ក្រសួងការពារជាតិរបស់ប្រទេសអារ៉ាប៊ីសាអូឌីត បានដាក់បង្ហាញបំណែកយន្តហោះដ្រូន និងមីស៊ីល ដែលជាភស្ថុតាងបង្ហាញថា ប្រទេសអ៊ីរ៉ង់ជាប់ពាក់ព័ន្ធនឹងការវាយប្រហារលើកន្លែងផលិតប្រេង កាលពីចុងសប្តាហ៍កន្លងទៅនេះ។
ក្រសួងការពារជាតិនិយាយថា ដ្រូន ១៨ និងមីស៊ីលចំនួន ៧ត្រូវបានបាញ់ចេញពីគោលដៅមួយដែលបញ្ជាក់ថា ប្រទេសយេមែន មិនមែនជាអ្នកធ្វើនោះទេ។
ក្រុមប៉ះបោរ Houthi ដែលជាសម្ព័ន្ធមិត្តអ៊ីរ៉ង់ បាននិយាយថា ពួកគេជាអ្នកនៅពីក្រោយការវាយប្រហារ។
ប្រទេសអ៊ីរ៉ង់បានបដិសេធថា ខ្លួនមិនជាប់ពាក់ព័ន្ធនឹងការវាយប្រហារនោះ និងបានព្រមានថា ខ្លួននឹងធ្វើការវាយបកវិញ ប្រសិនជាមានការវាយប្រហារប្រឆាំងនឹងខ្លួន។
អាមេរិចក៏បានសន្និដ្ឋានដែរថា អ៊ីរ៉ង់គឺជាអ្នកនៅពីក្រោយការវាយប្រហារនោះ ហើយរដ្ឋមន្រ្តីការបរទេសអាមេរិច លោក Mike Pompeo កំពុងស្ថិតនៅក្នុងប្រទេសអារ៉ាប៊ីសាអូឌីត ដើម្បីពិភាក្សាពីការសងសឹកវិញ។
ប្រធានាធិបតីដូណាល់ ត្រាំ បញ្ជាក់ថា ការវាយប្រហារលើសម្ព័ន្ធមិត្តរបស់ខ្លួន នឹងរងការវាយបកវិញខ្លាំងជាងមុន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC