ភ្នំពេញ៖ នារសៀលថ្ងៃព្រហស្បតិ៍ ០៦រោច ខែភទ្របទ ឆ្នាំកុរ ឯកស័ក ព.ស២៥៦៣ ត្រូវនឹងថ្ងៃទី១៩ ខែកញ្ញា ឆ្នាំ២០១៩នេះ លោក ឃួង ស្រេង អភិបាលរាជធានីភ្នំពេញ និងភរិយាព្រមទាំងក្រុមគ្រួសារ និងមន្ត្រីរដ្ឋបាលរាជធានីភំ្នពេញ មន្ទីរអង្គភាព និងរដ្ឋបាលខណ្ឌទាំង១៤ ចូលរួមកាន់បិណ្ឌវេនទី៧ នៅវត្តនិគ្រោធវ័ន ហៅវត្តគល់ទទឹង ស្ថិតនៅក្នុងសង្កាត់ព្រែកថ្មី ខណ្ឌច្បារអំពៅ រាជធានីភំ្នពេញ។
លោកអភិបាលរាជធានីភ្នំពេញ បានថ្លែងថា សូមឧទ្ទិសមគ្គផលជូនបងប្អូនប្រជាពលរដ្ឋ និងពុទ្ធបរិស័ទទូទាំងរាជធានីភំ្នពេញ ទទួលបាននូវបុណ្យកុសល និងជួបតែសេចក្តីសុខ សេចក្តីចម្រើន ព្រមទាំងពរ៤ប្រការ គឺអាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។
ពិធីបុណ្យកាន់បិណ្ឌ ដែលមានរយៈពេល១៤ថ្ងៃ មុនបុណ្យភ្ជុំបិណ្ឌ ដែលជាបុណ្យធំ ត្រូវបានប្រជាពលរដ្ឋ ពុទ្ធបរិស័ទ ធ្វើឡើងក្នុងន័យ ឧទ្ទិសកុសលផលបុណ្យ ជូនដល់ដួងវិញ្ញាណក្ខន្ធ បុព្វការីជនមាន មាតាបិតា ញាតិការទាំង៧សណ្តាន ដែលបានចែកឋាន ទៅកាន់លោកខាងមុខ ឲ្យមកទទួលអានិសង្ឃ ដែលកូនចៅឧទ្ទិសជូន។
ស្ថិតក្នុងក្តីសោមនស្សរីករាយ ប្រារព្ធពិធីបុណ្យកាន់បិណ្ឌ ដ៏ជ្រះថ្លានាឱកាសនេះ លោក ឃួង ស្រេង អភិបាលរាជធានីភ្នំពេញ រួមជាមួយក្រុមគ្រួសារ និងមន្ត្រីរាជការ សាលារាជធានីភ្នំពេញ ព្រមទាំងអាជ្ញាធរដែនដី នាថ្ងៃទី១៩ ខែកញ្ញា ឆ្នាំ២០១៩នេះ បានអញ្ជើញកាន់បិណ្ឌវេនទី៧ ដោយបានធ្វើពិធី នមស្ការព្រះរតនត្រ័យ សមាទានសីល និមន្តព្រះសង្ឃចម្រើនព្រះបរិត្ត និងសម្តែងធម្មទេសនា មុននឹងឈានទៅ ពិធីប្រគេនយាគូដល់ព្រះសង្ឃ រាប់បាត្របង្សុកូល វេរភត្តាហារប្រគេនព្រះសង្ឃ និងពហូទេវា ដារឆ្លង ជាកិច្ចបង្ហើយបុណ្យ ដែលនឹងប្រព្រឹត្តិទៅនៅព្រឹកថ្ងៃទី២០ កញ្ញា នេះ នៅវត្តនិគ្រោធវន័ ហៅវត្តគល់ទទឹង ក្នុងសង្កាត់ព្រែកថ្មី ខណ្ឌច្បារអំពៅ ខណៈដែលប្រជាពលរដ្ឋ នៅទូទាំងប្រទេស បាននិងកំពុងប្រារព្ធធ្វើឡើង តាមលទ្ធភាពរៀងៗខ្លួន ។
សូមបញ្ជាក់ថា ក្នុងកិច្ចប្រជុំគណៈបញ្ជាការឯកភាព របស់រដ្ឋបាលរាជធានីភ្នំពេញ កាលពីថ្ងៃពុធកន្លងទៅ លោក ឃួង ស្រេង បានណែនាំឲ្យ កម្លាំងសមត្ថកិច្ច សហការជាមួយអាជ្ញាធរដែនដី គ្រប់ខណ្ឌ សង្កាត់ ត្រូវពង្រឹងការរៀបចំ ការពារសន្តិសុខ សណ្តាប់ធ្នាប់ នៅគ្រប់វត្តអារាម ទូទាំងរាជធានីភ្នំពេញ ដើម្បីឲ្យបងប្អូនប្រជាពលរដ្ឋ បានធ្វើបុណ្យទាន ដោយស្ងប់អារម្មណ៍ មិនមានការភ័យខ្លាច ព្រមទាំងការរៀបចំ សម្រួលចរាចរណ៍ តាមដងផ្លូវនានា ជូនប្រជាពលរដ្ឋ ធ្វើដំណើរឲ្យងាយស្រួលផងដែរ ក្នុងឱកាសកាន់បិណ្ឌ និងភ្ជុំបិណ្ឌនេះ។ ជាមួយគ្នានេះ ក៏ត្រូវរំលឹកដល់ប្រជាពលរដ្ឋ កុំឲ្យធ្វេសប្រហែសពីគ្រោះអគ្គីភ័យ និងការពារផ្ទះសម្បែង របស់បងប្អូន ។
ចំពោះទយ្យទាន ដែលបានប្រគេន ដល់ព្រះសង្ឃរបស់ រដ្ឋបាលរាជធានីភ្នំពេញរួមមាន ៖សាដក មី ទឹកសុទ្ធ ទឹកក្រូច អង្ករ ស្ករស ផ្លែឈើ ត្រីខកំប៉ុង ទឹកដោះគោ ក្រណាត់ស បច្ច័យសម្រាប់ប្រគេនព្រះសង្ឃ តាជី ដូនជី និងកូនសិស្សលោក៕ ដោយ៖ កូឡាប