រាជធានីភ្នំពេញ ៖ ថ្ងៃទី១៩ ខែកញ្ញា ឆ្នាំ២០១៩ លោក នាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បានទទួលជួបលោកស្រីគ្លូរៀ ឡៃ នាយកតំបន់អាស៊ីគោលនយោបាយសម្ព័ន្ធគ្រឿងញៀនអន្តរជាតិពិភាក្សាការងារ ។
ក្នុងឱកាសនោះ លោកស្រីគ្លូរៀ ឡៃ បានប្រាប់ឲ្យដឹងពីគោលបំណងនៃជំនួបនោះថា គឺចង់ស្វែងយល់ពីស្ថានភាពទូទៅនៃបញ្ហាគ្រឿងញៀន និងអ្នកទោសបទល្មេីសគ្រឿងញៀនជាប់ឃុំក្នុងពន្ធនាគារនៅកម្ពុជា។
ក្ក្នុងឱកាសនោះដែរ លោកនាយឧត្តមសេនីយ៍ មាស វិរិទ្ធ បានជម្រាបជូនភ្ញៀវស្ថានភាពទូទៅនៃបញ្ហាគ្រឿងញៀនកម្ពុជា ដែលរាជរដ្ឋាភិបាលកម្ពុជាបានខិតខំធ្វេីការប្រយុទ្ធប្រឆាំងគ្រឿញៀនតាមរយ:ការដាក់ចេញនូវផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់។
ជាមួយគ្នានេះ លោក នាយឧត្តមសេនីយ៍ មាស វិរិទ្ធ ក៏បានបញ្ជាក់ប្រាប់ភ្ញៀវបន្ថែមថា តាមរយ:ផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ទាំង៤លេីកនេះកម្ពុជាបានធ្វេីការបង្ក្រាបឧក្រិដ្ឋជន ដឹកជញ្ជូន ចរាចរ រក្សាទុក និងជួញដូរគ្រឿងញៀន ហើយបញ្ជូនទៅតុលាការឲ្យទទួលទោសតាមច្បាប់រួចដាក់ពន្ធនាគារបានជាច្រេីននាក់ប៉ុន្តែមិនមានអ្នកប្រេីប្រាស់គ្រឿងញៀនណាម្នាក់ត្រូវចាប់ខ្លួនដាក់ពន្ធនាគារឡេីយ ព្រោះរាជរដ្ឋាភិបាលបានចាត់ទុកអ្នកញៀនគ្រឿងញៀនគឺជាជនរងគ្រោះដែលត្រូវទទួលបានការព្យាបាលនិងស្តារនីតិសម្បទាពួកគេឡេីងវិញដោយមិនបង់ប្រាក់។ ទន្ទឹមគ្នានេះ កម្ពុជាមានវិធានការច្បាស់លាស់មួយ គឺមិនទុកអ្នកញៀនណាម្នាក់ឲ្យនៅឯកោរនោះទេ គេត្រូវតែទទួលបានការព្យាបាលនៅតាមមណ្ឌលសុខភាព មន្ទីរពេទ្យក្នុងសហគមន៍របស់គេដោយគ្មានការរើសអើង៕ ដោយ ៖ បញ្ញាស័ក្តិ