ខេត្តស្វាយរៀង ៖ ដោយមានការចង្អុលបង្ហាញពីលោកឧត្ដមសេនីយ៍ទោស្នងការនគរបាលខេត្ដស្វាយរៀង កម្លាំងអធិការដ្ឋាននគរបាលស្រុកកំពង់រោទិ៍ សហការជាមួយ កម្លាំងការិយាល័យប្រឆាំងគ្រឿងញៀងខេត្ដ កម្លាំងប៉ុស្ដិ៍រដ្ឋបាលថ្មី កម្លាំងរាជអាវុធស្រុកកំពង់រោទិ៍ ដោយមានការសម្របម្រួលពីលោកព្រះរាជអាជ្ញាសាលាដំបូងខេត្ដស្វាយរៀងនៅថ្ងៃទី១៩ ខែកញ្ញា ឆ្នាំ២០១៩ ម៉ោង០៣និង១៥បានចុះបង្ក្រាបមុខសញ្ញាចែកចាយ ជួញដូរគ្រឿងញៀន នៅចំណុចផ្សារព្រំដែនព្រៃវល្លិ៍ ស្ថិតនៅក្នុងភូមិអូរ ឃុំថ្មី ស្រុកកំពង់រោទិ៍ ខេត្ដស្វាយរៀង ឃាត់មុខសញ្ញាបាន ០៨នាក់ ( ប្រុស ) ជនជាតិ ម៉ាឡេស៊ី ០១នាក់ រឹបរូសវត្ថុតាង ម្សៅក្រាមពណ៌សរថ្លា ជាថ្នាំញៀនចំនួន ៥១កញ្ចប់តូច និងសម្ភារប្រើប្រាស់ថ្នាំមួយចំនួនទៀត។
យោងតាមសមត្ថកិច្ចបានអោយដឹងថា៖កម្លាំងអធិការដ្ឋាននគរបាលស្រុកកំពង់រោទិ៍ បានធ្វើការឃាត់ខ្លួនជនសង្ស័យជួញដូរគ្រឿងញៀនចំនួន ១នាក់ ប្រុស ឈ្មោះ វីលួ លីភី អាយុ ៤៨ឆ្នាំ ជនជាតិម៉ាឡេស៊ី ព្រមទាំងបានដកហូតថ្នាំញៀនចំនួន ០៣ កញ្ចប់តូច និងដោយមានការចង្អុលបង្ហាញ ដឹកនាំរបស់ លោកឧត្តមសេនីយ៍ទោ កឹង ឃន ស្នងការនគរបាលខេត្ត កម្លាំងការិយាល័យប្រឆាំងការជួញដូរគ្រឿងញៀន សហការជាមួយកម្លាំងអធិការដ្ឋាននគរបាលស្រុកកំពង់រោទិ៍ និងកម្លាំងមូលដ្ឋានអាវុធហត្ថស្រុកកំពង់រោទិ៍ បានបន្តធ្វើការស្រាវជ្រាវ និងឈានទៅធ្វេីការឃាត់ខ្លួនបក្សពូករបស់ជនសង្ស័យជួញដូរគ្រឿងញៀនចំនួន ០៧ នាក់បន្ថែមទៀត ជាលទ្ធផលកម្លាំងនគរបាលបានឃាត់ខ្លួនជនសង្ស័យសរុបចំនួន ០៨ នាក់ ប្រុស(ជនជាតិម៉ាឡេស៊ី ១ នាក់) និងធ្វេីការដកហូតវត្ថុតាង÷ ថ្នាំញៀនចំនួន ៥១ កញ្ចប់តូច ទូរស័ព្ទដៃចំនួន ០៤ គ្រឿង ម៉ូតូចំនួន ១ គ្រឿង និងសម្ភារប្រើប្រាស់មួយចំនួនទៀត។
បច្ចុប្បន្នកម្លាំងការិយាល័យប្រឆាំងគ្រឿងញៀនខេត្តកំពុងកសាងសំណុំរឿងចាត់ការតាមនីតិវិធីច្បាប់ ៕ ដោយ ៖ វ៉ៃកូ