បាត់ដំបង៖ នៅព្រឹកថ្ងៃទី ២០ ខែ កញ្ញា ឆ្នាំ២០១៩ នៅទីបញ្ជាការដ្ឋានវរសេនាតូចនគរបាលការពារព្រំដែនគោកលេខ ៣១០ និងលេខ៨២៣នៅ ទិសស្រុកសឡូត ខេត្តបាត់ដំបង លោកឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង និងជាមេបញ្ជាការរងនគរបាលជាតិភូមិភាគទី៥ បានដឹកនាំលោក លោកស្រី ស្នងការរង នាយ នាយរងការិយាល័យជំនាញ ព្រមទាំងមន្រ្តីនគរបាល ចំណុះស្នងការដ្ឋាន សាកសួរសុខទុក្ខកងកម្លាំង នគរបាល ក្នុងវរសេនាតូចនគរបាល ការពារព្រំដែនគោកលេខ៣១០និងលេខ៨២៣ ដែលកំពុងបំពេញភារកិច្ចការពារបូរណភាពទឹកដី ក្នុងភូមិសាស្រ្តស្រុកសំឡូត ខេត្តបាត់ដំបង ទាំងអស់ នាឱកាសបុណ្យកាន់បិណ្ឌ ភ្ជំបិណ្ឌ នាពេលដ៏ខ្លីខាងមុខនេះ ។
លោក បានសម្តែងនូវការកោតសរសើរចំពោះវីរភាពរបស់កងកម្លាំងនគរបាលវរព្រំដែនទាំងអស់ ដែលបានខិត ខំបំពេញ ភារកិច្ច បម្រើជាតិមាតុភូមិ ការពារបាននូវបូរណភាពទឹកដី ព្រម ទាំងសន្តិសុខ សណ្តាប់ធ្នាប់សង្គម ជូនប្រជាពលរដ្ឋនៅមូលដ្ឋាន។
លោកបានសម្តែងនូវការកោតសរសើរចំពោះកម្លាំងនគរបាលវរព្រំដែននៅទិសស្រុកសំឡូត ក៏ដូចជាកងកម្លាំងនគរបាលនៃអធិការដ្ឋាននគរបាលស្រុកសំឡូតទាំងអស់ដែលបានចូលរួមយកអស់ពីកម្លាំងកាយកម្លាំងចិត្តក្នុងការជួយសង្រ្គោះប្រជាពលរដ្ឋក្នុងមូលដ្ឋានដែលទទួលរងគ្រោះដោយជំនន់ទឹកភ្លៀង និងការស្វែងរកជនងគ្រោះដែលបានបាត់ខ្លួនដោយការបាក់ដីភ្នំនាប៉ុន្មានថ្ងៃកន្លងមកនេះ។
លោក បានបន្តថា ពីពេលនេះទៅមុខនគរបាលយើងត្រូវបន្តខិតខំបំពេញភារកិច្ចនេះជាបន្តទៀត ហើយត្រូវការពារឲ្យបាននូវបូរណភាពទឹកដី ការពារជាតិ សាសនា ព្រះមហាក្សត្រ ការពាររដ្ឋធម្មនុញ្ញ ការពាររាជរដ្ឋាភិបាលស្របច្បាប់ ដែលកើតចេញពីការបោះឆ្នោតដោយប្រជាពលរដ្ឋ ហើយត្រូវប្រឆាំងដាច់ខាតជាមួយពួកក្បត់ជាតិដែលមានបំណង និងមហិច្ឆតាធ្វើបដិវត្តន៍ពណ៌ ចង់បំផ្លាញសុខសន្តិភាព និងការអភិវឌ្ឍរបស់ប្រទេសជាតិ ដែលយើងកំពុងមានដូចពេលបច្ចុប្បន្ននេះ។
លោកបានផ្តាំផ្ញើដល់កងកម្លាំងនគរបាលទាំងអស់ ត្រូវថែរក្សាបាននូវសាមគ្គីភាពផ្ទៃក្នុង ជាមួយកងកម្លាំងនគរ បាលដូចគ្នាព្រមទាំងជាមួយកងកម្លាំងប្រដាប់អាវុធ មន្រ្តីរាជការ អាជ្ញាធរមូលដ្ឋានពាក់ព័ន្ធដែលមានសកម្មភាព ក្នុងភូមិសាស្រ្តទទួលខុសត្រូវរបស់យើង ត្រូវទប់ស្កាត់រាល់បទល្មើសគ្រប់ប្រភេទដូចជាករណីឆ្លងដែនដោយខុសច្បាប់ ការជួញដូរគ្រឿងញៀន ជាដើម ហើយនគរបាលត្រូវដើរតួជាស្នូលក្នុងការអនុវត្តនូវកម្មវិធី គោលនយោបាយស្តីពីភូមិ ឃុំមានសុវត្ថិភាពនៅមូលដ្ឋាន។
លោកបានផ្តាំផ្ញើដល់កងកម្លាំងនគរបាលទាំងត្រូវគោរព បាននូវតួនាទីនិងភារកិច្ចរបស់ខ្លួនស្របតាមវិន័យរបស់កងកម្លាំងនគរបាលជាតិ មិនត្រូវចាញ់បោកតាមឧបាយកលញុះញង់ បំបែកបំបាក់ របស់ពួកឧទ្ទាម ក្បត់ជាតិ។ ក្រៅពីនោះនគរបាលដាច់ខាតមិនត្រូវចូលរួមក្នុងសកម្មភាពល្មើសច្បាប់ណាមួយ រួមទាំងការរំលោភយកដីធ្លីរបស់រដ្ឋ របស់ប្រជាពលរដ្ឋនិងសកម្មភាពព្រៃឈើជាដើម ។ ជាមួយនេះដែរកងកម្លាំងនគរបាលយើងត្រូវថែរក្សាបាននូវសុខភាពរបស់យើង ទាំងការរស់នៅស្អាត ការហូបចុកស្អាត ប្រកបដោយអនាម័យល្អ ៕ដោយ៖កូឡាប