នៅតាមផ្លូវត្រឡប់មកពីបំពេញបេសកកម្មវិញ បុរសញ្ជាតិអាមេរិក ឈ្មោះ Tobias ត្រូវធ្វើដំណើរឆ្លងកាត់ទីវាលរហោស្ថានមួយ។ គាត់ពិតជាមានការបារម្ភ ហើយខំប្រឹងធ្វើដំណើរយ៉ាងប្រញាប់ ចៃដន្យគ្រវាសភ្នែកឃើញវត្ថុបញ្ចេញពន្លឺមួយនៅក្បែរផ្លូវ។
Tobias ងឿងឆ្ងល់ក៏ខិតបន្តិចម្តងៗចូលទៅកៀក ហើយក៏ឃើញថា នោះជាដុំថ្មមួយធំបញ្ចេញពន្លឺពណ៌លឿង ពេលដែលរស្មីព្រះអាទិត្យបញ្ចាំងចំ។ ពេលសង្កេតមើលម៉ត់ចត់ទៅវាមានរន្ធជាច្រើនដូចជាសំបុកឃ្មុំ អង្រួនសាកមើលពុំនឹកស្មានថា វាស្រាលសោះ។
លោកកាន់តែឆ្ងល់ ហើយពិតជាចង់ដឹងថា តើវាជាថ្មអ្វី ក៏ប្រញាប់យកវាមកផ្ទះ។ បន្ទាប់មកលោកក៏ស្វះស្វែងរកអ្នកជំនាញការដើម្បីពិនិត្យថ្មចម្លែកនេះ។ ពួកអ្នកជំនាញការ ក្រោយពេលឃើញវា ក៏និយាយលែងចេញតែម្តង។ ថ្មដែលមានរចនាសម្ព័ន្ធស្មុគស្មាញនេះ វារួមមានវត្ថុធាតុសម្ភារៈច្រើនយ៉ាង ហើយលើសពីនេះទៀត វត្ថុធាតុខ្លះពុំដែលមានលើផែនដីនេះទេ។
វាគឺជាដុំអាចម៍ផ្កាយមកពីភពដទៃ គេបានដាក់ឈ្មោះថា Fukang រួចក្រោយមកក៏ត្រូវបានចាត់ចែងចេញជាច្រើនផ្នែកដើម្បីលក់ដេញថ្លៃ។
ពេលនោះគេក៏រកឃើញថា Fukang ដែលចាំងពន្លឺពណ៌លឿងបែបនេះ ព្រោះវាមានធាតុរ៉ែម្យ៉ាងហៅថា olivine ហើយក្នុងរចនាសម្ព័ន្ធនៃដុំថ្ម មានលាយជាមួយនឹងសារធាតុចម្លែក nickel ។ អាស្រ័យហេតុនេះ វាត្រូវបានវាយតម្លៃថា ជាដុំអាចម៍ផ្កាយស្អាតបំផុតដែលមនុស្សធ្លាប់ឃើញ។
នៅឆ្នាំ ២០០៨ ចំណែកមួយផ្នែកនៃដុំអាចម៍ផ្កាយ Fukang ត្រូវបានលក់ដេញថ្លៃក្នុងតម្លៃចាប់ផ្តើម ២លានដុល្លារ នៅបុស Bonham, ញូវយ៉ក អាមេរិក។ លទ្ធផលចុងក្រោយគេលក់បានតម្លៃដល់ទៅទ្វេដងឯណោះ។
ក្រុមអ្នកជំនាញការជឿថា Fukang មានប្រភពដើមចេញពីផ្នែកខាងក្នុងនៃដុំអាចផ្កាយ ហើយវា ត្រូវបានកកើតឡើងតាំងពីអំឡុងពេលប្រព័ន្ធព្រះអាទិត្យទើបត្រូវបានសាង មុននេះ ប្រមាណ ៤,៥០០០លានឆ្នាំ។
សំណាងពិតជាមើលពុំឃើញមែន៕ ចន្ទ្រា
