អង្គការលើកលែងទោសអន្តរជាតិ នៅថ្ងៃសុក្រនេះ បានចោទប្រកាន់ប៉ូលីសហុងកុងពីបទធ្វើទារុណកម្ម និងករណីរំលោភផ្សេងៗ ក្នុងបេសកម្មរបស់ពួកគេទប់ទល់នឹងការធ្វើបាតុកម្មអស់ពេលជាង ២ខែ ប៉ុន្តែប៉ូលីសនិយាយថា ពួកគេបានបង្ហាញពីភាពអត់ធ្មត់ខ្លាំងនៅលើដងផ្លូវ កំឡុងពេលប្រឈមនឹងអំពើហិង្សា។
កំឡុងពេលតវ៉ា ក្រុមបាតុករប្រឆាំងរដ្ឋភិបាលហុងកុង ដែលមានមួយចំនួនពាក់ម៉ាស និងឈុតខ្មៅ បានចោលគ្រាប់បែកសាំងដាក់ប៉ូលីស និងការិយាល័យរដ្ឋាភិបាល។ ពួកគេព្រមទាំងបានធ្វើការបិទផ្លូវ ទៅកាន់ព្រលានយន្តហោះ បំផ្លាញស្ថានីយ៍រថភ្លើងក្រោមដី និងបានដុតភ្លើងនៅតាមដងផ្លូវជាច្រើន ក្នុងទីក្រុងផងដែរ។
ប៉ូលីសបានធ្វើការឆ្លើយតបទៅលើក្រុមបាតុករវិញដោយប្រើឧស្ម័នបង្ហូរទឹកភ្នែក បាញ់ទឹក បាញ់គ្រាប់កាំភ្លើងជ័រ និងវិធានការផ្សេងៗទៀត។
ក្រុមប៉ូលីសក៏ត្រូវបានគេមើលឃើញថា បានវាយក្រុមបាតុករនៅលើដី ដោយដំបងរបស់ពួកគេ។
អង្គការលើកលែងទោសអន្តរជាតិបាននិយាយថា ការស៊ើបអង្កេតបានផ្តល់នូវឯកសារពីគំរូដែលគួរឲ្យព្រួយបារម្ភរបស់កងកម្លាំងប៉ូលីសហុងកុង ដែលបានប្រើនូវវិធីសាស្ត្រគ្រប់បែបយ៉ាងរួមមាន ការចាប់មនុស្សនៅកន្លែងបាតុកម្ម ព្រមទាំង មានភស្ថុតាងនៃការធ្វើទារុណកម្ម និងការឃុំខ្លួនផ្សេងៗទៀត។
លោក Nicholas Bequelin ប្រធានអង្គការលើកលែងទោសអន្តរជាតិប្រចាំអាស៊ីខាងកើតបាននិយាយថា “វិធានការឆ្លើយតបក្នុងការគ្រប់គ្រងមនុស្សរបស់ប៉ូលីសហុងកុងត្រូវបានផ្សាយឲ្យពិភពលោកមើល។ អ្វីដែលយើងបានឃើញតិចតួចគឺការរំលោភបំពានរបស់ប៉ូលីសប្រឆាំងនឹងក្រុមបាតុករ ដែលកើតឡើងផុតភ្នែករបស់យើង”។
សូមបញ្ជាក់ថា ទីក្រុងហុងកុងត្រូវបានញាំញីដោយការបាតុកម្មដែលមិនធ្លាប់មានពីមុនមកអស់រយៈពេលជាង ៣ខែមកហើយ ដោយសារតែច្បាប់ធ្វើបត្យាប័ន ដែលអនុញ្ញាតិឲ្យមានការបញ្ជូនអ្នកទោសពីហុងកុង ទៅកាត់ទោសនៅប៉េកាំងបាន៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia