលតាសុខ ឃុំសែន ដី ស្រុកសំរោងទង ខេត្តកំពង់ស្ពឺ មានរថយន្ដ១គ្រឿងម៉ាក ហ្វត (Fort) ពណ៌ទឹកប្រាក់ ពាក់ផ្លាកលេខភ្នំពេញ 2A-1161 អ្នកបើកបរមិនស្គាល់អត្តសញ្ញាណ រត់គេចខ្លួន បើកបរពីត្បូងទៅជើងមកដល់ចំណុចខាងលើ បានបុកម៉ូតូ2គ្រឿង ទី1 ម៉ូតូម៉ាកហុងដា C125 ពណ៌ខ្មៅ ពាក់ផ្លាកលេខភ្នំពេញ1CU-8356 បើកបរដោយឈ្មោះ សីហា ភេទប្រុស អាយុ27ឆ្នាំ ស្លាប់តាមផ្លូវពេលបញ្ជូនទៅមន្ទីរពេទ្យ ឌុបមនុស្ស2នាក់ ទី1 ឈ្មោះ តាំង គឹមលី ភេទស្រី អាយុ23ឆ្នាំ (ស្លាប់) ពេលបញ្ជូនដល់មន្ទីរពេទ្យគងពិសី និងទី2 ឈ្មោះ តាំង គឹមចេង ភេទស្រី អាយុ23ឆ្នាំ ស្លាប់នៅតាមផ្លូវពេលបញ្ជូនទៅមន្ទីរពេទ្យ អ្នកទាំង3 រស់នៅភូមិបឹងងោង ឃុំទឹកល្អក់ ស្រុកគងពិសី និងម៉ូតូ 1គ្រឿងទៀត ម៉ាកធូដេ ពាក់ផ្លាកលេខកបង់ស្ពឺ 1K-3898 មិនស្គាល់ឈ្មោះអ្នកបើកបរ និងទីលំនៅ និងជ្រុលទៅបុកផ្ទុបជាមួយរថយន្ដ1គ្រឿងទៀត ប្រភេទកូរ៉េ ដឹកកម្មកររោងចក្រ ពណ៌ខៀវ ពាក់ផ្លាកលេខ ភ្នំពេញ 2AI-2110 បើកបរដោយឈ្មោះ រម្យ ភារុន ភេទប្រុស អាយុ40ឆ្នាំ រស់នៅភូមិគ ឃុំទឹកល្អក់ ស្រុកគងពិសី ដឹកកម្មករ 1.ឈ្មោះ កាន ជឿន ភេទប្រុស អាយុ28ឆ្នាំ រស់នៅភូមិគ ឃុំទឹកល្អក់ ស្រុកគងពិសី របួសធ្ងន់ 2.ឈ្មោះ ផៃ ស្រីនាថ ភេទស្រី អាយុ18ឆ្នាំ រស់នៅភូមិចំបក់ក្អែ ឃុំទឹកល្អក់ ស្រុកគងពិសី របួសធ្ងន់ 3.ឈ្មោះ សឹម សារី ភេទស្រី អាយុ18ឆ្នាំ រស់នៅភូមិគ ឃុំទឹកល្អក់ ស្រុកគងពិសី របួសធ្ងន់ 4.ឈ្មោះ សឹម សារិន ភេទស្រី អាយុ38ឆ្នាំ រស់នៅភូមិគ ឃុំទឹកល្អក់ ស្រុកគងពិសី របួសធ្ងន់ 5.ឈ្មោះ សឹម ដាវី ភេទស្រី អាយុ17ឆ្នាំ រស់នៅភូមិព្រៃកន្ទៀច ឃុំទឹកល្អក់ ស្រុកគងពិសី របួសស្រាល 6.ឈ្មោះ គឹម យាង ភេទស្រី អាយុ23ឆ្នាំ រស់នៅភូមិស្លា ឃុំស្រង់ ស្រុកគងពិសី របួសស្រាល បើកបរពីទិស ខាងជើងទៅត្បូង បណ្ដាលឲ្យគ្រោះថ្នាក់មនុស្ស និងខូចខាតសម្ភារដូចខាងក្រោម៖ ស្លាប់មនុស្ស3នាក់ ស្រី2នាក់។ ភាគីម៉ូតូម៉ាកហុងដា សេ125 របួសមនុស្ស7 ស្រី5នាក់ របួសធ្ងន់5នាក់ ស្រី3នាក់ និងខូចរថយន្ដ2គ្រឿងធ្ងន់ ម៉ូតូ2គ្រឿង ធ្ងន់1គ្រឿង ម៉ាកហុងដា សេ125។
ក្នុងនាមនគរបាលខេត្តកំពង់ស្ពឺទាំងអស់ លោកឧត្តមសេនីយ៍ទោ សម សាមួន ស្នងការនគរបាលខេត្ត សូមចូលរួមរំលែកទុក្ខ និងសម្ដែងការសោកស្តាយជាពន់ពេក ក្នុងករណីគ្រោះថ្នាក់ចរាចរខាងលើនេះ យកឱកាសនេះធ្វើការអំពាវនាវដល់អ្នកបើកបរទាំងអស់ (រថយន្ដ.ទោចក្រយានយន្ត) សូមមេត្ដាបើកបរដោយការអធ្យាស្រ័យយោគយល់និងគោរពច្បាប់ចរាចរណ៍ទាំងអស់គ្នា ពិសេសក្នុងពេលបុណ្យកាន់បិណ្ឌ ភ្ជុំបិណ្ឌខាងមុខនេះ មានតែការប្រុងប្រយ័ត្នគ្រប់ៗគ្នាទេទើបបញ្ជៀសបាននូវករណីគ្រោះថ្នាក់ចរាចរកើតឡើងជាយថាហេតុ គ្រប់កាលៈទេសៈ៕ដោយ៖កូឡាប
